ညီအစ်ကိုနှစ်ဦးက အမျိုးသမီးတစ်ဦးကို တောင်ယာတဲထဲတွင် ဖမ်းချုပ်ပြီးအဓ္ဓမပြုကျင့်

ရှမ်းပြည်နယ်(အရှေ့ပိုင်း) တာချီလိတ်ခရိုင်၊ တာလေမြို့၊ နားယောင်းကျေးရွာအုပ်စု၊ မိုက်ဟိုဆန်ခါကျေးရွာ တောင်ယာတဲတွင် အသက်(၄၂)နှစ်အရွယ် အမျိုးသမီးကို ညီအစ်ကို(၂)ဦးက ဖမ်းဆီး အဓမ္မပြုကျင့်မှုတစ်ခုဖြစ်ပွားခဲ့သည်။

ဖြစ်စဉ်မှာ စက်တင်ဘာလ ၂၁ ရက်နေ့ နေ့လယ် ၁ နာရီဝန်းကျင်တွင် မိုက်ဟိုဆန်ခါကျေးရွာမှ အမျိုးသမီးတစ်ဦးသည် တောထဲတွင် မိဿလင် ရှာဖွေရန် သွားရောက်ခဲ့ပြီး ညနေ (၄)နာရီဝန်းကျင်တွင် ရွာထဲသို့ပြန်လာစဉ် တောင်ယာတဲတစ်ခု ရှေ့သို့အရောက်တွင် အားတု ဆိုသူထွက်လာပြီး တောင်ယာတဲတွင် ဝက် ကူမောင်းပေးရန်နှင့် ငရုတ်သီးများ ခူးသွားရန် ပြောသဖြင့် ကူညီပေးပြီး ငရုတ်သီးခူးခဲ့သည်။

အမျိုးသမီးက ငရုတ်သီးဝင်ခူးနေစဉ် အားတုက နောက်မှနေ၍ ဓါးဖြင့်ခြိမ်းခြောက်ကာ ကြိုးတုပ်ဖမ်းဆီးပြီးနောက် ၎င်း၏ အစ်ကိုဖြစ်သူထံ ဖုန်းဆက်လှမ်းခေါ်ခဲ့သည်။ ညနေ ၆ နာရီအချိန်ခန့်တွင် အစ်ကိုဖြစ်သူ လီယာ ရောက်လာပြီး နှစ်ယောက်ပေါင်းကာ အဓ္ဓမပြုကျင့်ခဲ့ကြကြောင်း သိရှိရသည်။

ထို့နောက် အမျိုးသမီးအား မည်သူ့ကိုမှ ပြန်မပြောရန် မှာကြားပြီး ညီအစ်ကိုနှစ်ယောက် အမျိုးသမီးကို ထားခဲ့ကာ တောင်ယာတဲမှ ထွက်သွားခဲ့ကြသည်။ အမျိုးသမီးက နေအိမ်သို့ ည ၇ နာရီကျော်တွင် ပြန်ရောက်ခဲ့ပြီးနောက် ခင်ပွန်းဖြစ်သူအား ပြောပြခဲ့ကြောင်း သိရှိရသည်။

စက်တင်ဘာလ ၂၃ ရက်နေ့တွင် တာလေနယ်မြေ ရဲစခန်းသို့ လာရောက်အမှုဖွင့်တိုင်းကြားခဲ့သဖြင့် လီယာ (၃၅ နှစ်) နှင့် အားတု (၂၃ နှစ်)တို့ကို တာလေနယ်မြေရဲစခန်းတွင် (ပ)၉/၂၀၁၈၊ ရာဇသတ်ကြီးပုဒ်မ ၃၅၄/၃၇၆/၁၁၄ ဖြင့် အမှုဖွင့်လှစ် စစ်ဆေးနေကြောင်း သိရသည်။

သတင်းရင်းမြစ် - တာချီလိတ်သတင်းအေဂျင်စီ