" ဇောချွေးပြန်တဲ့ည "(ခေါင်းပြတ်သရဲမကို တွေ့မြင်လိုက်တဲ့ ကိုယ်တွေ့ဖြစ်ရပ်ဆန်း)
08 May 2017 1,513 Views
မေတ္တာသင်္ဂဟ နာရေးကူညီမှူအသင်းမှာ တာဝန်ယူလုပ်ဆောင်လာရကတည်းက အတွေ့အကြုံတွေရပြီးသားပါ ။ အိုခြင်း...နာခြင်း...သေခြင်း တရားတွေကိုအခြားသူတွေလိုရှာစရာမလိုပဲ ကိုယ်တိုင်မျက်မြင်တွေ့ကြုံနေရသူပါ ။ သွေးသံရဲရဲနဲ့ လူနာတွေ...မသေမရှင်ဖြစ်နေတဲ့လူနာတွေ... ကိုယ့်လက်ပေါ်မှာတင် အသက်ထွက်သွားတဲ့ လူနာတွေ ကိုကြည့်ပြီး သံဝေဂ ရခဲ့ပေါင်းလဲ မနည်းတော့ပါဘူး ။ ကျွန်တော်တို့ အသင်းလေးက အခြားအသင်းကြီးတွေလို ပြည့်စုံလှတဲ့ အသင်းမဟုတ်ပေမယ့် စေတနာအရင်းခံပြီး လူမှူရေးပရဟိတအလုပ်ကို တက်တက်ကြွကြွနဲ့ လုပ်နေကြရတာပါ ။ အခက်အခဲတွေမျိုးစုံကိုရုန်းကန်ရင်း အသက်တွေကယ်ခဲ့ရသလို... အတိုက်အခံတွေမျိုးစုံကိုလဲ ကျော်လွှားဖြတ်သန်းရင်း ရုန်းကန်နေရစဲပါ ။ သေခြင်းတရားဆိုတာ မည်သူမျှမလွန်ဆန်နိုင်ကြပါဘူး ။ သုဘရာဇာလို့ပဲ ပြောပြော.... ဒွန်းစဏ္ဍားပဲဆိုဆို အများမလုပ်နိုင်တဲ့ အလုပ်ကို ရင်ဘတ်ချင်းတူတဲ့ သူတွေနဲ့ အတူလုပ်နေရတဲ့ အတွက် ကျေနပ်မိပါတယ် ။
သက်မဲ့ခန္တာကိုယ်တွေကို သယ်ယူရတဲ့အလုပ်ကလဲ လွယ်တဲ့အလုပ်မဟုတ်ပါဘူး ။ ရောဂါမျိုးစုံနဲ့ သေကြရတဲ့သူတွေရှိသလို အသက်အရွယ်ကြီးမြင့်လာတဲ့အတွက် လူကြီးရောဂါတွေနဲ့ သေဆုံးကြရတဲ့သူတွေလဲရှိပါတယ် ။ တစ်ခါတစ်ရံမှာ ပုပ်ပွနေတဲ့ အလောင်းတွေကို ကိုင်တွယ်ပြီး သယ်ယူပေးရတဲ့ အလုပ်ကိုလဲ လုပ်ကိုင်ရတာတွေရှိပါတယ် ။ သုဘ...တင့်တယ်ခြင်း...။ အသုဘ...အမြင်အဆင်းမတင့်တယ်ခြင်းလို့ ဆိုကတည်းက ဘယ်မှာ အဆင်းလှပပေတော့မှာလဲလေ...။ ပိုင်ရှင်တွေကိုယ်တိုင်က မထိမကိုင်ချင်ကြတဲ့ သက်မဲ့ ခန္တာကိုယ်တွေကို မရွံမရှာ ကိုင်တွယ်ပြီး သင်္ဂြိုလ်ပေးရတဲ့ အလုပ်ကို လုပ်ပေးနေရတဲ့ ညီနောင် နာကူအသင်းအဖွဲ့တွေကိုလဲ လေးစား ခင်မင်မိပါတယ် ။ အရင်အချိန်က နံမည်ကျော် ဦးပန်ချာရယ် ဦးအေးမောင်ရယ်ဆိုတဲ့ ပုဂ္ဂိုလ်ကြီးတွေရှိခဲ့ကြတယ် ။ လူမှူရေးပိုင်းအရ အနှိမ်ခံခဲ့ရပေမယ့် သူတို့နဲ့ မပါတ်သက်ပဲကိုနေလို့မရခဲ့ပါဘူး ။ အနှီ ပုဂ္ဂိုလ်ကြီးတွေက အခေါင်းရောင်းတာရယ် အလောင်းသယ်ပြီး မြေချဖို့ရယ်ပဲတာဝန်ယူကြပါတယ် ။
