BEC-TERO TV

သီချင်းဆိုပြိုင်ပွဲတွေမှာ ဒီတစ်သက် မိန်းကလေးတွေ WINNER ဖြစ်နိုင်ပါဦးမလား..?

14 Jun 2019     2,913 Views


လက်ရှိမြန်မာနိုင်ငံ ရုပ်သံလိုင်းတွေဖြစ်တဲ့ MRTV 4, SkyNet တို့က နိုင်ငံတကာမှာ အောင်မြင်နေတဲ့သီချင်းဆိုပြိုင်ပွဲတွေကို လိုင်စင်တွေဝယ်ယူပြီး ထုတ်လွှင့်ရိုက်ကူး တင်ဆက်နေကြပါတယ်။
နိုင်ငံတကာ ပြိုင်ပွဲစည်းမျဉ်းများနဲ့အညီ မြန်မာမှုပြုကာ တင်ဆက်နေကြတဲ့ Myanmar Idol, The Voice Myanmar, X Factor, Galaxy Star စတဲ့ ပြိုင်ပွဲတွေ အားလုံးမှာ လက်ရှိအချိန်ထိ အမျိုးသမီးပြိုင်ပွဲဝင်တွေ တစ်ဦးမှ WINNER ဖြစ်ခွင့်မရကြသေးတာ အားလုံးအသိပဲဖြစ်ပါတယ်။
 
အမျိုးသမီးတွေ WINNER ဆုမရကြတာဟာ အမျိုးသားပြိုင်ပွဲဝင်တွေက ပိုတော်လို့လား ဆိုတဲ့ အငြင်းပွားစရာတွေ ရှိလာပါတယ်။ (တစ်ကယ်တော့ ဒီလိုမဟုတ်ပါဘူး)
မြန်မာနိုင်ငံက အဆိုပြိုင်ပွဲတွေရဲ့ သမိုင်းကြောင်းကို ပြန်ကြည့်မယ်ဆိုရင် မြန်မာ့အသံနဲ့ ရုပ်မြင်သံကြားက စတင်လိုက်တဲ့ “ဆိုကြမယ် ပျော်ကြမယ်” ဆိုတဲ့ အစီစဉ်ကနေ အစချီကြရမှာဖြစ်ပါတယ်။ 
သီချင်းဆို ပြိုင်ပွဲငယ်ပေါင်းများစွာရှိခဲ့ကြတဲ့အထဲက ရုပ်သံကနေ ထုတ်လွှင့်ခဲ့ပြီး တစ်နိုင်ငံလုံး အတိုင်းအတာနဲ့ အောင်မြင်ခဲ့တဲ့ အစီစဉ်တွေကတော့ “ဆိုကြမယ် ပျော်ကြမယ်” ၊ “Melody World” ၊ “အိမ်မက်ဆုံရာ” “အိမ်က်ဆုံရာ(ရာသက်ပန်)”တို့ ဖြစ်ပါတယ်။
 
ဒီပြိုင်ပွဲတွေ အားလုံးမှာ သက်ဆိုင်ရာ ဂီတနယ်ပယ်အသီးသီးက ပညာရှင်တွေက ဒိုင်လူကြီးမင်းများအဖြစ် ဆောင်ရွက်ခဲ့ကြပါတယ်။ ဒီကာလတွေမှာ အရေအတွက်အားဖြင့် နည်းပေမယ့် အမျိုးသမီး ပြိုင်ပွဲဝင်တွေ WINNER ဆု ထိုက်ထိုက်တန်တန် ရခဲ့ဖူးကြပါတယ်။ (မို့မို့ဇော်ဝင်း၊ နီနီခင်ဇော်၊ လုလု) တို့က လူသိများ ထင်ရှားတဲ့ ပြိုင်ပွဲဝင်တွေ ဖြစ်ကြပါတယ်။ 
(Winner မရခဲ့ပေမယ့် နာမည်ကျော်အဆိုတော် ဖြစ်နေသူတွေကို မဖော်ပြတော့ပါ)
 
လက်ရှိ ပြိုင်နေကြတဲ့ အဆိုပြိုင်ပွဲတွေကတော့ ပရိသတ်တွေရဲ့ Voting စနစ်ပါ ထည့်သွင်းလာတဲ့အတွက် ပရိသတ်တွေရဲ့ မဲကပါ ပြိုင်ပွဲဝင်တွေရဲ့ ရလာဒ်ကို သက်ရောက်စေပါတယ်။ ခေတ်သစ် သီချင်းဆိုပြိုင်ပွဲတွေရဲ့ သက်တမ်းဟာ ၅ နှစ်ကျော် ၆ နှစ်ရှိလာခဲ့ပြီး Season 4 လောက်ထိ အမြင့်ဆုံး ရောက်လာတဲ့အခြေအနေမှာတောင် အမျိုးသမီး ပြိုင်ပွဲဝင်တွေ အရည်အချင်းတန်းတူ ရှိပါလျှက်နဲ့ WINNER ဖြစ်မလာသေးတာကတော့ အမျိုးသမီးထုကြီးအတွက် စိတ်မကောင်းစရာပါ။
 
