ထိုင်းတွင် မြန်မာအမျိုးသမီးတစ်ဦး ရိုက်နှက်မုဒိန်းကျင့်ခံရပြီး သေဆုံး
07 Feb 2017 1,431 Views
ထိုင်းနိုင်ငံ၊မဟာချိုင်ဒေသမှာနေထိုင်တဲ့ မြန်မာနိုင်ငံသားအမျိုးသားတစ်ဦးက၊ သူနေထိုင်ရာတိုက်ခန်းအတွင်းမှာ မြန်မာအမျိုးသမီးတစ်ဦးကို လက်ပြန်ကြိုးတုပ်ပြီး ရိုက်နှက်မှုကြောင့် သေဆုံးမှုတစ်ခုဖြစ်ပွားခဲ့တယ်လို့ ထိုင်းနိုင်ငံရောက်မြန်မာအလုပ်သမားတွေကို ကူညီပေးနေတဲ့ACC(မဟာမိတ်)အဖွဲ့ထံကနေ သိရပါတယ်။
ဖေဖော်ဝါရီလ (၅)ရက်နေ့ မွန်းလွဲပိုင်းအချိန်မှာဖြစ်ပွားခဲ့ပြီး သေဆုံးသူ အမျိုးသမီးဟာအသက် (၃၇)နှစ်အရွယ်ရှိပြီး သားသမီးနှစ်ဦး ရှိကြောင်း သိရှိရပါတယ်။ သူမက ပုစွန်စက်ရုံမှာ အလုပ်လုပ်နေပြီး မိသားစုလိုက် ထိုင်းနိုင်ငံမှာနေထိုင်သူဖြစ်ပါတယ်။
သေဆုံးသူနဲ့ လူသတ်မှုကျူးလွန်ခဲ့တဲ့အမျိုးသားတို့ နှစ်ဦးစကားများရန်ဖြစ်နေသံ၊ ရိုက်နှက်သံတွေကြားနေရတာကြောင့် နေအိမ်အနီးနေထိုင်သူတွေက မေးမြန်းပေမယ့် တံခါးမဖွင့်ပေးတာကြောင့် ရဲစခန်းကိုအကြောင်းကြားလိုက်တာဖြစ်တယ်လို့ကူညီပေးနေတဲ့ ACCအဖွဲ့တာဝန်ခံကိုရဲမင်းကပြောပါတယ်။
သူက”သေဆုံးသူအမျိုးသမီးရဲ့ ပါးစပ်ထဲမှာအဝတ်တွေဆို့ထားတယ် အဓိက ကတော့ထိုးကြိတ်ပြီးတော့ လက်ပြန်ကြိုးတုပ်တယ်။ လည်ပင်းညှစ်တယ်သည်ဒဏ်တွေကြောင့်သေသွားတာ ရဲတွေလာဖမ်းတဲ့အချိန်မှာ အဲ့ကောင်လေးက သူသတ်တယ်လို့ဝန်ခံတယ်။ ထွက်မပြေးဘူး အဲ့သည့်အခန်းထဲမှာပဲနေနေတယ်” လို့ ပြောပါတယ်။
သေဆုံးသူအမျိုးသမီးဟာ မုဒိမ်းကျင့်ခံရတဲ့လက္ခဏာကို လည်းရဲတွေကစစ်ဆေးတွေ့ရှိထားပါတယ်၊ လူသတ်တရားခံ အမျိုးသားကို ထိုင်းနိုင်ငံ မဟာချိုင်နယ်မြေရဲစခန်းမှာ ထိန်းသိမ်းထားကြောင်း ACC(မဟာမိတ်အဖွဲ့)ထံကသိရှိရပါတယ်။
Credit:ကုမုန္ဒြာ