အာရှတိုက်ရဲ့ အဆင်းရဲဆုံး နိုင်ငံများမှာ နံပါတ် (၂) နေရာမှာ ရှိနေပေမယ့် အာရှရဲ့ အလှူဒါန အရက်ရောဆုံး ၁၀ နိုင်ငံမှာ ထိပ်ဆုံးကရပ်တည်နေတဲ့ မြန်မာ
25 Feb 2016 1,712 Views
အာရှတိုက်ရဲ့ အဆင်းရဲဆုံးနဲ့ အချမ်းသာဆုံး နိုင်ငံတွေနဲ့ လူတွေရဲ့ စာရင်းတွေကို နှစ်စဉ် ထုတ်ပြန်လေ့ရှိတဲ့ Asian Ranking အင်တာနက် စာမျက်နှာကနေ ၂၀၁၅ ခုနှစ် အာရှတိုက်ရဲ့ အဆင်းရဲဆုံး ၁၅ နိုင်ငံစာရင်းကို ထုတ်ပြန်လိုက်ရာမှာ - မြန်မာနိုင်ငံက နံပါတ် ၂ နေရာမှာ ရှိနေတာဖြစ်ပါတယ်။
နိုင်ငံအလိုက် လူတဦးချင်းဆီရဲ့ တနှစ်စာဝင်ငွေအပေါ် အခြေခံပြီး တွက်ထားတဲ့ ဒီစာရင်းအရ မြန်မာနိုင်ငံမှာ လူတဦးချင်းဆီရဲ့ တနှစ်စာဝင်ငွေဟာ အမေရိကန်ဒေါ်လာ ၁၇၁၁ ဒေါ်လာ ရှိတယ်လို့ ဖော်ပြထားတာပါ။
လယ်ယာစိုက်ပျိုးရေးနဲ့ နိုင်ငံခြားကုန်တင်ပို့မှုအပေါ် အဓိက အားထားနေရတဲ့ မြန်မာနိုင်ငံအတွက် အခုလို အာရှရဲ့ ဒုတိယအဆင်းရဲဆုံး နိုင်ငံ ဖြစ်လာရခြင်းမှာ - အစိုးရတာဝန်ရှိသူတွေရဲ့ စီးပွားရေး ဆိုင်ရာ လွဲမှားတဲ့ စီမံခန့်ခွဲမှုတွေက အကြောင်းရင်းတွေထဲက တခုဖြစ်တယ်လို့ Asian Ranking က ထောက်ပြထားပါတယ်။
အနိမ့်ဆုံးကတော့ အာဖဂန်နစ္စတန်နိုင်ငံဖြစ်ပြီး၊ လူတဦးချင်းရဲ့ တနှစ်စာဝင်ငွေက အမေရိကန်ဒေါ်လာ ၁၁၇၇ ဒေါ်လာ ရှိတာဖြစ်ပါတယ်။ မြန်မာ့ အိမ်နီးချင်း ဘင်္ဂလားဒေ့ရ်ှနိုင်ငံကတော့ - မြန်မာနိုင်ငံရဲ့အထက် နံပါတ် ၃ နေရာမှာရှိနေပြီး၊ လူတဦးချင်းရဲ့ တနှစ်စာဝင်ငွေက အမေရိကန် ဒေါ်လာ ၂၀၈၃ ဒေါ်လာ ရှိပါတယ်။ အမြင့်ဆုံးကတော့ အင်ဒိုနီးရှားနိုင်ငံဖြစ်ပါတယ်။ လူတဦးချင်းရဲ့ တနှစ်ဝင်ငွေက အမေရိကန် ဒေါ်လာ ၅၂၁၄ ဒေါ်လာရှိပေမဲ့ စီးပွားရေးဖွံ့ဖြိုးတည်ငြိမ်မှုက နိုင်ငံတွင်း ဆင်းရဲမွဲတေမှုကို တဖြေးဖြေးချင်း လျော့နည်းလာစေတယ်လို့ ဆိုထားပါတယ်။ သူ့နောက်မှာ ဖိလစ်ပိုင်နဲ့ အိန္ဒိယနိုင်ငံတို့က ကပ်လျက် ရှိနေတာပါ။ အာဆီယံနိုင်ငံတွေဖြစ်ကြတဲ့ လာအိုက နံပါတ် ၉ နေရာမှာရှိနေပြီး၊ ဗီယက်နမ် ကတော့ - နံပါတ် ၁၁ မှာ ရှိနေတာကို ပြသထားပါတယ်။
၂၀၁၁ သမ္မတ ဦးသိန်းစိန်အရပ်သားအစိုးရတက်လာပြီးနောက်ပိုင်း နိုင်ငံရေး၊ စီးပွားရေး ပြုပြင်ပြောင်းလဲမှုတွေကို လုပ်ဆောင်လာနေတဲ့ မြန်မာနိုင်ငံမှာ လာမယ့် ၅ နှစ်အတွင်း တနှစ်ကို ၈ ရာခိုင်နှုန်းဝန်းကျင် စီးပွားရေးတိုးတက်လာနိုင်ဖွယ် ရှိတယ်လို့ ကမ္ဘာ့ဘဏ်အဖွဲ့ကြီးက ပြီးခဲ့တဲ့ရက်ပိုင်းကပဲ သုံးသပ်ခဲ့တာပါ။ ဒီလို တိုးတက်ဖို့အတွက် လက်ရှိ လိုအပ်နေတဲ့ ပြုပြင်ပြောင်းလဲရမယ့် အချက်တွေကို နောင်တက်လာမယ့် အစိုးရသစ်လက်ထက်မှာ ပြုပြင်ပြောင်းလဲနိုင်မှသာ နိုင်ငံအနေနဲ့အမှန်တကယ် တိုးတက်ဖွံ့ဖြိုးလာနိုင်မှာ ဖြစ်တာကြောင့် ကဏ္ဍတခုချင်းဆီအလိုက် ပြုပြင်ပြောင်းလဲသင့်တဲ့ အချက်တွေကို ကမ္ဘာ့ဘဏ်က အင်္ဂါနေ့မှာ ထုတ်ပြန်ခဲ့ပါတယ်။
ဒါ့အပြင် Asain Ranking က ထုတ်ပြန်ခဲ့တဲ့ ၂၀၁၅ ခုနှစ်ရဲ့ အာရှမှာ ဖွံ့ဖြိုးမှုအနိမ့်ဆုံး ၁၀ နိုင်ငံစာရင်းမှာလည်း မြန်မာပါဝင်သလို၊ အာရှက သက်တမ်းအရင့်ဆုံး တက္ကသိုလ် ၂၀ စာရင်းမှာလည်း ရန်ကုန်တက္ကသိုလ် ပါဝင်ပြီး၊ အာရှရဲ့ အလှူဒါန အရက်ရောဆုံး ၁၀ နိုင်ငံစာရင်းမှာလည်း မြန်မာနိုင်ငံက နံပါတ် ၁ နေရာမှာ ရှိနေတာ ဖြစ်ပါတယ်။