Myanmar Idol Winners
 
၁။ စောလားထော်ဝါး (Season 1)
၂။ သားငယ် (Season 2)
၃။ ဖြိုးမြတ်အောင် (Season 3) တို့ ဖြစ်ပါတယ်။
 
The X Factor Myanmar Winners
 
၁။ ထွန်းနောင်ဆင့် (Season 1)
၂။ David Derrick (Season 2)
၃။ ဟိန်းထိုက် (Season 3)
 
Galaxy Star
 
၁။ နေမင်းအိမ်
 
The Voice Myanmar 
 
၁။ ငွေစိုး (Season 1)
 
နောက်တစ်ခါ လာပြန်ပါပြီ လက်ရှိ ပူပူနွေးနွေးမှာ ယှဉ်ပြိုင်နေတဲ့ The Voice Myanmar Season 2 ကလည်း လာမယ့် တနင်္ဂနွေနေ့ ဇွန်လ ၁၆ ရက်နေ့ဆိုရင် Winner တစ်ဦး ပေါ်ထွက်လာတော့မှာဖြစ်ပါတယ်။
 
Finalist လေးဦးမှာ အမျိုးသားနှစ်ဦး (Paul Austin ၊ Novem Htoo) နဲ့ အမျိုးသမီးနှစ်ဦး (Melody Khong ၊ Hazel) တို့ ရှိကြလို့ ၅၀% စီ Winner ဖြစ်နိုင်ချေရှိနေပါတယ်။
ဒါပေမယ့် အွန်လိုင်းပရိသတ်တွေရဲ့ ခန့်မှန်း စာရင်းမှာတော့ “Paul Austin” နဲ့ “Novem Htoo” တို့က ဦးဆောင်နေတာကို တွေ့ရပါတယ်။
 
 
“Hazel” နဲ့ “Melody Khong” နှစ်ဦးစလုံးဟာလည်း အမျိုးသားပြိုင်ပွဲဝင် နှစ်ယောက်ထက် အရည်အချင်းမနိမ့်တာကို ပရိသတ်တွေ ကိုယ်တိုင် အကြိမ်ကြိမ်တွေ့မြင်ခဲ့ရပြီ ဖြစ်ပါတယ်။
လက်ရှိပြိုင်ပွဲဝင် ၄ ယောက်လုံးမှာ ဘယ်သူပဲ Winner ဖြစ်ဖြစ် ပရိသတ်က လက်ခံပေးနိုင်တဲ့ အနေအထားဖြစ်ပါတယ်။
ပရိသတ်တွေကိုယ်တိုင် Vote ပေးနိုင်တဲ့ လက်ထက် အဆိုပြိုင်ပွဲတွေကျမှ မိန်းကလေးတွေ ဒီတစ်သက် Winner ဖြစ်မလာနိုင်တော့ဘူးဆိုတဲ့ ကောလဟာလ တွေကလည်း ယုံကြည်ချက်တစ်ခုလို ခိုင်မာလာနေကြပါတယ်။
 
ဒီတော့ ပရိသတ်တွေကိုယ်တိုင်က မိန်းကလေးတွေကို Winner ဖြစ်စေချင်တဲ့ဆန္ဒက ပိုများသလား၊ ဒါမှမဟုတ် ယောကျာ်းလေးတွေကိုပဲ Winner ဖြစ်စေချင်တဲ့ စိတ်က ပိုအလေးသာနေသလားဆိုတာကတော့ (တော်တာကတော့ ၄ ယောက်လုံး တော်တယ်နော်) ပရိသတ်တွေရဲ့ ကိုယ်ပိုင်ဆုံးဖြတ်ချက်တွေပေါ်မှာပဲ မူတည်နေပါတယ်။
 
ဆန္ဒသာရှိပြီး Vote ပေးဖို့ တုံးဆိုင်းနေရင်လည်း အဖြေကထက်တူကျနိုင်မှာ မဟုတ်ပါဘူး။ ဒါကြောင့်မို့ အဖြကိုတော့ ဒီတစ်ပတ် တနင်္ဂနွေနေ့ည ၉ နာရီ MRTV 4 ရုပ်သံလိုင်းကနေ စောင့်ကြည့်ကြရ ဦးမှာဖြစ်ပါတယ်။ 

 


14 Jun 2019     2,913 Views




RELATED

Most Popular of Movie Stars - Celebrity

Most Popular of NEWS