မကြာသေးမီရက်ပိုင်းအတွင်းက လူမှုကွန်ယက် ဖေ့စ်ဘုတ်စာမျက်နှာပေါ်တွင် တက်လာခဲ့သော “ဟားစတိုင်လ်” လူရွှင်တော်အဖွဲ့၏ ပြက်လုံးဗီဒီယို တစ်ခုတွင် နိုင်ငံတော်အတိုင်ပင်ခံ ဒေါ်အောင်ဆန်းစုကြည်ကို ပုတ်ခတ်ဝေဖန်ထားသော ဝတ်စားဆင်ယင်မှုနှင့် ပြက်လုံးများကြောင့် ပရိသတ်များ၏ ဝေဖန်မှုများ ပြင်းထန်ခဲ့ရသည်။ 

 

အဆိုပါဝေဖန်ခဲ့မှုများနှင့် ပက်သက်၍ “ဟားစတိုင်အဖွဲ့” လူရွင်တော်တစ်ဦးဖြစ်သူ စတားကောင်းထက်က “ပြက်လုံးတခုဖြစ်လာပြီဆိုရင်တော့ ဝေဖန်မှုတွေကတော့ ရှိမှာပဲလေ။ ဦးနေဝင်း လက်ထက်မှာတုန်းကလည်း ပြောရရင် ဦးဇာဂနာတို့ပေါ့နော်။ သူတို့ပြက်ခဲ့ကြတာပဲ။ ဦးသန်းရွှေ၊ ဦးသိန်းစိန် လက်ထက်မှာလည်း ပြက်ခဲ့တာပဲ။ ကျနော်တို့က ဖြစ်ပျက်နေတာကို တင်ပြချင်တဲ့ လူရွှင်တော်အဖွဲ့ပါ။ ကိုယ်ရေး ကိုယ်တာကို တိုက်ခိုက်ချင်တဲ့ ဆန္ဒမရှိပါဘူး။ ကျနော်တို့ လေးစားခဲ့တဲ့ လူရွှင်တော်ကြီးတွေလည်း ဝေဖန် ထောက်ပြလာတာတွေရှိခဲ့တဲ့အတွက် ကျနော်တို့လည်း လိုအပ်ရင် ထောက်ပြပြောဆိုရမှာပါပဲ။ လူရွှင်တော်ဆိုတာကတော့ ဝေဖန်မှာပဲ။ ကောင်းတာကိုလည်း ကောင်းတယ်လို့ ချီးကျူးရဲသလို ဆိုးတာကိုလည်း ဝေဖန်ရမှာပါပဲ” ဟု တုံပြန်ပြောဆိုလိုက်သည်။

 

နိုင်ငံရေးပြက်လုံးများကို တွင်တွင်ထုတ်ပြီး အကျဉ်းချခံရသည်ထိ ပြက်လုံးပျက်ခဲ့သည့် လူရွှင်တော် ဇာဂနာကလည်း-

“လူရွှင်တော်ဆိုတာ လိုင်စင်ရှိတယ်။ လိုင်စင်ဆိုတာ ဒီမိုကရေစီရမှ ရတဲ့လိုင်စင်မဟုတ်ဘူး။ ဘုရင်လက်ထက်ကတည်းက ရခဲ့တဲ့လိုင်စင်။ အဲ့ဒီလိုင်စင်က လူရွှင်တော်ကို ဘုရင်ကိုယ်တိုင်က အပြစ်ဒဏ်ချခြင်းကနေ ကင်းလွတ်ခွင့်ပေးထားတယ်။ ဒါက အင်မတန်ဆိုးပါတယ်ဆိုတဲ့ သက်ဦးဆံပိုင်ပဒေသရာဇ်စနစ်ကတည်းက ဘုရင်ကို ပြောချင်တာ ပြောပိုင်ခွင့် လိုင်စင်ရထားတယ်။ ဒီ့အတွက်ကြောင့် လူရွှင်တော်ပြောရင် အရေးမယူရဘူး။ အင်္ဂလိပ်ဖမ်းသွားတဲ့ သီပေါမင်းလက်ထက် အထိ မြန်မာပြည်မှာ အရေးယူခံရတဲ့ လူရွှင်တော်ဆိုတာ ရှိကို မရှိခဲ့ဘူး။ နောက် ဒီမိုကရေစီစနစ်နဲ့ ကျင့်သုံးတဲ့ အင်္ဂလိပ်အစိုးရလက်ထက်မှာလည်း ဘယ်လူရွှင်တော်မှ အဖမ်းမခံရဘူး” လို့  ပြောပါတယ်။

