ယောက်ျားဖြစ်သူ အချိန်မှန်အိမ်ပြန်မလာပါက သားဖြစ်သူကို သတ်ပစ်မည် အွန်လိုင်းမှ ဗီဒီယိုနဲ့ ခြိမ်းခြောက်တဲ့ ဇနီး
20 Aug 2017 1,406 Views
ခင်ပွန်းဖြစ်သူ အလုပ်ကနေ အိမ်ပြန်မလာဘူးဆိုရင် သားဖြစ်သူကို ကြိုးဆွဲချ သတ်ပစ်မယ်လို့ ဇနီးဖြစ်သူက ခြိမ်းခြောက်ခဲ့တဲ့ ရုပ်သံဗွီဒီယိုဖိုင်ဟာ အင်တာနက်စာ မျက်နှာတွေပေါ်မှာ ပျံ့နှံ့ခဲ့ပါတယ်။
ဒီအဖြစ်အပျက်ဟာ ထိုင်းနိုင်ငံ၊ လက်ခရာဘန်ခရိုင်တွင်းမှာ ဖြစ်ခဲ့တာဖြစ်ပြီး ဇနီး ဖြစ်သူ အသက် ၂၈ နှစ်အရွယ် အမျိုးသမီး နာရူမွန် ဂျမ်ပါဆာ့တ်ဟာ သူခေါ်ထားတဲ့ ဖုန်းတွေကိုလည်း မဖြေခဲ့ပဲ အိမ်ပြန်မလာတဲ့ ခင်ပွန်းကို စိတ်ဆိုးဒေါသထွက်ခဲ့တာပါ။
ရုပ်သံဗွီဒီယိုဖိုင်ထဲမှာတော့ သူဟာ ကလေးကို မြှောက်ချီထားခဲ့ပြီး လည်ပင်းမှာ ကြိုးနဲ့ ချည်ထားခဲ့ကာ “ဂျိူး၊ ရှင်မြင်တယ်နော်။ ရှင် တခြားသူတွေကို အများကြီး ဂရုစိုက်တယ်။ ဒါရှင့်ကလေးပဲ။ ဟုတ်တယ်မလား။ ဒီမှာ ကြိုးနော်။ သူ့ကိုကြည့်လိုက်၊ မသေ သေးဘူးနော်။ ဒီနေ့ သူ့ဆီ ပြန်မလာဘူးဆိုရင်တော့ သတ်ပြီး တနေရာရာကို ပစ်ထားလိုက်တော့မယ်။ ကျမ စိတ်ပင်ပန်းနေပြီ” လို့ ပြောခဲ့တာကို တွေ့ရပါတယ်။
အဲဒီရုပ်သံဗွီဒီယိုဖိုင်ကို သူ့ရဲ့ ခင်ပွန်းဖြစ်သူက မိခင်ဆီကို တဆင့်ပြန်ပို့ခဲ့တာပါ။ မိခင်ဖြစ်သူက ဒီရုပ်သံဗွီဒီယိုဖိုင်ကို ဖေ့စ်ဘွတ်ခ်အင်တာနက်လူမှုကွန်ရက်စာ မျက်နှာပေါ်မှတဆင့်မျှဝေပြီး အကူအညီတောင်းခဲ့ချိန်မှာ ပျံ့နှံ့သွားခဲ့ပြီး ရဲတွေက သူ နေထိုင်ရာ တိုက်ခန်းဆီ သွားရောက်ပြီး စုံစမ်းစစ်ဆေးမှုတွေ လုပ်ဆောင်ခဲ့ရတာပါ။
နာရူမွန်က “ကျမ သူ့(ခင်ပွန်း) ဆီကို ဖုန်း အကြိမ် ၄၀ – ၅၀ လောက်ခေါ်ခဲ့ပေမယ့် မကိုင်ခဲ့ဘူးလေ။ ရှင်တို့က ကျမမဟုတ်တဲ့အတွက် ကျမခံစားရတဲ့ စိတ်ဖိစီးမှုကို ဘယ်သိနိုင်မလဲ။ သူကျမဖုန်းကို မဖြေဘူး။ ကျမကို စကားမပြောဘူး” လို့ ရဲတွေကို ပြောလိုက်တာပါ။
ဒါပေမယ့် သူဟာ သားငယ်ကိုတော့ နာကျင်အောင်လုပ်ဖို့ ရည်ရွယ်ချက်မရှိဘူးလို့ မျက်ရည်လည်ရွဲနဲ့ ပြောခဲ့ပါတယ်။
ခင်ပွန်းဖြစ်သူဟာ သူ့ကို လျစ်လျူရှုထားခဲ့ပြီး တခြားအမျိုးသမီးတဦးနဲ့ ပတ်သက်မှာကို ကြောက်နေခဲ့လို့ သူက ခုလိုလုပ်ခဲ့ရတယ်လို့ ဆိုပါတယ်။
အချိန် ၂ နာရီလောက်ကြာအောင် ရဲတွေက စစ်မေးမှုတွေ လုပ်ခဲ့ပြီးနောက်မှာ တော့ ဒါဟာ မိသားစုပြဿနာသာဖြစ်တယ်လို့ ဆုံးဖြတ်ခဲ့ကြတာပါ။
DVB