အခုခေတ်မှာတော့ လူမှူရေးအသင်းအဖွဲ့တွေ ပေါ်ပေါက်လာပြီး ယာဉ်တိုက်မှူကြောင့် ထိခိုက်ဒါဏ်ရာရသူများသာမက... လူနာများ... သက်မဲ့ ခန္တာကိုယ်များကိုပါ အကူအညီပေးလုပ်ကိုင်လာကြတဲ့အပြင် လုမှူရေးလုပ်ငန်းတွေမှာပါ တက်တက်ကြွကြွ ပါဝင်လာကြပါတယ် ။ သဘာဝဘေးဒါဏ်ကြောင့် တွေ့ကြုံရတဲ့ အခက်အခဲတွေ...ရေပြတ်လပ်မှူတွေပါမကျန် အားတက်သရောနဲ့ အကူအညီပေးလာကြပါတယ် ။ ဒီတော့လဲ နာရေးကူညီမှူအသင်းဆိုတာထက်...သာရေးနာရေး လူမှူကူညီမှူအသင်းများရယ်လို့ အမည်တပ်ခဲ့ကြရပါတော့တယ် ။ ရင်ဘတ်ချင်းတူကြတဲ့ သူတွေမို့ မအားလပ်တဲ့ အသင်းကနေ တဆင့်အကူအညီတောင်းရတာတွေလဲ ရှိခဲ့ပါတယ် ။ ဟုတ်ကဲ့....ကျွန်တော် မင်းဒင်ပါ ။ သုဘရာဇာမင်းဒင်ကြီးပါ ။ ဒဂုံအရှေ့ပိုင်းက နွမ်းပါးတဲ့ မေတ္တာသင်္ဂဟ သာရေး နာရေး ကူညီမှူအသင်းကပါခင်ဗျာ ။ သုဘရာဇာမင်းဒင် သရဲလဲမကြောက်တတ်ဘူး ဆိုပေမယ့် တစ်ခါတစ်လေမှာတော့ သုဘရာဇာကြီးတစ်ယောက် ဇောချွေးပြန်ခဲ့ရတဲ့အဖြစ်လေးကို ဖောက်သည်ချပါရစေ....။
၁၃ . ဖော်ဖေါ်ဝါရီလ. ၂၀၁၇ ခုနှစ်.........
အချိန်က... ည 7 : 45 မိနစ် ....
" ဟယ်လို..... မင်္ဂလာပါညီလေး.... "
" မင်္ဂလာပါအကို.... "
" ညီလေးရေ.... လူနာလမ်းကြောင်းသွားပေးလို့ရမလား.... "
ရွှေသံလျင် နာရေးကူညီမှူအသင်း ဥက္ကဌ ဦးအောင်ခိုင်ဝင်းက ဖုန်းလှမ်းဆက်ပြီး အကူအညီတောင်းလာပါတယ် ။
" ရပါတယ်အကိုကြီး.... ကျွန်တော့်မှာ နာရေးကားရော ( ၁၃ ) သွေးလူငယ် လူနာတင်ကားရော အသင့်ပါခင်ဗျာ "
" အကိုက မနက်မှာ လူနာသွားကြိုရမှာမို့လို့ပါညီလေး... ညီလေးတို့ဖုန်းကို အကိုလွှဲပေးလိုက်မယ်နော် "
" ဟုတ်ကဲ့ အကို... လွှဲပေးလိုက်ပါ... "
" ကျေးဇူးပါညီလေး...မင်္ဂလာပါ "
" မင်္ဂလာပါအကိုကြီး... "
--------------------
" ဟယ်လို.... မေတ္တာသင်္ဂဟ အသင်းကပါလားခင်ဗျာ... "
" မင်္ဂလာပါခင်ဗျာ....ဘာများအကူအညီပေးရမလဲခင်ဗျာ... "
" ကျွန်တော့်အဒေါ်ကို ဗဟိုအမျိုးသမီးဆေးရုံက လက်လျှော့လိုက်လို့ ရွာကိုပြန်ခေါ်သွားချင်လို့ပါဗျာ... ပိုက်ဆံလဲ သိပ်မတတ်နိုင်ဘူး...အကိုတို့အသင်းက ကားကူညီပေးခ ဘယ်လောက်ပေးရမလဲခင်ဗျာ "
" ဟာ....အကို...ကျွန်တော်တို့ အသင်းက ငွေတန်ဖိုးမသတ်မမှတ်ထားပါဘူးခင်ဗျာ... အသွားအပြန် ကားဆီဖိုး လှူပေးရင်ရပါပြီခင်ဗျ "
"ကျေးဇူးတင်လိုက်တာဗျာ..... ကျွန်တော် အမျိုးသမီးဆေးရုံကြီးကစောင့်နေပါ့မယ်အကို...ကူညီပေးပါခင်ဗျာ "
" စိတ်ချပါခင်ဗျာ...ကျွန်တော်တို့က ဒဂုံအရှေ့ကနေ အလုံမြို့နယ်အထိလာရမှာဆိုတော့ တစ်နာရီလောက်တော့ကြာမယ်နော်...အကို.. "
" ရပါတယ်အကို...ကျွန်တော် စောင့်နေပါ့မယ်... "
-------------------
ညရှစ်နာရီခွဲ လောက်မှာတော့ သွေးလူငယ် သွေးလှူရှင်အသင်းက လူနာတင်ယာဉ်ရောက်လာခဲ့ပါတော့တယ် ။
