BEC-TERO TV

နဂိုအတိုင်းပြန်မကောင်းနိုင်တော့တဲ့ မပေါ့ဆသင့်သောရောဂါ

20 Aug 2018     1,591 Views


သြဂုတ်လ ၁၉ ရက်နေ့တွင် အဆိုတော် တစ်ဦးဖြစ်တဲ့ Ah Boy က သူခံစားနေရသော ရောဂါတစ်ခုကို လူမှုကွန်ယက်စာမျက်နှပေါ်မှာ ပရိသတ်တွေအတွက် ဝေမျှပေးထားပါတယ် ။ သူကိုယ်တိုင်တောင်မသိပဲ ဆေးရုံပြကြည့်မှသိကာ " ဘယ်တော့မှ နဂိုအတိုင်းပြန်မကောင်းနိုင်တော့တဲ့ မပေါ့ဆသင့်သောရောဂါ" ဆိုပြီး သူ၏ ပရိသတ်တွေကို ဆင်ခြင်ဖို့ဝေမျှပေးထားပါသည် ။
 
အဆိုတော် Ah Boy ၏ပြောပြအချက်အရ " လွန်ခဲ့သော ၂ ပတ်လောက်က ကျနော်ရဲ့ ခါးရိုးအလယ်ကနေ လည်ပင်းဇက်နားတစ်လျှောက်ထိ နာကျင်ပြီး မအောင့်စဖူးအောင့်လာပါတယ်။ အဆိုးဆုံးခံစားရတဲ့ အချိန်ကတော့ မနက်မိုးလင်း ကုတင်ပေါ်မှ အိပ်ရာထချိန်ပါပဲ။ ကျောရိုးကပဲ အောင့်သလိုလို… ကြွက်သားတွေကပဲနာသလိုလို။ ပြီးတော့ ရုံးမှာ Computer (သို့) ဖုန်းသုံးရင်လည်း မျက်ရိုးတွေကိုက်ပြီး ခေါင်းမူးလာသလိုခံစားလာရပါတယ်။ Gym မှာ ဝိတ်တွေအရမ်းမပြီး မတော်တဆရိုးရိုးဒဏ်ဖြစ်သွားတယ်ပဲထင်လို့ ဒီအတိုင်း အလေးမထားပဲနေမိလိုက်တယ်။ တစ်နေ့တစ်ခြား မသက်သာပဲ ပိုဆိုးလာပါတော့တယ်။
 
 
ဘန်ကောက်ကို အစည်းအဝေး ကိစ္စနဲ့ ရောက်သွားတော့… အိမ်က အမေ နဲ့ မြတ်က ဆေးရုံ တစ်ချက်လောက်သွားပြကြည့်ပါဆိုပြီး သေချာပြောပြီးမှာနေလို့… ကျနော်လည်း အစည်းအဝေးပြီးတာနဲ့ Samitivej ဆေးရုံကို သူငယ်ချင်း အကူအညီနဲ့ Booking တင်ပြီး ညနေဘက်မှာထိုင်တဲ့ အရိုးအကြောအထူးကုဆရာဝန်တစ်ယောက်နဲ့သွားပြလိုက်ပါတယ်။ ကျနော် နာကျင်တဲ့အကြောင်း အသေးစိပ်အား ဆရာဝန်ကို သေချာရှင်းပြပြီးတော့… ကျနော့်ကို X-Ray ဓါတ်မှန်ချက်ချင်းရိုက်ခိုင်းပါတယ်။ ရိုက်ပြီးပြီးချင်းပဲ သူ့ရဲ့ Computer Screen ပေါ်တင်ပြီး ဆရာဝန်ဟာကျနော့်ကို နာရီဝက်ကျော်မက သေချာရှင်းပြပါတယ်။
 
 
ပထမပုံက သာမန် လူတစ်ယောက် လည်ပင်းရဲ့ ကောင်းမွန်နေသော အရိုးအခြေအနေပုံပါ။ အရိုးဟာ သူ့သဘောသဘာဝအရ အနောက်ကို အနည်းငယ်ကောက်နေရပါတယ်။
 
 
အခုကျနော့်ရဲ့ ဓါတ်မှန်အဖြေလွှာ ဒုတိယပုံကို ကြည့်ကြည့်ပါ။ လည်ပင်းအရိုးဟာ အနောက်ကို ကောက်မနေပဲ အရှေ့ကို ငိုက်ဆိုက်နေပါတယ်။
 
မြင်မြင်ချင်း ကျနော် အရမ်းကိုလန့်သွားပါတယ်။ ဆရာဝန်ကြီးက ဒီရောဂါကို Cervical Spondylosis မြန်မာလို ကျီးပေါင်း လို့ခေါ်ပါတယ်။ ကျီးပေါင်းလို့ပြောလိုက်ရင် ကျနော်တို့ တော်တော်များများဟာ ဒီဝေါဟာရကို နားယဉ်ကြပါတယ်… ပတ်ဝန်းကျင်ကနေ ခဏခဏကြားဖူးနေလို့ပါပဲ။ ဘာမှန်းသာ သေချာမသိတာပါ။
 
