ဖေ့စ်ဘွတ်ခ် လိုက်ခ်အတွက် ဖခင်က ခုနှစ်နှစ်အရွယ် သမီးကိုသတ်

ထိုင်းနိုင်ငံ ဘန်ကောက် လိပ်ခလောင်းထဝီဖတ်ထနားနယ်မြေထဲမှာ ပြီးခဲ့တဲ့ စက်တင်ဘာ ၅ ရက် ညနေပိုင်းက သားအဖနှစ်ယောက် ဖေ့စ်ဘွတ်ခ်လူမှုကွန်ရက်အသုံးပြုတာနဲ့ ပတ်သက်ပြီး ငြင်းခုံရန်ဖြစ်ရာကနေ ဖခင်က သမီးကို သတ်တဲ့အထိ ဖြစ်သွားတယ်လို့ တီအက်စ်နယူးစ် ထိုင်းသတင်းမှာ ဖော်ပြထားပါတယ်။

စက်တင်ဘာ ၅ ရက် ညနေ ၆ နာရီလောက်က ထဝီဖတ်ထနားနယ်မြေ အိမ်အမှတ် ၇၅၄/၅၄ မှာ လူသတ်မှုဖြစ်ပွားကြောင်း တိုင်တန်းချက်ရရှိတဲ့အတွက် တာဝန်ရှိသူတွေနဲ့အတူ သွားရောက်စစ်ဆေးရာ နေအိမ်အိပ်ခန်းတွင်းရှိ ခုတင်တလုံးပေါ်မှာ ဝါယာကြိုးနဲ့ လည်ပင်းညှစ်ခံရတဲ့ ဒဏ်ရာနဲ့ သေဆုံးနေ သူ အသက် ၇ နှစ်ရွယ် မိန်းကလေးအား တွေ့ရတယ်လို့ ကယ်ဆယ်ရေး ဝန်ထမ်းတဦးက သတင်းထောက်ကို ပြောပါတယ်။

သေဆုံးသူ မိန်းကလေးရဲ့မိခင် ပြောပြချက်အရ အခင်းမဖြစ်ခင်က သူမခင်ပွန်း နိုင်းဧကချိုင်း ဆဲန်မနီး နဲ့ သမီး ကျီဒါးဖွန်း ဆဲန်မနီးတို့ဟာ လက်ကိုင်ဖုန်းထဲက ဖေ့စ်ဘွတ်ခ်ကိစ္စနဲ့ အငြင်းပွားနေကြောင်း၊ နိုင်းဧကချိုင်းက သူ့ရဲ့ ဖေ့စ်ဘွတ်ခ်လိုက်ခ် အများဆုံး ၁၄၀ ကျော် ရထားပြီး လူကြည့်များတဲ့ ပရိုဖိုင်းလ်ဓာတ်ပုံကို သမီးဖြစ်သူက ဖျက်လိုက်တဲ့အတွက် စိတ်ဆိုးပြီး သားဖနှစ်ယောက် ဆယ်မိနစ်ခန့်ကြာ ရန်ဖြစ်နေခဲ့ကြောင်း၊ ခဏအကြာ သမီးရဲ့ အော်သံကြားလို့ အိပ်ခန်းထဲဝင်သွားရာမှာ သူ့ယောကျာ်းက အခန်းထဲက ထွက်လာပြီး ဆိုင်ကယ်နဲ့ အမြန်မောင်းထွက်သွားခဲ့ကြောင်း၊ သမီးကို ကြည့်လိုက်ရာမှာတော့ အသက်မရှိတော့ဘူးလို့ တာဝန်ရှိသူတွေကို ပြောပါတယ်။

လောလောဆယ် ရဲတပ်ဖွဲ့ဝင်တွေက နိုင်းဧကချိုင်း ထွက်ပြေးရာနောက်ကို ခြေရာခံလိုက်မိဖို့ လမ်းဘေးက စီစီကင်မရာတွေကို ပြန်လည်စစ်ဆေးနေတယ်လို့ သတင်းမှာ ဖော်ပြသွားပါတယ်။


သတင်းရင်းမြစ် - DVB