သည်းထိတ်ရင်ဖိုစရာ အမေစုရဲ့ ခရီးစဉ်အကြောင်း ရင်ဖွင့်လာတဲ့ လေယာဉ်မှူး
23 Jul 2018 1,325 Views
နိုင်ငံတော်အတိုင်ပင်ခံ ဒေါ်အောင်ဆန်းစုကြည်(အမေစု) ရန်ကုန်ကနေ နေပြည်တော် အပြန်ခရီးစဉ်ကို လိုက်ပါမောင်းနှင်ပေးခဲ့ရတဲ့ လေယာဉ်မှူးတစ်ဦးက လေယာဉ်ခရီးစဉ်အတွင်း ရာသီဥတုဆိုးရွားမှုကြောင့် ဖြစ်ပျက်ခဲ့ရတဲ့ သည်းထိတ်ရင်ဖိုစရာ အတွေ့အကြုံအချို့ကို လူမှုကွန်ယက်စာမျက်နှာပေါ်ကနေတစ်ဆင့် အမှတ်တရအဖြစ်ပျက်အနေနဲ့ ရေးသားဖော်ပြခဲ့ပါတယ်။
ဒီနေ့ညနေ အမေစု နေပြည်တော်ပြန်မယ်ဆိုလို့ မောင်းပို့တယ် တိုက်တိုက်ဆိုင်ဆိုင် ရန်ကုန်က အတက်မှာ လေရောမိုးရောလျှပ်စီးရော မိုးကြိုးရော စုံပစ်ဝင်တာ ရှောင်လို့တိမ်းလို့လည်းမရ မိုင်တစ်ရာပတ်လည်လောက်ရှိတယ်...ကျွန်တော့်လေယာဉ်မောင်းသက် ၂၁ နှစ်အတွင်း တော်တော်ဆိုးတဲ့ အတွေ့အကြုံပါ။
လေယာဉ်မတော်တဆဖြစ်မှုအများစုဟာ အတက်နဲ့အဆင်းမှာ ဖြစ်လေ့ရှိပြီး အတက်ကအန္တရာယ်အကြီးဆုံးပါ... ဆုံးဖြတ်ချက်တခုမှားသွားတာနဲ့ စက္ကန့်ပိုင်းအတွင်း မတွေးဝံ့စရာပါ။ ကျွန်တော်လည်း အတတ်နိုင်ဆုံးစိတ်တည်ငြိမ်အောင်ထားပြီး ဆရာအဆက်ဆက်ဆီက ဆည်းပူးခဲ့တဲ့ ပညာကုန်ထုတ်သုံးခဲ့တယ်ပေါ့... လမ်းမှာလည်း တောက်လျှောက်နီးပါး တိမ်တောင်ကြီးတွေ... နေပြည်တော်အဆင်းကျတော့လည်း ရာသီဥတု သိပ်မဆိုးပါဘူး... မိုးသည်းလွန်းလို့ Wiper speed တဆုံးဖွင့်ပြီးဆင်းရရုံလေးပါ။
ကျွန်တော်လည်း အမေ့ကိုအရမ်းအားနာနေပြီ တော်ရုံလူငယ်မူးသွားနိုင်လောက်တဲ့ ရာသီဥတုပါ... ဒါနဲ့လေယာဉ်စက်သတ်ပြီး အမေဆင်းခါနီးထွက်နှုတ်ဆက်တယ်၊ အမေ့ခရီးစဉ်အတော်များများမှာ အမေဟာပြုံးပြနှုတ်ဆက်လေ့ရှိတယ်... ဒီတခါတော့ အမေ့ရဲ့စူးရှလွန်းတဲ့ မျက်ဝန်းတစ်စုံက လူကြားမှာရပ်နေတဲ့ ကျွန်တော့်ကို ဂရုတစိုက်ရှာဖွေနေတယ် ကျွန်တော့်ကိုရှာတွေ့တာနဲ့ မျက်လုံးအစုံကို သေချာစိုက်ကြည့်ပြီး လေးနက်တဲ့မျက်နှာထားနဲ့ ပြောလိုက်တယ် "ကျေးဇူးတင်ပါတယ်"တဲ့
ကျွန်တော့်ရင်ထဲထိသွားတယ်... စိတ်ထဲကပြောချင်တဲ့စကားကို မျက်ဝန်းကတဆင့်ပြောလိုက်မိတယ် "ကျေးဇူးမတင်ပါနဲ့အမေရယ် ကျွန်တော်တို့တွေက တိုင်းပြည်တာဝန်ထမ်းဆောင်ဖို့ အမြဲအသင့်ရှိနေတဲ့ အမေ့(နိုင်ငံ့)သားကောင်းတွေပါ" လို့
Credit – Zaw Latt FB
