BEC-TERO TV

တက္ကသိုလ်ကျောင်းသားတစ်ဦး “တို့ဆေး” မိပြီး ငါးဖမ်းစက်လှေပေါ် ရောင်းစားခံရ

22 Nov 2019     9,240 Views


“တို့ဆေး” ဆိုတာကို လူတိုင်းကြားဖူးကြမှာပါ၊ ဒါပေမယ့် ကိုယ်တိုင်မကြုံဘူးရင်တော့ ယုံဖို့ခက်ခဲပါလိမ့်မယ်။ ပြီးခဲ့တဲ့ရက်ပိုင်းအတွင်းကပဲ နှစ်လကြာ ပျောက်ဆုံးနေခဲ့သောဒဂုံတက္ကသိုလ်က သမိုးမေဂျာနောက်ဆုံးနှစ် ကျောင်းသားတစ်ဦးကို မိဘဆွေမျိုးများက ဖျာပုံမြို့နယ်အတွင်းရှိ ငါးဖျက်ကျေးရွာ ငါးဒိုင်တွင် ငွေ ၇ သိန်းနှင့် သွားပြန်ရွေးရသော ဖြစ်စဉ်တစ်ခုဖြစ်ပွားခဲ့သည်။

အောက်တိုဘာလ ၂ ရက်နေ့ နေ့လယ်တွင် ဒဂုံတက္ကသိုလ် သမိုင်းဌာန နောက်ဆုံးနှစ်ကျောင်းသား မြတ်သူရထွန်း သည် နေအိမ်မှ ရန်ကုန်ထဲသို့ သွားခဲ့ပြီး အဆက်အသွယ် ပြတ်တောက်သွားခဲ့ပါသည်။

လက်ကိုင်ဖုန်း ပိတ်ထားပြီး Facebook Messenger များမှ အဆက်အသွယ်မရရှိခဲ့ပါ ။ ထိုအချိန်မှစ၍ မိသားစုက ရဲစခန်းများတွင် အမူဖွင့်၍ ကြိုးစားရှာဖွေခဲ့သော်လည်း အရာမထင်ခဲ့ပါ။

မြတ်သူရထွန်း ပျောက်ဆုံးခဲ့ပြီး တလခွဲကျော်အကြာတွင် မိသားစု၏ကြိုးပမ်းမူကြောင့် မြတ်သူရထွန်းကို အသက်ရှင်လျှက် ပြန်လည်ကယ်တင်နိုင်ခဲ့ပါသည် ။

မြတ်သူရထွန်းကို ဖျာပုံမြို့မှ ၂ နာရီခန့် သွားရသော ငဖျက်ရွာရှိ သင်ဇာထွန်း အမည်ရှိ ငါးဒိုင် တွင် ရောက်ရှိနေသည်ဟု သိရသည် ။ ထိုငါးဒိုင်မှ ပင်လယ်အတွင်းသို့ ၁၂ နာရီခန့်သွားရသောနေရာတွင် ပင်လယ်အတွင်း ငါးဖမ်းခိုင်းသောနေရာတွင် ငါးဖမ်းလုပ်ငန်း လုပ်ကိုင်ခိုင်းထားခဲ့သည် ။

