ဘဏ်အကောင့်ထဲရောက်လာတဲ့ငွေတွေကို အလွဲသုံးစားလုပ်ခဲ့တဲ့ကောင်မလေး
12 May 2016 1,303 Views
သြစတေးလျှမှာ နေထိုင်ရင်း ကျောင်းတတ်နေတဲ့ မလေးရှားနိုင်ငံသူ Christine Jiaxin Lee အမည်ရတဲ့ အမျိုးသမီးငယ်လေးဟာ သူမရဲ့ ဘဏ်အကောင့်ထဲကို မှားယွင်းလွှဲပြောင်းမှုကြောင့် ရောက်ရှိလာတဲ့ ဒေါ်လာ 4 သန်းအနက်၊ 2.3 သန်းကို အလွဲသုံးစားပြုခဲ့လို့အခုအချိန်မှာ ရဲတပ်ဖွဲ့ရဲ့ ဖမ်းဆီးခြင်းကို ခံထားရပါတယ်။ ဒေါ်လာ 4 သန်းအနက် 1.7 သန်းသာ ဘဏ်စာရင်းထဲ ကျန်ခဲ့တော့တာ ဖြစ်ပါတယ်။ Jiaxin ဟာ အဆိုပါငွေများကို Westpac ဘဏ်မှာဖွင့်ထားတဲ့ သူမရဲ့ဘဏ်အကောင့်ထဲမှာ လွန်ခဲ့တဲ့လေးနှစ်လောက်ကတည်းက မှားယွင်းရောက်ရှိလာတာ ဖြစ်ပါတယ်။ အဲဒီငွေတွေကို အသုံးပြုခဲ့ကာ ဇိမ်ခံပစ္စည်းများ ဒါဇင်နဲ့ချီဝယ်ခဲ့ပြီး ဒီဇိုင်နာတွေ ထုတ်လုပ်ထားတဲ့ အလွန်ဈေးကြီးလှတဲ့ အိတ်မျိုးစုံနဲ့ အခြားပစ္စည်းများကို လက်ငင်းငွေချေမှုများနဲ့ ၀ယ်ယူခဲ့ပါတယ်။
Jiaxin ဟာ ဓာတုအင်ဂျင်နီယာကျောင်းသူတစ်ယောက်ဖြစ်ပြီး ပြီးခဲ့တဲ့ ဗုဒ္ဓဟူးနေ့ညက ခရီးစဉ်တစ်ခုအတွင်း ဆစ်ဒနီလေဆိပ်အရောက်မှာ သြစတေးလျှညွန့်ပေါင်းရဲတပ်ဖွဲ့ရဲ့ ဖမ်းဆီးခြင်းကို ခံခဲ့ရပါတယ်။ သူမဟာ ပြီးခဲ့တဲ့ ကြာသာပတေးနေ့က Waverley ဒေသတရားရုံးမှာ လွဲမှားရောက်ရှိလာတဲ့ ငွေကြေးတွေကိုမရိုးသားသောသဘောဖြင့် ထိန်းသိန်းထားမှု၊လိမ်လည်လှည့်ဖျားမှု၊ ရာဇ၀တ်မှုမှန်းသိရက်နဲ့ တမင်ကျူးလွန်မှု၊ ငွေအလွဲသုံးစားလုပ်မှု-စတဲ့ အမှုတွေနဲ့ တရားရင်ဆိုင်ရတော့မှာ ဖြစ်ပါတယ်။ Jiaxin ရဲ့ ရှေ့နေ Fiona McCarron ကလည်း တရားခံဖြစ်သူဟာ အဆိုပါငွေကြေးများကို သုံးပြီး အလွန်ဈေးကြီးတဲ့အိတ်တွေကို ၀ယ်ယူသုံးစွဲခဲ့မိကြောင်း ၀န်ခံလျှောက်ထားခဲ့ပါတယ်။ ဒါ့အပြင် တရားသူကြီးအနေနဲ့လည်း ရဲတပ်ဖွဲ့ဟာ တရားခံအမျိုးသမီးက ဒီငွေတွေကို ဥပဒေပသုံးစွဲခဲ့သည်ကို ထင်ရှားစေဖို့ ခက်ခက်ခဲခဲသက်သေပြမှုတွေ လုပ်ရဦးမှာဖြစ်ကြောင်းကို လက်ခံခဲ့ပါတယ်။ Jiaxin ရဲ့ ရှေ့နေဖြစ်သူရဲ့ အဆိုအရ တရားခံဟာ မိခင်နိုင်ငံကို ပြန်လိုကြောင်းနဲ့သူမ အဖမ်းဆီးခံခဲ့ရတာကို သူ့မိဘတွေ သိရှိခြင်းမရှိကြသေး-ဟု ပြောဆိုခဲ့ကြောင်း သိရပါတယ်။ Jiaxin ဟာ သြစတေး လျှနိုင်ငံမှာ နေထိုင်ခဲ့တာ ငါးနှစ်ကျော်လွန်ခဲ့ပြီဖြစ်ပြီး လာမည့် ဇွန်လ 21 ရက်နေ့မှာ ဒုတိယအကြိမ် အမှုကို စစ်ဆေးကြားနာမှာ ဖြစ်ပါတယ်။
Credit: Shwemom
