ဧရာဝတီတိုင်းဒေသကြီးမှ ကျွမ်းကျင်သူနာပြု (၂၀)ဦး ပါဝင်သည့်အဖွဲ့ COVID-19 ကုသရေးဌာန ဧရာဝတီစင်တာ၌ အားဖြည့်ကူညီရန် ရန်ကုန်မြို့သို့ ထွက်ခွာ

08 Oct 2020 1,825 Views

COVID-19 အတည်ပြုလူနာအရေအတွက် ဆက်လက်မြင့်မားနေသည့် ရန်ကုန်တိုင်းဒေသကြီးရှိ ကျန်းမာရေး စောင့်ရှောက်မှုလုပ်ငန်းများတွင် အားဖြည့်ကူညီရန် ဧရာဝတီတိုင်းဒေသကြီးမှ ကျွမ်းကျင်သူနာပြု ( ၂၀) ဦး ပါဝင်သည့်အဖွဲ့သည် အောက်တိုဘာလ (၇) ရက်တွင် ရန်ကုန်မြို့သို့ ထွက်ခွာလာကြသည်။

အဆိုပါ ကျွမ်းကျင်သူနာပြုအဖွဲ့သည် ရန်ကုန်တိုင်းဒေသကြီး သုဝဏ္ဏအားကစားကွင်း COVID-19 ကုသရေးဌာန ဧရာဝတီစင်တာရှိ အရေးပေါ် ကုသဆောင် (ICU) တွင် အောက်တိုဘာလ ၈ ရက်မှ စတင်ပြီး၊ ကျန်းမာရေးစောင့်ရှောက်မှုလုပ်ငန်းများတွင် အားဖြည့်ကူညီကြမည် ဖြစ်ကြောင်း ဧရာဝတီတိုင်းဒေသကြီး ကျန်းမာရေး ဦးစီးဌာနမှ သိရသည်။

ရန်ကုန်တိုင်းဒေသကြီးသို့ ထွက်ခွာကြမည့် ကျွမ်းကျင်သူနာပြုများကို သက်ဆိုင်ရာ ဆေးရုံအုပ်ကြီးများ၊ ကျန်းမာရေးဝန်ထမ်းများနှင့် ဒေသခံများက ဂုဏ်ယူဝမ်းမြောက်စွာ နှုတ်ဆက်ကြပြီး၊ ဘေးဘယာ ကင်းဝေးစေရန် ဆုမွန်ကောင်းများ တောင်းပေးကြကြောင်း ဒေသခံများ၏ ပြောပြချက်အရ သိရသည်။

MRTV