BEC-TERO TV

အရက်နာကျတာကို ဘယ်လိုကုစားရမလဲ.. ?

16 Mar 2020     5,249 Views


အရက်နာကျခြင်းကို ရာနှုန်းပြည့်သက်သာပျောက်ကင်းစေတဲ့ ဆေးဆိုသည်မှာ ဘယ်သုတေသနလေ့လာချက်မှာမှ အတိ အကျဖော်ပြထားတာ မရှိပါဘူး။ ဒါပေမယ့် အရက်နာကျခြင်းကို သက်သာအောင်အသုံးပြုနိုင်တဲ့ ရိုးရှင်းလွယ်ကူတဲ့ နည်းလမ်းလေးတွေကတော့ ရှိပါတယ်။ ဒါတွေကတော့..


• ဆီးများများသွားအောင် ရေကို မကြာခဏ များများသောက်ပေးပါ။ ခန္ဓာကိုယ်ထဲမှာ ကျန်ရစ်နေတဲ့ Alcohol တွေက ဆီးကနေတစ်ဆင့် စွန့်ထုတ်သွားပါတယ်။ လက်ဖက်သည်လည်း ဆီးသွားစေတဲ့ ဂုဏ်သတ္တိအနည်းငယ်ရှိနေတာမို့ တချို့တွေက လက်ဖက်ရည် (ရေနွေးကြမ်း) ကို သောက်ပေးကြလေ့ရှိပါတယ်။
• အစာချေလွယ်တဲ့ ဆန်ပြုတ်လိုမျိုး အစာပျော့ပျော့တွေကို စားပေးပါ။

• အရက်သောက်ခြင်းတွင် ဗီတာမင်နှင့်သတ္တုဓါတ်များ ဆုံးရှုံးသွားနိုင်၍ မောပန်းနွမ်းနယ်တာတွေ ဖြစ်စေနိုင် တတ်သောကြောင့် ချိုချဉ်တဲ့အရသာရှိတဲ့ ဟင်းသီးဟင်းရွက်နှင့် အသီးအနှံဖျော်ရည်များ သောက်သုံးခြင်း (သို့) ရေထဲစိမ်ပြီးသောက်ရတဲ့ ဗီတာမင်ဆေးပြား(ရေဆူဆေးပြား)တွေလိုမျိုးလည်း သောက်သုံးပေးလို့ ရပါတယ်။


• မူးဝေအော့အန်တဲ့လူတွေအတွက်ကတော့ ဂျင်းဖျော်ရည်၊ မင့်တီး (Mint tea) သောက်သုံးခြင်းသည်လည်း သက်သာစေပါတယ်။
• ဗီတာမင်ဖြည့်စွက်စာများဖြစ်တဲ့ ဗီတာမင်ဘီများ၊ ဗီတာမင်စီ၊ မဂ္ဂနီစီယမ်၊ အမိုင်နိုအက်ဆစ်၊ အယ်လ်-စစ္စတီအင်း (L-Cysteine) အစရှိတာ သောက်သုံးခြင်းသည်လည်း အထောက်အကူပြုပါတယ်။
• ခေါင်းတွေကိုက်ပြီး ကိုယ်လည်းနည်းနည်းပူတယ်ဆိုရင်တော့ စတီးရွိုက်ဆေးအုပ်စုများမဟုတ်တဲ့ အကိုက်အခဲ ပျောက်ဆေးကို သောက်ပေးနိုင်ပါတယ်။ သို့သော် အခံရောဂါတစ်ခုခုရှိနေရင် (သို့) ဆေးမတည့်တာတွေရှိတယ်ဆိုရင် မသောက်ခင် တတ်ကျွမ်းနားလည်တဲ့လူ (သို့) ဆရာဝန်နဲ့တိုင်ပင်ပြီးမှသောက်တာက ပိုကောင်းပါတယ်။


