လိင်မှုကိစ္စအတွက် မြေးဖြစ်သူကို ရောင်းချခဲ့သည့် အဖွားအား ဖမ်းဆီး

-ထိုင်းနိုင်ငံတောင်ပိုင်း၊ ထရန်းခရိုင်ထဲမှာ အသက် ၆၆ နှစ်အရွယ် အဖွားအိုတဦးဟာ ဆယ်ကျော်သက်အရွယ် မြေးဖြစ်သူကို လိင်မှုကိစ္စအတွက် ရောင်းချခဲ့တဲ့အတွက် ဖမ်းဆီးခံခဲ့ရပါတယ်။

-၀မ်းနည်းစရာကောင်းတဲ့ ဒီအဖြစ်အပျက်ဟာ ထရန်းခရိုင်၊ ကန်တန်ဒေသတွင်းမှာ ဖြစ်ခဲ့တာလို့ ထိုင်းအခြေစိုက် ဒေးလီးနယူးစ်သတင်းမှာ ဒီကနေ့ ဖော်ပြပါတယ်။

-ဒန်းဂ်အမည်ရတဲ့ အဲဒီအဖွားအိုဟာ “ဘီ” လို့ သတင်းမှာဖော်ပြတဲ့ အသက် ၁၅ နှစ်အရွယ် မြေးဖြစ်သူကို အသက် ၇၂ နှစ်အရွယ် အဖိုးအိုတဦးဆီ ငွေကြေးနဲ့ လဲလှယ်ရောင်းချခဲ့ပြီး မြေးဖြစ်သူမှာ သူနဲ့ရတဲ့ ကိုယ်ဝန်ကြောင့် ကလေးရခဲ့တာပါ။

ဒမ်းအမည်ရတဲ့ အဲဒီအဖိုးအိုကိုလည်း အသက်မပြည့်သေးသူကို မုဒိမ်းမှုမြောက် ကျူးလွန်မှုအတွက် ဖမ်းဆီးထားတယ်လို့ ဆိုပါတယ်။ အဖွားအိုဒန်းဂ်ဟာ အဆိုပါအဖိုးအိုကို သူ့ဇနီးနဲ့ ခြိမ်းခြောက်အကြပ်ကိုင်ပြီး ဘတ်ငွေ ၃ သိန်း ငွေညှစ်ခဲ့ပြီး နောက်ဆုံးမှာ ၁ သိန်း ၃ သောင်းနဲ့ ညှိယူထားခဲ့တယ်လို့ သတင်းမှာ ဖော်ပြပါတယ်။ အသက် ၁၅ နှစ်အရွယ် မိန်းကလေး ဘီမှာ အသက် ၉ နှစ်အရွယ် ညီမတဦးရှိပြီး သူတို့မိခင်က နောက်ယောက်ျားတဦးနောက်ကို လိုက်သွားခဲ့ချိန်မှာ သူတို့ကို အဖွားဖြစ်သူဆီ ချန်ထားခံခဲ့ရတာပါ။ မြေးဖြစ်သူမှာ အဖိုးအိုနဲ့ရတဲ့ ကိုယ်ဝန်ကို ပြီးခဲ့တဲ့မတ်လမှာ ကလေးမွေးဖွားခဲ့တယ်လို့ ဆိုပါတယ်။

အဲဒီနောက် အဖွားအိုဟာ သူ့ကို လမ်းမပေါ်ထွက်ပြီး လိင်မှုဆိုင်ရာကိစ္စနဲ့ ငွေရှာစေဖို့ အတင်းအကျပ်ခိုင်းစေခဲ့တာကို လူမှုရေးအသင်းအဖွဲ့တွေက တဆင့်သိခဲ့ကြပြီးနောက် ရဲတွေကို အကြောင်းကြားခဲ့တာပါ။ အဖွားအိုဒန်းဂ်ဟာ ရဲတွေစစ်မေးသမျှကို ဘာမှမသိဘူးလို့ ဖြေနေခဲ့ပြီး အဖိုးအိုကတော့ ခုလို ၂ ကြိမ် ၃ ကြိမ်လောက်လုပ်ခဲ့ပြီး ဒါဟာ မိန်းကလေးက သဘောတူထားပြီး ဖြစ်တဲ့အတွက် မုဒိမ်းမှုမမြောက်ဘူးလို့ ဖြေခဲ့တာပါ။ သူက မိန်းကလေး ဘီရဲ့ မိခင်ဖြစ်သူဟာလည်း ၂၀၁၄ ခုနှစ်က သူ့ဆီကို သမီးဖြစ်သူနဲ့အတူ လာခဲ့ဖူးပြီး မွေးရပ်အိမ်ဆီပြန်ဖို့ အကူအညီတောင်းခဲ့လို့ ဘတ်ငွေ ၂၀၀၀ ပေးခဲ့ဖူးတယ်လို့ ၀န်ခံလိုက်ပါတယ်။ ဒါပေမယ့် အဲဒီအချိန်ကတော့ သူဟာ မိန်းကလေးနဲ့အတူ မအိပ်ခဲ့ဘူးပဲ သနားတဲ့စိတ်နဲ့သာ ကူညီခဲ့တာလို့ ဆိုပါတယ်။ လက်ရှိမှာတော့ ရဲတွေဟာ အသက် ၄၂ နှစ်အရွယ် ဘီရဲ့ မိခင်ဖြစ်သူကိုပါ ဖမ်းဆီးစစ်ဆေးနိုင်ဖို့ ရှာဖွေနေကြပါတယ်။

Credit : burmese.dvb.no/