BEC-TERO TV

မလေးရှားလေယာဉ် MH370 ပျက်ကျတဲ့နေရာ အတိအကျသိသူပေါ်ထွက်လာ

17 Jan 2019     1,623 Views


လွန်ခဲ့သော ၅ နှစ် ၂၀၁၄ ခုနှစ်က ထူးဆန်းစွာပျောက်ဆုံးသွားခဲ့သည့် မလေးရှားလေးကြောင်းလိုင်း MH370 ပျက်ကျခဲ့သည်ကို ကိုယ်တိုင်ကိုယ်ကျ တွေ့မြင်ခဲ့ရပြီး နေရာအတိအကျမှတ်ထားခဲ့သူတစ်ဦး ပေါ်ထွက်လာခဲ့တာကြောင့် မလေးရှားအာဏာပိုင်များနဲ့ ပြည်သူများအားလုံး လှုပ်လှုပ်ရှားဖြစ်သွားကြပါတယ်။
 
 
လူပေါင်း ၂၃၉ ဦး တင်ဆောင်ပြီး ပေကျင်းနဲ့ ကွာလာလမ်ပူပြေးဆွဲတဲ့ မလေးရှားလေကြောင်းလိုင်းဟာ ၂၀၁၄ ခုနှစ် မတ်လ ၈ ရက်နေ့က ပျောက်ဆုံးခဲ့ပြီး တစ်ကမ္ဘာလုံးက ဝိုင်းဝန်းရှာဖွေကြပေမယ့် မည်သည့်အစအနမျှ မပေါ်ခဲ့တာကြောင့် ၄ နှစ်ကျော်ကြာပြီးတဲ့အခါ ရှာဖွေမှုတွေကို မလေးရှားအစိုးရ လက်လျော့ပိတ်သိမ်းခဲ့ပါတယ်။ 
လေယာဉ်ပေါ်ပါသွားခဲ့တဲ့ လူတွေရဲ့ မိသားစုတွေကတော့ အဖြူအမဲ သဲသဲကွဲကွဲ မသိရသေးတဲ့အတွက် မရေရာတဲ့မျှော်လင့်ချက်တွေ ရှိနေကြဆဲဖြစ်ပါတယ်။ မလေးရားလေယာဉ် MH370 ပျောက်ဆုံးမှုဟာ ကမ္ဘာ့လေကြောင်းရာဇဝင်သမိုင်းမှာတော့ အထူးခြားဆုံး လျှိုဝှက်ဆန်းကြယ်ဖြစ်ရပ်ကြီးအဖြစ် ရှိနေဆဲဖြစ်ပါတယ်။
 
 
အခုတော့ အင်ဒိုနီးရှားနိုင်ငံမှ အသက် ၄၂ နှစ်အရွယ် ငါးဖမ်းလုပ်သား “Rusli Khusmin” ဆိုသူက MH370 ပျက်ကျခဲ့တာကို ကိုယ်တိုင်တွေ့မြင်ခဲ့ရပြီး နေရာအတိအကျကို GPS စက်နဲ့ မှတ်ထားခဲ့ကြောင်း သတင်းပို့လာခဲ့ပါတယ်။ 
 
မလေးရှားအာဏာပိုင်များက “Rusli Khusmin” ကို အင်ဒိုနီးရှားကနေ ဖိတ်ကြားပြီး မလေးရှားနိုင်ငံ ဆူးဘန်းဂျာရာမှာ သတင်းစာရှင်းလင်းမှု ပြုလုပ်ခဲ့ပါတယ်။ သူနဲ့အတူ ယူဆောင်လာတဲ့ GPS စက်ကို မလေးရှား အန်ဂျီအိုအဖွဲ့တစ်ခုဖြစ်တဲ့ CASSA ကို အပ်နှံခဲ့ပါတယ်။
“Rusli Khusmin” ၏ အဆိုအရ သူနှင့်အတူ လုပ်ဖော်ကိုင်ဖက်များ ငါးဖမ်းနေကြစဉ် လေယာဉ်ဟာ သူတို့ရေပြင်ထဲကို ဝင်လာခဲ့တာကို GPS မှာ တွေ့ခဲ့ရပါတယ်။ အဲဒီအချိန်မှာ ဘာဆူညံသံမှ မကြားရပဲ မီးခိုးအမဲတွေ အူထွက်နေတဲ့ လေယာဉ်ကြီးဟာ စွန်ပျက်ကျသလို ဘယ်ညာခါယမ်းပြီး ရေထဲကို ပျက်ကျခဲ့တာ မြင်တွေ့ခဲ့ရတယ်လို့ ဆိုပါတယ်။ အဲဒီအချိန်မှာ ပတ်ဝန်းကျင်တစ်ခုလုံး လောင်စာဆီလောင်ကျွမ်းတဲ့ ညှော်နဲ့တွေနဲ့ ပြည့်နှက်သွားတယ်လို့ ဖြည့်စွက်ပြောကြားခဲ့ပါတယ်။
 
 
GPS ပါအချက်အလက်အရ MH370 လေယာဉ်ဟာ အင်ဒိုနီးရှားနဲ့ မလေးရှား နှစ်နိုင်ငံကြားက ဆူမားထရားပင်လယ်ထဲကို ညွှန်ပြနေပါတယ်။ “Rusli Khusmin” ဟာ အခုလို ၅ နှစ်ကြာတဲ့အထိ လေယာဉ်ပျက်ကျမှုအကြောင်းကို ဘာကြောင့် သတင်းမပေးခဲ့တာလည်းဆိုတာကိုတော့ ပြောပြခြင်းမရှိခဲ့ပါဘူး။
 
 
CASSA အဖွဲ့က စုံစမ်းလို့ရရှိတဲ့အချက်လက်တွေကို ဝန်ကြီးချုပ် မဟာသီယာ ထံ တင်ပြထားပြီဖြစ်ကြောင်း အဖွဲ့ရဲ့ ဥက္ကဋ္ဌဖြစ်သူ Dr Jacob George က ဆိုပါတယ်။ မကြာမီမှာ အဆိုပါနေရာကို ရှာဖွေရေးအဖွဲ့တွေ စေလွှတ်တော့မယ်လို့ ခန့်မှန်းမိပါတယ်။

17 Jan 2019     1,623 Views




RELATED

Most Popular of International News

Most Popular of NEWS