 
ဆရာဝန်က ပုံထဲမှာ မြင်ရတဲ့ လည်ပင်းရိုးရဲ့ အဆစ်တစ်ခုနဲ့ တစ်ခုကြားမှာ Disc (မြန်မာလို ကျနော်မခေါ်တတ်ပါ) အဲဒီ Disc တွေဟာကုန်သွားပြီး ကြားခံမရှိတော့လို့ အရိုးဆစ်တွေဟာ တစ်ခုပေါ်တစ်ခုဖိလာပြီး ငိုက်ဆိုက်လာရချင်းဖြစ်တယ်လို့ ရှင်းပြပါတယ်။ ပုံမှန်ဆိုရင် ဒီရောဂါဟာ အသက်ကြီးပိုင်း လူကြီးတွေမှာမှ ဖြစ်လေ့ဖြစ်ထရှိပါတယ် (လူကြီးတိုင်းလည်း မဟုတ်ပါ)။ ကျနော် အသက် ၃၂ မှာဖြစ်တာဟာ အရမ်းစောပါတယ်လို့ ဆရာဝန်က ပြောပါတယ်။ အဲဒီလို အရိုးဆစ်တွေ ငိုက်ဆိုက်လာတဲ့အချိန်မှာ ဆက်နွယ်နေတဲ့ ကြွက်သားတွေ၊ အကြောတွေဟာ တန်ပြန်ပြန်ဆွဲရလို့ နာကျင်လာရချင်းဖြစ်တယ်လို့ သေချာရှင်းပြပါတယ်။ ဒီထက်ပိုဆိုးလာလို့ လက်တွေမှာပါ နာကျင်မှုတွေခံစားလာရမယ်ဆိုရင်တော့ ခွဲစိတ်ကုသမှရမယ်လို့ ရှင်းပြပါတယ်။ ဒါကတော့ အဆိုးဆုံး အခြေအနေပါ။
 
နဂိုအခြေအနေကို ဘယ်တော့မှ ပြန်မရောက်နိုင်ပဲ ဒီထက်မဆိုးအောင် ဆက်ထိန်းနိုင်ဖို့ပဲလုပ်ဆောင်လို့ရတော့မယ်လို့ပြောပါတယ်။ ခန္ဓာကိုယ်ကို ပုံမှန်ထက် မြန်မြန်အိုမင်းရင့်ရောစေနိုင်တဲ့ ကျနော် ၁၆ နှစ်လောက် စွဲစွဲမြဲမြဲသောက်နေတဲ့ ဆေးလိပ်ကို အရင်ဖြတ်ခိုင်းပါတယ်။ ကျနော် နိစ္စဓူဝ Computer ရှေ့မှာ ထိုင်ရင်ဖြစ်ဖြစ်… စာအုပ် (သို့) ဖုန်း သုံးရင်ဖြစ်ဖြစ် ဇက်ကို အောက်သို့ ငိုက်ဆိုက်ပြီး မျက်လုံး အားစိုက်တာတွေကို အတတ်နိုင်ဆုံးဂရုပြုပြီးရှောင်ကြဉ်ခိုင်းပါတယ်။ ခရီးသွားတာများတဲ့ ကျနော့်ကို ကား (သို့) လေယဉ်ပေါ်တွင် ဖြစ်သလို ဇက်အနေအထားကို ထားပြီး မအိပ်ဖို့။
 
 
ဇက်ကို လုံးဝ နှိပ်နယ်ချင်းမပြုဖို့… နှိပ်နယ်ချင်းဟာ အဲဒီချိန်တောအတွင်းသာ သက်သာစေပြီး အနာကိုပိုဆိုးစေတယ်လို့ သေချာရှင်းပြပြီး အနာသက်သာစေရန် သောက်ဆေးနဲ့ လိမ်းဆေးပေးလိုက်ပါတယ်။ အရေးကြီးဆုံးကတော့ လည်ပင်းကို ပုံမှန်လေ့ကျင့်ခန်းလုပ်ပြီး ဂရုတစိုက်နေဖို့ မှာလိုက်ပါတယ်။ ကျနော်အခု ရန်ကုန်က ဆေးရုံတစ်ခုနဲ့ ချိတ်ဆက်နေပြီး ပုံမှန်လုပ်ရမယ့် လေ့ကျင့်ခန်းနဲ့ ဆောင်ရန် ရှောင်ရန်တွေကို Physiotherapist များမှအနီးကတ်လေ့လာပြီး နောင်တွင် ပြန်လည်ဝေမျှသွားပါမယ်။
 
 
ကျနော်ဟာ ဆရာဝန်တစ်ယောက် မဟုတ်တဲ့အတွက် အခုလို ပြန်လည်မျှဝေ ရှင်းပြချိန်တွေ အမှားအယွင်း (သို့) အချက်အလက်များ မလုံလောက်ခဲ့ရင် အကောင့်ထဲမှ နားလည်တတ်ကျွမ်းသော ဆရာဝန်သူငယ်ချင်းများမှ ဖြည်စွက်ပေးနိုင်ဖို့ အကူအညီတောင်းခံပါတယ်။ ကျီးပေါင်းရောဂါသည်များ အချိန်မလွန်ခင် ဝေဒနာကိုမြန်မြန်ဆန်ဆန် ကုသနိုင်ရန် စေတနာဖြင့်သာပြန်လည် ဝေမျှခြင်းဖြစ်ပါတယ်။ အားလုံးကျန်းမာပါစေလို့လဲ ဆုတောင်းပေးပါတယ်။ သူငယ်ချင်းများ ပြန်လည် Share နိုင်ပါတယ်။ " ဟုဆိုပြီး သူ၏ Facebook ပေါ်တွင် ရေးသားဖော်ပြထားပါသည် ။
 
Source : Kyaw Phyo Tun (Ah Boy)

20 Aug 2018     1,591 Views




RELATED

Most Popular of Movie Stars - Celebrity

Most Popular of NEWS