Instagram ကို ထိုးဖောက်နိုင်ခဲ့သည့် ၁၀ နှစ်အရွယ် ကလေးငယ်အား Facebook က ဒေါ်လာ ၁၀,၀၀၀ ချီးမြှင့်
05 May 2016 1,312 Views
ဖင်လန်နိုင်ငံ ဟယ်ဆင်ကီမြို့တွင် နေထိုင်သည့် ၁၀ နှစ်အရွယ် ဂျာနီဆိုသူသည် နာမည်ကျော် ဓာတ်ပုံဝေမျှသည့် လူမှုရေးမီဒီယာ Instagram တွင် ရွေးချယ်ထားသော မည်သည့် မှတ်ချက်ကိုမဆို ဖျက်နိုင်သည့် အားနည်းချက်အား ရှာဖွေတွေ့ရှိခဲ့သည်။ Facebook အတွက် ၎င်းအားနည်းချက်ကို အတည်ပြုရန်အတွက် ဂျာနီက ကုမ္ပဏီ၏ စမ်းသပ် account ဖြင့် မှတ်ချက်တစ်ခုကို ဖျက်ပြခဲ့သည်။ ထို့နောက်တွင် Facebook သည် ကုမ္ပဏီ၏ ဆုကြေးငွေပေးအပ်သည့် အစီအစဉ်အရ ၎င်းကလေးငယ်ကို ကန်ဒေါ်လာ ၁၀,၀၀၀ ချီးမြှင့်ခဲ့သည်။ “ဘယ်သူ့ရဲ့ မှတ်ချက်ကိုမဆို ကျွန်တော် ဖျက်လို့ရပါတယ်။
ဂျက်စတင်ဘီဘာရဲ့ မှတ်ချက်တွေက အစပေါ့” ဟု ဂျာနီက ဖင်လန်သတင်းစာ IItalehti ထံသို့ ပြောကြားခဲ့သည်။ အဆိုပါအားနည်းချက်သည် သီးသန့် application programming interface တွင် တည်ရှိကြောင်း၊ သုံးစွဲသူက မှတ်ချက်တစ်ခုကို ဖျက်သိမ်းသည့် ဆောင်ရွက်မှု ပြုလုပ်ရာတွင် စစ်ဆေးရန် အားနည်းခဲ့ခြင်း ဖြစ်ကြောင်း Facebook က ထုတ်ဖော် ပြောကြားခဲ့သည်။ ဂျာနီသည် ရရှိသည့် ဆုကြေးငွေများဖြင့် ဘောလုံးအားကစားအတွက် လိုအပ်သည့် ပစ္စည်းနှင့် စက်ဘီးသစ်တို့ ဝယ်ယူမည် ဖြစ်ကြောင်း ပြောကြားခဲ့သည်။ ထို့အပြင် ၎င်းအနေဖြင့် အရွယ်ရောက်လျှင် လုံခြုံရေးဆိုင်ရာ ကျွမ်းကျင်ပညာရှင် ဖြစ်လာရန် ရည်မှန်းထားသည်။
Credit ; သတင်းစုံ
