နိုင်ငံ့စီးပွားတိုးတက်လာစေရေး ရက် ၈၀ စီမံချက် မြောက်ကိုရီးယားခေါင်းဆောင် ကင်ဂျုံအန် ချမှတ်
07 Oct 2020 1,594 Views
မြောက်ကိုရီးယားခေါင်းဆောင် ကင်ဂျုံအန်က တိုင်းပြည်စီးပွားရေး ပြန်လည်ဦးမော့လာရေးအတွက် နိုင်ငံတစ်ဝန်းစီးပွားရေးမြှင့်တင်မှု စီမံချက်ကို အကောင်အထည်ဖော်ပြီး တိုးတက်မှုများကို ဇန်နဝါရီလတွင် ကျင်းပမည့် ပါတီညီလာခံအမီ မြင်တွေ့လိုသည်ဟု ပြောကြားခဲ့ကြောင်း မြောက်ကိုရီးယားအစိုးရပိုင်မီဒီယာတွင် ဖော်ပြသည်။
မြောက်ကိုရီးယားအနေဖြင့် နျူကလီးယား စီမံကိန်းနှင့် တာဝေးပစ် ဒုံးကျည်ထုတ်လုပ်ရေး အရှိန်မြှင့်တင်ဆောင်ရွက်မှုများ လုပ်ဆောင်ခဲ့သဖြင့် နိုင်ငံတကာမှ စီးပွားရေးပိတ်ဆို့မှုများခံခဲ့ရကာ နိုင်ငံ့စီးပွားရေးကျဆင်းလာသလို ကိုဗစ်-၁၉ ရောဂါဖြစ်ပွားမှုနှင့်အတူ ရေကြီးရေလျှံမှုကြောင့် စီးပွားရေးပိုမိုကျဆင်းလာသည့်အတွက် ယခုဆုံးဖြတ်ချက်ကို ပါတီအစည်းအဝေးအတွင်း ချမှတ်ခဲ့ခြင်းဖြစ်သည်။
ပြီးခဲ့သည့် သြဂုတ်လအတွင်း ကျင်းပခဲ့သည့် အစည်းအဝေးတွင် ခေါင်းဆောင်ကင်က မှားယွင်းသည့် စီမံခန့်ခွဲမှုစနစ်ကြောင့် ချမှတ်ထားသည့် ရည်ရွယ်ချက်များ နှောင့်နှေးခဲ့ရသည်ကို လက်ခံခဲ့ပြီး စီးပွားရေးစီမံကိန်းအသစ်ကို ချမှတ်ရေးဆွဲရန် ဆုံးဖြတ်ခဲ့ခြင်းဖြစ်သည်။ ယင်းနောက် ယခု “ ရက် ၈၀ စီမံကိန်း” ထွက်ပေါ်လာခဲ့ခြင်းဖြစ်သည်။
မူဝါဒသုံးသပ်ရေးပညာရှင်များက တိုင်းပြည်တည်ထောင်ခဲ့သည့် (၇၅)နှစ်မြောက် နှစ်ပတ်လည်အခမ်းအနားတွင် တိုးတက်မှုများ မြင်တွေ့ရန် ခေါင်းဆောင်ကင်က မျှော်လင့်နေပြီး မြောက်ကိုရီးယား၏ စီးပွားရေးတက်ရိပ်ကို မြင်တွေ့နိုင်ဖွယ်ရှိသည်ဟု ခန့်မှန်းထားသည်။
ကိုးကား-အေအက်ဖ်ပီ
ဘာသာပြန်-မေလဲ့သင်း/MDN
