ရည်းစားနဲ့ချိန်းတွေ့တဲ့ ကျောင်းဆရာကို ရိုက်သတ်ခဲ့သူအား ဖမ်းဆီးရမိ

ရခိုင်ပြည်နယ် ကျောက်ဖြူမြို့တွင် မေလ ၂၆ ရက်နေ့ ညအချိန်တွင် အနောက်ကနေ အရိုက်ခံရပြီး ကျောင်းဆရာတစ်ဦး သေဆုံးခဲ့မှုတွင် သံသယရှိသူတရားခံအား ဖမ်းဆီးရမိထားကြောင်း သိရှိရသည်။

ဖြစ်စဉ်မှာ မေလ ၂၆ ရက်နေ့ည အချိန်တွင် မင်းပြားမြို့နယ် ဇီးကိုင်းသစ်ကျေရွာမှ မူလွန်ကျောင်းဆရာ ဦးဇော်သန်းအောင် (၂၄) နှစ်သည် ကျောက်ဖြူမြို့ ကျောက်ဖြူ ဂေါက်ကွင်း၌ ရပ်ကွက်ထဲမှ ရည်းစားဖြစ်သူနှင့် ချိန်းတွေ့နေစဉ် နောက်ကနေ မာကျောသည့် အရာတစ်ခုဖြင့် အရိုက်ခံရပြီး သေဆုံးခဲ့ရသည်။

အဆိုပါဖြစ်စဉ်ကို စုံစမ်းပြီးနောက် ကျောက်ဖြူ ရဲတပ်ဖွဲ့ဝင်များက တရားခံဟု သံသယရှိသော ကျော်ဇေယျ (၃၄) နှစ်အား လူသတ်မှုဖြစ်ပြီး ၅ နာရီအတွင်း ဖမ်းဆီးရမိခဲ့သည်။
ကျော်ဇေယျ မှာ ရန်ကုန်မြို့၊ အင်းစိန်- ဖေ့ါကန်မှ လှေနောက်လိုက်တစ်ဦးဖြစ်ပြီး ယခင်ကလည်း ဓါးထိုးမှုဖြင့် ထောင်ဒဏ် (၂၀)နှစ် ကျခံနေရာမှ လွတ်ငြိမ်းချမ်းသာခွင့်နဲ့ ပြန်လည် လွတ်မြောက်လာသူဖြစ်ကြောင်း အမှုစစ်တာဝန်ကျရဲအရာရှိ တစ်ဦးက ပြောကြားခဲ့သည်။

“ဒေသခံတွေရဲ့ ဝိုင်းဝန်း သတင်းပေးချက်အရ ကျောက်ဖြူမြို့မ ရဲစခန်းမှူးနဲ့ နယ်ထိန်း အဖွဲ့ဝင်တွေ က (၅)နာရီအတွင်း ဖမ်းဆီးရမိခဲ့ပါတယ်။ အခု အမှုကတော့ ပေါ်လာပါပြီ” ဟု ရဲအရာရှိကပြောကြားခဲ့သည်။

သတင်းရင်းမြစ် - Narinjara
ဓါတ်ပုံ - ကျော်မင်း