 

ဆက်လက်ပြီး “သေချာတာကတော့ ခေတ်အဆက်ဆက်မှာ လူရွှင်တော်တယောက်မှာ right တခုရှိတယ်။ အဲ့ဒါက ခေတ်အဆက်ဆက် Freedom Of Expression က လူရွှင်တော်ရဲ့အရေးကြီးဆုံး လက္ခဏာရပ်ပဲ။ တကမ္ဘာလုံးက သတင်းစာတွေ ဂျာနယ်တွေ ဧရာဝတီ သတင်းဌာန အပါအဝင် အကုန်လုံးက Freedom Of Experession ကို အကြီးအကျယ်ပြောပြောနေကြတယ်။ လူရွှင်တော်တွေ ဝေဖန်တော့မှပဲ ကင်းကိုက်သလို ထထအော်နေကြတယ်။ လူရွှင်တော်ကတော့ ဝေဖန်မှာပဲ။ Freedom Of Experession ကို လေးစားတယ်ဆိုတဲ့နိုင်ငံ၊ ဒီမိုကရေစီကို လိုချင်တယ်ဆိုတဲ့နိုင်ငံက ဝေဖန်တာကို မခံနိုင်ဘူးဆိုရင် အဲ့ဒီလူတွေချည်းသက်သက် ကျွန်းတကျွန်းပို့လိုက်ကြရင် ကောင်းမယ်။ ဇာဂနာကိုမေးရင် ဇာဂနာအဖြေကတော့ လူရွှင်တော်ဘက်က ရပ်တည်မယ်။ freedom of experession ကိုလေးစားမယ်။ လူရွှင်တော် Right ကိုတော့ တသက်လုံး ကာကွယ်သွားမယ်” လို့ လူရွှင်တော် ဇာဂနာက သူ့ရဲ့အမြင်ကို ပြောပြခဲ့သည်။

 

ခေတ်အဆက်ဆက် အစိုးရအပေါ် ပြက်လုံးထုတ်ဝေဖန်ခဲ့ဖူးတဲ့ မန္တလေးမှ လူရွှင်တော် ဦးချစ်စရာ က-

“ဒီအစိုးရက ကိုယ်တိုင်တင်တဲ့ အစိုးရလေ။ နောက်ပြီးတော့ သူတို့အလုပ်လုပ်နေတာပဲ။ မလုပ်တာမှ မဟုတ်ဘဲ။ အမွေဆိုတာ မိသားစုအမွေတောင် ရှင်းရခက်တယ်လေ။ ဒါက နိုင်ငံအမွေလေ။ အရင်အစိုးရလက်ထက်က လုပ်ခဲ့တဲ့ လက်ကျန်တွေကို သူတို့က အခုမှ ဖာရထေးရ ဖုံးရဖိရ ပြုရပြင်ရတုန်းလေ။ ဒီအပေါ်မှာ အဲ့ဒီလို သွားတိုက်ခိုက်တယ်ဆိုတာ ကလေးတွေက မှန်တာပြောရရင် နိုင်ငံရေးအသိတွေ တော်တော်အားနည်းပါတယ်။ ဒီကလေးတွေက ကျနော့်ရဲ့ ကလေးတွေပါပဲ။ ဒါပေမယ့် သူတို့ရဲ့ ကိုယ်ပိုင်အသံတော့ မဖြစ်နိုင်ဘူးလို့ ကျနော် နားလည်လိုက်ပါတယ်” လို့ ဦးချစ်စရာ က သူ့ရဲ့အမြင်ကို ပြောပါတယ်။

ဒါ့အပြင် တစ်နှစ်သားတောင် မရှိသေးတဲ့ လက်ရှိအစိုးရအပေါ် စောင့်ကြည့်ပြီး ကူညီသင့်ရင် ကူညီ၊ ဝန်းရံသင့်ရင် ဝန်းရံရမှာဖြစ်သလို ခေတ်ရဲ့အရွေ့ကို နားမလည်ရင် ကိုယ်ကဓားစာခံဖြစ်သွားတတ်ကြောင်းနဲ့ တကယ်လို့များ လက်ရှိအစိုးရဘက်က ချို့ယွင်းချက်၊ အားနည်းချက်ရှိလာပြီဆိုရင်တော့ သူတို့ကိုယ်တိုင်လည်း ပြောဆိုမှာဖြစ်ကြောင်း ဦးချစ်စရာက ဆက်ပြောပါတယ်။

 

Credit:ဧရာဝတီ