• ကော်ဖီက အရက်နာကျခြင်းကို အထောက်အကူ သိပ်တော့မဖြစ်ပေမယ့် ခန္ဓာကိုယ်တက်ကြွစေပါတယ်။ တကယ်လို့ သင်က အိပ်စက်အနားယူမှု လုံလုံလောက်လောက်မရှိဘဲ အလုပ်ဆက်လုပ်နေမယ်ဆိုရင်တော့ ကဖင်းဓါတ်ရဲ့အစွမ်းလေးပြယ်သွားတာနဲ့ မောပန်းနွမ်းနယ်မှုတွေ ပို၍ဖြစ်သွားစေနိုင်ပါတယ်။


ဆောင်ရန်ရှောင်ရန်အချက်များ


• အရက်မသောက်ခင်မှာ ဗိုက်ကိုအစာမရှိဘဲ မနေပါနဲ့၊ ပေါ့ပေါ့ပါးပါး သွားရည်စာတစ်ခုခုဖြင့် အစာခံပေးပါ။ ဘာ ကြောင့်လဲဆိုတော့ ဗိုက်အစာမရှိရင် မူးလွယ်ပြီး သွေးတွင်းသကြားဓါတ် ကျဆင်းနိုင်ပါတယ်။ ဒါမှမဟုတ်လည်း ဗိုက်ထဲအစာလေးဝင်အောင် အမြည်းလေးနဲ့သောက်ပါ။
• အရက်ကို တစ်ခါတည်း အများကြီး မသောက်ပါနှင့်၊ အရက်ချည်းပဲသက်သက် မသောက်ပါနှင့်၊ တစ်ခါ သောက်ရင် တခြားသောအရည်များနဲ့ရောပြီး သောက်ပေးပါ။
• အရက်သောက်တဲ့အခါမှာ ဆီးမကြာခဏသွားခြင်းမှ ဆုံးရှုံးသွားတဲ့ရေကို အစားပြန်ထိုးရန်နှင့် သွေးထဲက Alcohol ပမာဏ သိပ်သည်းဆအရမ်းမများသွားအောင်လည်း အချိန်တစ်နာရီခြားတိုင်းမှာ ရေ ၁-၂ ခွက်ခန့် သောက်ပေးပါ။
• အရက်မသောက်ခင် ဗီတာမင်ပေါင်းစုများ (သို့) အယ်လ်-စစ္စတီအင်း (L-Cysteine) အမိုင်နိုအက်ဆစ် သောက်ပေး ခြင်းသည်လည်း Alcohol ကြောင့် အသည်းရောင်ရမ်းခြင်းကနေ ကာကွယ်ရန်အထောက်အကူပြုပါတယ်။


အရက်အလွန်အကျွံသောက်ခြင်းသည် ဦးနှောက်ကိုထိခိုက်စေနိုင်သည့်အပြင် အသည်းကိုလည်း များစွာထိခိုက်မှုဖြစ်စေတတ်ပါတယ်။ အသည်းမှာ အဆီတွေစုလာနိုင်ပြီး အသည်းအဆီဖုံးခြင်းကိုဖြစ်စေနိုင်ရုံသာမက အသည်းအား အဆိပ်အတောက်တွေ ပိုဖြစ်စေနိုင်ပါတယ်။ အဆိုးဆုံးကတော့ အသည်းခြောက်ရောဂါ ဖြစ်နိုင်ပြီးတော့ အသက်အန္တရာယ်ကိုပါထိခိုက်စေနိုင်ပါတယ်။ သောက်မယ်ဆိုရင်လည်း သတိဝိရိယလေးနဲ့ သင့်တင့်မျှတရုံသာ ချင့်ချိန်ပြီးသောက်ပါ။ လုံးဝမသောက်တာကတော့ အကောင်းဆုံးပါလို့ အကြံပြုချင်ပါတယ်။

(ပိုပိုလေး)


16 Mar 2020     5,249 Views




RELATED

Most Popular of Health Fix

Most Popular of Life Style