မြတ်သူရထွန်း၏ပြောကြားချက်အရ -
သူပန်းဆိုးတန်းတံတားအနီးထိုင်နေစဉ် အမျိုးသမီးတဦးက သူ့အား တို့ဆေးဖြင့်တို့၍ ခေါ်ဆောင်သွားခဲ့ကြောင်း၊ ‌ခေါ်သွားသည့်နေရာမှာ ဒလမြို့ဖြစ်ပြီး ထိုနေ့ညက ဒလမြို့ရှိ အဆိုပါအမျိုးသမီး၏ နေအိမ်တွင် အိပ်ခဲ့ရကြောင်း၊ ထို့နောက် အမျိုးသမီး၃ ယောက်ကသူ့အား ဖျာပုံမြို့နယ် မှ ၂ နာရီခန့်ကားစီးရသော ငဖျက်ကျေးရွာရှိ ငါးဒိုင်တွင် ငွေ ၇ သိန်းဖြင့် ရောင်းစားခဲ့ကြောင်း၊ ထိုမှတဆင့် ပင်လယ်သို့ပို့ပြီး တနေ့လျှင် မနက် ၆ နာရီမှ နောက်နေ့မနက် ၃ နာရီထိ အတင်းအကျပ်ခိုင်းစေကြောင်း၊ အလုပ်ကိုသေချာမလုပ်လျင် ရိုက်နှက်ခိုင်းစေကြောင်း ၊ အလုပ်ဦးစီးသူများက "ခိုင်း‌မကောင်းရင် ပင်လယ်ထဲ ကန်ချမှာ ၊ ဒီမှာ ကန်ချလိုက်လို့ ဘယ်သူမှမသိဘူး " ဟု ပြောကြောင်း ၊ မြတ်သူရထွန်းမှာ ဒဏ်ရာများစွာရရှိနေသည့်အတွက် နောက် ၃ ရက်နေလို့ ‌အလုပ်မလုပ်နိင်ရင် ပင်လယ်ထဲ ကန်ချမည်ဟု ခြိမ်းခြောက်ကြောင်း သူ၏ဖြစ်စဉ်ကို စကားပြောနိုင်သလောက် ပြောကြားခဲ့သည် ။

မိသားစုမှ အဆိုပါ ငါးဒိုင်သို့ရောက်ရှိခဲ့ရာတွင် "ပွဲစား ယူသွားသည့် ၇ သိန်းကို ပြန်ပေးရမည် ၊ မည်သည့်နေရာမှ တိုင်ခြင်းမပြုရ" ဟုပြောဆိုပြီး မိသားစုက ငွေ၇သိန်း ပေးလိုက်မှ ပြန်လည်ထည့်ပေးလိုက်သည် ။

သူနှင့် အတူ ရောင်းစားခံထားရသည်ဟု ယူဆရသူ ၂ ဦး ပင်လယ်တွင် ကျန်ခဲ့သေးသည်ဟုသိရသည် ။

မြတ်သူရထွန်းကို ယခုအခါရန်ကုန်သို့ခေါ်ဆောင်ပြီး မေဓါဝီဆေးရုံတွင် ပို့ဆောင်ထားပါသည် ။ လက်ကျိုးခြင်း လမ်းမလျှောက်နိုင်ခြင်း ထိုးကြိတ်ခံထားရသော ဒဏ်ရာများ ခန္ဓာကိုယ်အနှံ့တွေ့ရှိရပါသည် ။

ယခုအခါ သက်ဆိုင်ရာသို့တိုင်တန်းထားပြီး မြန်မာနိုင်ငံရဲတပ်ဖွဲ့နှင့် တာဝန်ရှိသူများအနေဖြင့် မဆိုင်းမတွဖြင့် (၁)ပင်လယ်တွင်ကျန်ခဲ့သောသူများကို ကယ်ဆယ်ရန် (၂)ပြစ်မူကျူးလွန်သူများကို အမြန်ဆုံးဖမ်းဆီးအရေးယူရန် လုပ်ဆောင်ဖို့ လေးလေးနက်နက်တိုက်တွန်းလိုက်ပါသည် ။

မိသားစုထံမေးမြန်းနိုင်ရန်ဖုန်း - 09 772068318 ဟု Future The DAGON လူမှုကွန်ယက် စာမျက်နှာတွင် ဖော်ပြထားပြီး သက်ဆိုင်ရာမှ တရားမဝင် လူကုန်ကူးမှုများကို ဖော်ထုတ်ပြီး ဒုက္ခရောက်နေသူများအား ကူညီဆောင်ရွက်ပေးနိုင်စေရန် ဖော်ပြအပ်ပါသည်။


22 Nov 2019     9,240 Views




RELATED

Most Popular of Myanmar News

Most Popular of NEWS