အတန်းတင်စာမေးပွဲ အောင်/ရှုံးနှင့် သတ်မှတ်သည့် ပညာရေးစနစ် ဖျက်သိမ်းမည်

အခြေခံပညာအဆင့် ပထမတန်းမှ နဝမတန်းအထိ ကျောင်းသားများ၏ စာမေးပွဲ အောင်/ရှုံးကို အတန်းတင် စာမေးပွဲရမှတ် တစ်ခုတည်းဖြင့် သတ်မှတ်သည့်စနစ် ဖျက်သိမ်းရန် မြန်မာနိုင်ငံ စာစစ်ဦးစီးဌာန အနေနှင့် ပြင်ဆင်လျက်ရှိကြောင်း ပညာရေးဝန်ကြီးဌာနထံမှ သိရှိရသည်။

 

အခန်းဆုံး စာမေးပွဲရလဒ်၊ နှစ်ဝက်စာမေးပွဲရလဒ်၊ တစ်ဦးချင်း၏ ဘက်စုံအရည်အချင်း အကဲဖြတ်မှတ်တမ်း ရလဒ်နှင့် အတန်းတင် စာမေးပွဲရလဒ်များ စုပေါင်းအကဲဖြတ်၍ အတန်းတင်ပေးသည့် စနစ်ကို ယခုပညာသင်နှစ်မှစ၍ ပြောင်းလဲရန် ပြင်ဆင်နေခြင်း ဖြစ်ကြောင်း ယင်းဌာနထံမှ သိရှိရသည်။

 

အဆိုပါကိစ္စနှင့် ပတ်သက်၍ ပညာရေး ဝန်ကြီးဌာန ပြောရေးဆိုခွင့်ရှိသူ ဒေါက်တာခိုင်မြဲက “နှစ်ဆုံးစာမေးပွဲ တစ်ခုတည်းအပေါ် မူတည်ပြီးတော့ အောင်စာရင်းထုတ်မှာ မဟုတ်ဘူးပေါ့။ တစ်နှစ်လုံး စောင့်ကြည့်အကဲဖြတ်ပြီးတော့ ရလဒ်အပေါ်မှာ အကဲဖြတ်တဲ့ သဘောပေါ့” ဟု ပြောကြားသည်။

 

ထိုသို့ ပြောင်းလဲရန် မြန်မာနိုင်ငံ စာစစ်ဦးစီးဌာနက မူဝါဒ ပြင်ဆင်ရေးဆွဲ၍ ပညာရေး စီမံခန့်ခွဲမှု ကော်မတီထံ တင်ပြရမည်ဖြစ်ရာ ယခုနှစ် အချိန်မမီလျှင် ယင်းစနစ်ကို လာမည့် ၂၀၁၇-၂၀၁၈ ပညာသင်နှစ်တွင် စတင်ကျင့်သုံးမည် ဖြစ်ကြောင်း ပညာရေး ဝန်ကြီးဌာနထံမှ သိရှိရသည်။

 

အခြေခံပညာ ဦးစီးဌာန ဦးစီးအရာရှိ ဦးငွေတိုးက ဘက်စုံလွှမ်းခြုံသော ပညာရေးကဏ္ဍ လေ့လာသုံးသပ်ရေးလုပ်ငန်း အတွဲ (၂) အစီရင်ခံစာ (၂၀၁၄) တွင် တတ်ကျွမ်းမှုအဆင့်ကို ၆၀ ရာခိုင်နှုန်း၊ လုပ်ငန်းပေးဆောင်ရွက်ခြင်းကို ၄၀ ရာခိုင်နှုန်း သတ်မှတ်ပြီး Grade A, B, C, D ဖြင့် အောင်၊ ရှုံး သတ်မှတ်ရာတွင် ပေါင်း၍အကဲဖြတ်ရန် ဖော်ပြထားသည်ဟု ဆိုသည်။

 

“ဒီစနစ်ပြောင်းလဲတာကို သဘောတူပါတယ်။ ဒါပေမဲ့ တကယ်လုပ်ရမယ့် အလုပ်ကို မလုပ်ခဲ့ဘဲနဲ့ အခုမှ လုပ်တာကို ပြောင်းတယ်လို့ ပြောတာ လက်မခံဘူး။ အချိန်တော်တော်နောက်ကျနေပြီ” ဟု ဦးငွေတိုးက ပြောကြားသည်။

 

ဘက်စုံအရည်အချင်းမှတ်တမ်း ရလဒ်အပေါ် အကဲဖြတ်မည် ဆိုခြင်းနှင့် ပတ်သက်၍ ကျောင်းအုပ်ကြီး၊ သက်ဆိုင်ရာ လုပ်ငန်းဆောင်ရွက်သည့်ဆရာများကိုယ်တိုင် နှစ်စမှ နှစ်ဆုံးတိုင် စနစ်တကျ အကဲဖြတ်ထားသည့် မှတ်တမ်းဖြစ်ရန် အရေးကြီးကြောင်း ပညာရေး လေ့လာသူများက ထောက်ပြသည်။

 

ပထမတန်းမှ နဝမတန်းအထိ ကျောင်းသား၊ ကျောင်းသူများ၏ လပတ်စာမေးပွဲ (ဇွန်လမှစ၍) နှင့် အတန်းတင် စာမေးပွဲရလဒ်ကို အမှတ်စာရင်းအစား အဆင့်သတ်မှတ်ချက် Grade A, B, C, D ဖြင့် ပြောင်းလဲထုတ်ပြန်မည် ဖြစ်ကြောင်း ဇူလိုင်လအတွင်းက သတင်းထုတ်ပြန်ထားသည်။

 

ရမှတ် ၁၀ဝ မှ ၈၀ အထိ Grade ‘A’၊ ရမှတ် ၆၀ မှ ၇၉ အထိ Grade ‘B’၊  ရမှတ် ၄၀ မှ ၅၉ အထိ Grade ‘C’၊ ရမှတ် ၄၀ အောက်ကို Grade ‘D’  ဖြစ် သတ်မှတ်ပြီး ဘာသာရပ် အားလုံးပေါင်း Grade သတ်မှတ်ချက်ကို ဘာသာရပ် အားလုံးပေါင်း ရမှတ်ကို စုပေါင်းပျမ်းမျှရှာ၍ Grade သတ်မှတ်သည်။

 

ဘာသာရပ် အားလုံးပေါင်း၏ Grade သတ်မှတ်ရာတွင် ဘာသာတစ်ခုချင်းစီအလိုက် Grade သတ်မှတ်ရာက တစ်ဘာသာ Grade ‘D’ အဆင့်ရလျှင် Grade ‘D’ အဖြစ်သာ ရမည်ဖြစ် (ဥပမာ- ဘာသာရပ် ၆ ခုရှိ၍ ၅ ဘာသာတွင် Grade A ရပြီး ကျန်တစ်ဘာသာတွင် Grade D ရလျှင် ပျမ်းမျှရှာရာတွင်လည်း Grade D သာ ရမည်ဖြစ်သည်။) သည်။

 

ယခု ၂၀၁၆-၂၀၁၇ ပညာသင်နှစ် အခြေခံပညာအဆင့် (သူငယ်တန်းမှ ဆယ်တန်းအထိ) တွင် ကျောင်းသား၊ ကျောင်းသူ ၉ သန်းကျော်ရှိပြီး ဆရာ၊ ဆရာမ သုံးသိန်းခုနစ်သောင်းကျော်ရှိကြောင်း အခြေခံပညာဦးစီးဌာန၊ စာရင်းအင်းဌာနထံမှ သိရှိရသည်။

 

Credit:TheVoice