တရုတ်တပ် လှုပ်ရှားမှုကြောင့် ရေလက်ကြားမှာ ထိုင်ဝမ် တပ်ချ
21 Dec 2020 1,383 Views
တရုတ် လေယာဉ်တင်သင်္ဘော Shandong ဦးဆောင်တဲ့ ရေတပ်သင်္ဘော အုပ်စုတစု တနင်္ဂနွေနေ့က ထိုင်ဝမ်ရေလက်ကြားကို ဖြတ်သန်းမောင်းနှင် ဝင်ရောက်လာတာကြောင့် ထိုင်ဝမ်တို့က ရေတပ်နဲ့ လေတပ် တပ်ဖွဲ့တွေကို စေလွှတ်ချထားခဲ့ပါတယ်။ အမေရိကန် စစ်သင်္ဘောတစင်း အဲဒီရေလက်ကြားကို ဖြတ်မောင်းအပြီး နောက်တရက်မှာ တရုတ်ရေတပ်ကသင်္ဘောတွေ ဖြတ်သန်းမောင်းနှင်တာပါ။
ပြီးခဲ့တဲ့နှစ် ဒီအချိန်လောက်ပဲ တရုတ်ရေတပ် လေယာဉ်တင်သင်္ဘောအဖြစ် စတင်အသုံးပြုခဲ့တဲ့ Shandong နဲ့အတူ တခြားစစ်သင်္ဘော ၄ စင်း တရုတ်နိုင်ငံမြောက်ပိုင်း Dalian ဆိပ်ကမ်းကနေ ကြာသပတေးနေ့က ထွက်ခွာပြီးတဲ့နောက် ထိုင်ဝမ်ရေလက်ကြားကို အခုလို ဖြတ်သန်းဝင်ရောက်ခဲ့တာလို့ ထိုင်ဝမ် ကာကွယ်ရေးဝန်ကြီးဌာနက ပြောပါတယ်။ တရုတ်သင်္ဘောတွေရဲ့ လှုပ်ရှားမှုကို စောင့်ကြည်ဖို့နဲ့ တပ်ဖွဲ့တွေ အဆင်သင့်ရှိစေဖို့ စစ်သင်္ဘော ၆ စင်းနဲ့ လေတပ် လေယာဉ် ၈ စီးကို စေလွှတ်ခဲ့တယ်လို့ ထိုင်ဝမ် ကာကွယ်ရေးဝန်ကြီးဌာနက ပြောပါတယ်။
တရုတ် လေယာဉ်တင်သင်္ဘောတွေ အခုလို ထိုင်ဝမ်ရေလက်ကြားကို ဖြတ်သန်းမောင်းနှင်တာ ပထမဆုံးအကြိမ် မဟုတ်ပေမယ့် ဒီတကြိမ်ကတော့ နှစ်ဖက်ဆက်ဆံရေး တင်းမာနေချိန်မှာ ဖြတ်သန်းမောင်းနှင်ခဲ့တာ ဖြစ်ပါတယ်။ ဒီမိုကရေစီနည်းနဲ့ ကိုယ်ပိုင် သီးခြားလွတ်လပ်စွာ အုပ်ချုပ်နေတဲ့ ထိုင်ဝမ်ကို တရုတ်တို့က သူတို့ရဲ့နယ်မြေအဖြစ် သတ်မှတ်ထားတာပါ။ ထိုင်ဝမ်ကျွန်းအနား တရုတ်လေတပ် လေယာဉ်တွေ ပျံသန်းမောင်းနှင်တာ အပါအဝင် တရုတ်တို့ရဲ့ စစ်ရေးလှုပ်ရှားမှုတွေအပေါ် ထိုင်ဝမ်တို့က ထပ်တလဲလဲ ကန့်ကွက်နေပေမယ့် တရုတ်တို့ကတော့ တိုင်းပြည်ရဲ့ အချုပ်အခြာအာဏာကို ကာကွယ်ဖို့ စစ်ရေးလေ့ကျင့်မှုတွေ လုပ်နေတာလို့ ပြောပါတယ်။
တနင်္ဂနွေနေ့က ထိုင်ဝမ်ရေလက်ကြားကို ဖြတ်ကျော်ဝင်ရောက်ခဲ့တဲ့ တရုတ် လေယာဉ်တင်သင်္ဘောအုပ်စုက တောင်ဘက်ပိုင်းကို ဆက်လက် မောင်းနှင်သွားတယ်လို့ ထိုင်ဝမ် ကာကွယ်ရေးဝန်ကြီးဌာနက ပြောပေမယ့် တရုတ် ကာကွယ်ရေးဝန်ကြီးဌာနကတော့ မှတ်ချက်တစုံတရာ ပြန်လည်ပေးတာ မရှိပါဘူး။ စနေနေ့ကတော့ ဒီနှစ်ထဲ ၁၂ ကြိမ်မြောက်အဖြစ် အမေရိကန်ရေတပ် စစ်သင်္ဘောတစီး ထိုင်ဝမ်ရေလက်ကြားကို ဖြတ်သန်းမောင်းနှင်ခဲ့တာမှာ အဲဒီသင်္ဘောနောက်ကို နောက်ယောက်ခံ လိုက်ခဲ့တယ်လို့ တရုတ်တို့က ပြောပါတယ်။
Source : VOA
