အစ္စရေး ပါလက်စတိုင်း တိုက်ခိုက်မှုအမေရိကန် သတိပေး
14 Oct 2015 1,372 Views
အမေရိကန် နိုင်ငံခြားရေး ဝန်ကြီး John Kerry က အစ္စရေးနဲ့ ပါလက်စတိုင်း နယ်မြေမှာ ဆူပူ အုံကြွမှုတွေ ရုတ်တရက် တိုးပွား လာနေတာနဲ့ ပတ်သက်လို့ ပြင်းထန်တဲ့ သတိပေးချက်တရပ် ထုတ်ပြန်လိုက်ပါတယ်။ ဒါကြောင့် အခု ဖြစ်နေတဲ့ အကြမ်းဖက်မှုတွေနဲ့ သွေးထိုး လှုံ့ဆော်မှုတွေ မှန်သမျှကိုတော့ ရပ်တန်းက ရပ်ကြဖို့ John Kerry က ပြောပါတယ်။ ဂျေရုဆလင်မြို့မှာ အခုနောက်ဆုံး ဖြစ်ခဲ့တဲ့ တိုက်ခိုက်မှုတွေအတွင်း အင်္ဂါနေ့တုန်းက အစ္စရေး လူမျိုး သုံးဦး သေဆုံးခဲ့ပါတယ်။ လတ်တလော တိုက်ခိုက်မှုကတော့ ပါလက်စတိုင်း နှစ်ဦးဟာ ဘတ်စ်ကားပေါ် တက်လာပြီး အသင့်ပါလာတဲ့ သေနတ်နဲ့ ခရီးသည်တွေကို ပစ်ခတ်မှု ပြုသလို ဓါးနဲ့ လည်း ထိုးပါတယ်။ ဒီအခါမှာ လူနှစ်ဦး သေဆုံးပြီး အနည်းဆုံး ၁၀ ဦးခန့် ဒဏ်ရာရသွားပါတယ်။ အခင်းဖြစ်ပွားမှုနဲ့ မိနစ်အနည်းသာ ခြားပြီး ပါလက်စတိုင်း အမျိုးသား တစ်ဦးဟာ သူ့ကားနဲ့ ဘတ်စ် ကားမှတ်တိုင်ကို ဝင်တိုက်ယင်း ကားပေါ်က ဆင်းပြီးတဲ့နောက်မှာ အနီးကလူတွေကို ဓါးနဲ့ လိုက်ထိုးပါတယ်။ တဲလ်အဗစ်မြို့ အနီးမှာလည်း ဓါးထိုးမှု ဖြစ်ခဲ့ပါတယ်။ အခုလို အကြမ်းဖက် တိုက်ခိုက်မှုတွေ အပေါ်မှာ ဝန်ကြီးချုပ် နေတန်ညာ ဟု ကတော့ သူတို့အနေနဲ့ အစ္စရေးရဲ့ မြို့ရွာအသီးသီးမှာ ဘေးရန်ကင်းရှင်းမှု ရှိဖို့ ဘယ်နည်းနဲ့ မဆို ကာကွယ်စောင့်ရှောက်ရမှာပဲလို့ ပါလီမန်မှာ ပြောသွားပါတယ်။ တဘက်က ပါလက်စတိုင်းဝါရင့် နိုင်ငံရေးသမား မွတ်စ်တာဖါ ဘဂူတီ ကတော့ အခု ဖြစ်ရပ်တွေက တဦးတယောက်ချင်း ကျူးလွန်တဲ့ ပြစ်မှုတွေ ဖြစ်တဲ့အကြောင်း၊ အစ္စရေးတွေဘက်က ပါလက်စတိုင်း ကလေးတွေကိုပင် လမ်းမထက်မှာ ပစ်သတ်တာတွေဟာ သာမန် အစ္စရေးအရပ်သားတွေ မဟုတ်ဘဲ အစ္စရေး စစ်တပ်က ကျူးလွန်တာကိုတော့ အစ္စရေး ဝန်ကြီးချုပ်က မပြောဘူး။ မပြောဆို သူညွှန်ကြားထား တာလို့ ဆိုပါတယ်။ ဂျူးတွေက Temple Mountလို့ အမည်ပေးထားတဲ့ အယ်လ် အက္ကဆာ ဗလီကျောင်းဝန်းထဲ ပါလက်စတိုင်းတွေ ဝင်ခွင့်ရရေးနဲ့ ပတ်သက်လို့ တင်းမာမှုတွေ သီတင်းပတ် နဲ့ချီ ဖြစ်ပွားခဲ့အပြီး အကြမ်းဖက်မှုတွေ တိုးပွားလာခဲ့တာပါ။ အရှေ့ ဂျေရုဆလင်မှာရှိတဲ့ ပါလက်စတိုင်း ရပ်ကွက်တွေကို ပိတ်ဆို့ထားသင့်မသင့်ကို အစ္စရေး အစိုးရက အခုအခါ သုံးသပ်နေပါတယ်။ ဒါကြောင့်မို့ နှစ်ဘက် ငြိမ်းချမ်းရေး ရဖို့က မှေးမှိန်ဆဲဖြစ်ကြောင်း ဘီဘီစီ သတင်းထောက်က ပြောပါတယ်။BBC Burmese
