မြန်မာနိုင်ငံအတွက် ပထမဦးဆုံး နိုင်ငံတကာအဆင့်မီ ငါးပြတိုက်ကြီးကို ရန်ကုန်မြို့ကန်တော်ကြီးစောင်းမှာရှိတဲ့ ယခင်ငါးပြတိုက်ဟောင်းနေရာမှာ တည်ဆောက်နေပြီဖြစ်ပါတယ်။

 

 

အဆိုပါ ငါးပြတိုက်ကြီးမှာ ရေအောင်ဥမင် ပါရှိမှာဖြစ်ပြီး လာရောက်ကြည့်ရှုသူတွေအနေနဲ့ ပင်လယ်ရေအောက်ထဲ ရောက်သွားသလို ခံစားရစေမှာ ဖြစ်ပါတယ်။ Myanmar Aquariums ကုမ္ပဏီက တာဝန်ယူတည်ဆောက်နေတဲ့ ငါးပြတိုက်ကြီးရဲ့ ဒီဇိုင်းကို စင်ကာပူကုမ္ပဏီ Surbana Jurong က ရေးဆွဲပေးထားတာဖြစ်ပါတယ်။ 

 

 

ငါးပြတိုက်ဟာ Steel Structure အမျိုးအစားဖြစ်ပြီး နှစ်ထပ်ခွဲ အဆောက်အအုံ ဖြစ်ပါတယ်။ ငါးပြခန်းပေါင်း ၂၀ ကျော်ပါဝင်ပြီး ပြည်တွင်း ပြည်ပက ငါးမျိုးစိတ်တွေ စုံလင်စွာ ပြသထားဖို့ရှိပါတယ်။ ကချင်ပြည်နယ် မေခ မေလိခမြစ်ဆုံဒေသက ငါးမျိုးစိတ်တွေ အပါအဝင် အရှ၊ အာဖရိကနဲ့ လက်တင်အမေရိက က ငါးမျိုးစိတ်တွေကိုပါ ပြသသွားဖို့ စုဆောင်းလျှက်ရှိနေပါတယ်။

 

 

ကန်တော်ကြီးဥယျာဉ် ငါးပြတိုက်နေရာဟောင်း မြေဧရိယာ ၅ ဧက ဝန်းကျင်မှာ တည်ဆောက်နေပြီး ရေအောက်ငါးပြတိုက်အတွက် သြစတြေးလျနိုင်ငံက ကျွမ်းကျင်ပညာရှင်တွေနဲ့ ဆောက်လုပ်နေပါတယ်။