ရန်ကုန်ကို အားဖြည့်ကူညီဖို့ နေပြည်တော်နှင့် တိုင်းနဲ့ပြည်နယ်က ကုသရေးနှင့်ကျန်းမာရေးပညာရှင်တွေ ယနေ့ရောက်ရှိမည်
15 Sep 2020 1,562 Views
ကိုဗစ်အတည်ပြုလူနာ တွေ့ရှိမှုမြင့်တက်နေတဲ့ ရန်ကုန်ကို အားဖြည့်ကူညီဖို့ နေပြည်တော်နဲ့ တိုင်းနဲ့ ပြည်နယ်အသီးသီးက ကုသရေးနဲ့ ကျန်းမာရေးပညာရှင်တွေဟာ ဒီနေ့ စက်တင်ဘာ ၁၅ ရက်မှာ ရန်ကုန်ကို ရောက်ရှိလာမယ်လို့ ကျန်းမာရေးနဲ့အားကစားဝန်ကြီးဌာနက သတင်းထုတ်ပြန်ထားပါတယ်။
ကိုဗစ်-၁၉ကာကွယ်၊ ထိန်းချုပ်၊ ကုသရေးဆိုင်ရာ လျင်မြန်စွာ တုံ့ပြန်ဆောင်ရွက်ရေး ကွင်းဆင်းအဖွဲ့ (၃) ဖွဲ့ဟာ ရန်ကုန်တိုင်းအတွင်း ပြည်သူ့ကျန်းမာရေးလုပ်ငန်းများ၊ ကုသရေးလုပ်ငန်းတွေနဲ့ အသွားအလာကန့်သတ်ခြင်း လုပ်ငန်းတွေမှာ အားဖြည့်ပံ့ပိုးဆောင်ရွက်မှာဖြစ်ပါတယ်။ ဒီအဖွဲ့တွေကို ဒုတိယညွှန်ကြားရေးမှူးချုပ် (ကုသရေး) ဒေါက်တာသီတာလှ၊ ဒုတိယညွှန်ကြားရေးမှူးချုပ် (ရောဂါနှိမ်နင်းရေး) ဒေါက်တာ သန္တာလွင်နဲ့ ညွန်ကြားရေးမှူး ဒေါက်တာစည်သူအောင်တို့ ဦးဆောင်မှာ ဖြစ်ပါတယ်။
ရန်ကုန်မှာ ကိုဗစ်ကုသရေးဆေးရုံတွေအပြင် ထပ်မံတိုးချဲ့ပြင်ဆင်ထားတဲ့ ကိုဗစ်ကုသရေးဌာန ၃ ခုရှိပြီဖြစ်ပြီး လှိုင်၊ သုဝဏ္ဍနဲ့ ဒဂုံဆိပ်ကမ်းက ယာယီကုသရေးဆေးရုံတွေ ဖြစ်ပါတယ်။ မြန်မာမှာ ကိုဗစ်အတည်ပြုလူနာဟာ စက်တင်ဘာ ၁၅ ရက်မနက်ပိုင်းထိ ၃၂၉၉ ဦးရှိပြီဖြစ်ပြီး သေဆုံးသူက ၃၂ ဦး ရှိသွားပြီဖြစ်ပါတယ်။
ဓာတ်ပုံ-MPA
Credit:BBC
#News #Popolay
