တစ်ရက်ကို စီးကရက်အလိပ် ၄၀ သောက်မှ နေပျော်တဲ့ ၂ နှစ်သားကလေး
16 Aug 2018 1,388 Views
အင်ဒိုနီးရှားနိုင်ငံက ကလေးလေးတစ်ဦးဟာ အသက် ၂ နှစ်ပဲ ရှိပါသေးတယ် ဒါပေမယ့် တစ်ရက်ကို စီးကရက် နှစ်ဗူး အလိပ်(၄၀)သောက်မှ နေလို့ထိုင်လို့ရတဲ့ အဆင့်ရောက်အောင် စီးကရက်စွဲသူတစ်ယောက် ဖြစ်နေပါတယ်။
ဒီသတင်းဟာ တစ်ကမ္ဘာလုံးရဲ့ မီဒီယာ ခေါင်းစည်းပိုင်းမှာ ထိတ်လန့်စွာနဲ့ လက်တလော နေရာယူနေတဲ့ သတင်းဖြစ်ပါတယ်။
အင်ဒိုနီးရှားနိုင်ငံ ဂျာဗာကျွန်းအနောက်ပိုင်း ဆူကာဘူမိ ဒေသက အသက် ၂ နှစ်သာ ရှိသေးတဲ့ ကလေးလေးဟာ ဆေးလိပ်စွဲနေခဲ့တာ တစ်လခွဲခန့် ရှိပြီဖြစ်ပြီး တစ်ရက်ကို အလိပ် ၄၀ သောက်တယ်လို့ သူ့ရဲ့မိဘတွေက ပြောပါတယ်။
ယခုလို ကလေးလေး စီးကရက်စွဲလန်းသွားတဲ့ အရင်းမြစ်ဟာ မိဘတွေပဲ ဖြစ်ပါတယ်။ အစပိုင်းမှာ မိဘတွေ သောက်ပြီး ကြမ်းပြင်ပေါ် ပစ်ချတဲ့ စီးကရက်အတိုအစတွေကို ကောက်သောက်ရင်းကနေ စီးကရက်စွဲသူဖြစ်လာခဲ့ပါတယ်။
သူတို့ကလေး ဆေးလိပ်သောက်တတ်နေတာကို သိတဲ့အချိန်မှာ ဘယ်လိုမှ တားလို့မရတော့ဘူးလို့ မိခင်ဖြစ်သူ မာရာတီ က ဆိုပါတယ်။ “သူ့ကို ဆေးလိပ်မပေးပဲ ထားလိုက်တာနဲ့ နေလို့မရအောင် အနီးနားကပစ္စည်းတွေ လွှင့်ပစ် သောင်းကျန်းတော့တာပါပဲ”။
ဒါ့အပြင် သူဟာ ဆေးလိပ်မသောက်ရမချင်း အိမ်မပျော်တာကြောင့် မိဘတွေကိုယ်တိုင်က ဆေးလိပ်ကို ဝယ်တိုက်ရတဲ့ အခြေနေထိ ဖြစ်နေပါတယ်။
ဖခင်ဖြစ်တဲ့ မစ်ဘာဟူဒင် ဟာ တစ်ခါတစ်ရံမှသာ ဆေးလိပ်သောက်တတ်သူဖြစ်ပြီး သူ့ရဲ့ အရွယ်မေရောက်သေးတဲ့ သားက ဆေးလိပ်ကို ဝါရင့်သမ္ဘာရင့်ကြီးလို သောက်နေတာ မြင်ရတော့ အံ့သြစိတ်ထိခိုက်တယ်လို့ ဆိုပါတယ်။ ကလေးငယ်ဟာ မိဘတွေဆီက ဆေးလိပ်မရရင် အခြားလူတွေဆီက လိုက်တောင်းသောက်တယ်လို့ ဆိုပါတယ်။
အခုဆိုရင် ကလေးလေးဟာ ကော်ဖီသောက်လည်း ဆေးလိပ်နဲ့၊ ထမင်းစားလည်း ဆေးလိပ်နဲ့၊ မအိပ်ခင်လည်း ဆေးလိပ်သောက်ပြီးမှ အိပ်တတ်သူဖြစ်နေပါတယ်။ တစ်နေ့မှာ စီးကရက် နှစ်ဗူးလောက်သောက်သုံးနေပါတယ်။
မိခင်ဖြစ်သူက သားကို ဆေးလိပ်ဖြတ်နိုင်ဖို့ ပြုပြင်ရေးစခန်းကို မကြာမီ ပို့ဆောင်တော့မယ်လို့ ဆိုပါတယ်။
အင်ဒိုနီးရှားဟာ ကမ္ဘာပေါ်မှာ ဆေးလိပ်သောက်သုံးသူအများဆုံး နိုင်ငံတွေထဲက တစ်ခုဖြစ်ပြီး လူဦးရေ သန်း ၆၀ လောက်ဟာ ဆေးလိပ်သောက်သူတွေ ဖြစ်ကြပါတယ်။ ဆေးလိပ် ဈေးသက်သာခြင်း၊ ကလေးတွေ ဆေးလိပ်သောက်တာကို အချို့မိဘတွေက ခွင့်ပြုခြင်းတွေက အဓိကအကြောင်းအချက်တွေ ဖြစ်နေပါတယ်။