" အကိုကြီး...ကျွန်တော်တို့ အဆင်သင့်ပဲ... သွားကြမယ်လေ... "
သွေးလူငယ် ကိုခင်ဇော်ကလဲ တက်တက်ကြွကြွနဲ့ အသင့်ရှိနေပါတယ် ။
" အေး...ခင်ဇော်... ငါဆေးရုံကို ဖုန်းလှမ်းဆက်လိုက်ဦီးမယ် "
ကိုခင်ဇော်ကို လှမ်းပြောပြီးတာနဲ့ ချက်ချင်းဆိုသလိုပဲ အကူအညီတောင်းထားတဲ့သူဆီကို ချက်ချင်းဖုန်းလှမ်းခေါ်လိုက်ပါတယ် ။
" ဟယ်လို....မေတ္တာသင်္ဂဟ အသင်းကပါခင်ဗျာ...ကျွန်တော်တို့ ထွက်လာတော့မယ်ဆိုတဲ့ အကြောင်းအသိပေးတာပါ "
" ဟုတ်ကဲ့...အကိုရေ...အဒေါ်က အခုလေးတင်ပဲ ဆုံးသွားပြီဗျာ...ရှင်ရှင် သေသေ ရွာကိုပဲ ပြန်ခေါ်သွာချင်ပါတယ်အကို... "
" ဒါဆိုလဲရတယ်လေ...ကျွန်တော်တို့ နာရေးကားနဲ့ ထွက်လာခဲ့မယ်...စောင့်နေဗျာ "
" ဟုတ်ကဲ့အကို...ကျေးဇူးအရမ်းတင်ပါတယ်ဗျာ "
ဖုန်းချလိုက်ပြီးတာနဲ့ ကျွန်တော့်ရဲ့ ရင်ဘတ်တူ ညီနောင်တော်တွေကို အသိပေးရပါပြီ ။
" ကဲ...ကိုယ့်ဆရာတို့ရေ...လူနာမဟုတ်တော့ဘူး....လူသေဖြစ်သွားပြီ "
" သေသေ ရှင်ရှင်ဗျာ...အကူအညီတောင်းရင်တော့ သွားရမှာပဲ....လိုက်မယ်အကိုရာ...သွားကြတာပေါ့ "
အဖြူရောင် ပရဟိတ ရေအလှူအသင်းက ကိုခိုင်စိုးကလည်း လိုက်မယ်တကဲကဲ ဖြစ်နေလေသည် ။
" ကဲ...ဒီတစ်ကြောင်းကတော့... အတွေ့အကြုံလိုချင်တဲ့သူကများနေတော့ အသင်းအင်္ကျီတွေကလဲ မရှိတော့ဘူး...ကိုယ့်အသင်းဝတ်စုံတွေနဲ့ ပဲ လိုက်ခဲ့ကြတော့ဗျာ... "
အသင်းကနေ ကားစထွက်တော့ ညကိုးနာရီထိုးပါတော့မယ် ။ အလုံမြို့နယ်အထိသွားရမှာဆိုတော့ ညဆယ်နာရီလောက်မှ ရောက်ပါ့မယ် ။ နောက်အရမ်းကျမှာကိုစိုးရိမ်စိတ်ကဝင်လာပါတော့တယ် ။
" ကဲ...ကဲ...ကားပေါ်တက်တော့ဟေ့... မေတ္တာသင်္ဂဟရယ်...အဖြူရောင်ရယ်..သွေးလူငယ်ရယ်...သုံးသင်း...သုံးယောက်ပေါ့ကွာ... "
သွေးလူငယ် ခင်ဇော်က ကားမောင်း...၊ ကျွန်တော်က တာဝန်ခံဆိုတော့ ရှေ့ဆုံးမှာထိုင်ပြီး အဖြူရောင် ကိုခိုင်စိုးက အနောက်မှာ ထိုင်ပြီး စတင်ထွက်ခွာလာခဲ့ပါတော့တယ် ။ လက်ပါတ်နာရီကိုလှမ်းကြည့်မိတော့ ညကိုးနာရီ ထိုးပါပြီ ။
" အကိုလုပ်လေဗျာ...မနောရဲ့အသံလေး... "
" ကားမောင်းနေရင်းမှ လှမ်းပြောလိုက်တဲ့ ကိုခင်ဇော်ကို လှမ်းကြည့်မိပြီး မနောသီချင်းဖွင့်ဖို့အတွက် မေ့သွားတာကို သတိထားလိုက်မိပါတယ် ။
" ကဲ...ကဲ...ဖွင့်ပြီဟေ့... "
" ပရေတံ......ဟိတံ...ပရဟိတံ...ပရေကံ...ဟိကံ...ပရဟိကံ...သူတစ်ပါးတို့ရဲ့ အကျိုးကိုဆောင်ရွက်ကြခြင်းသည်....ပရဟိတ လုပ်ငန်းဟုခေါ်သည် "
မနောရဲ့ သီချင်းသံလေးက ကားထဲမှာ ပျံ့လွင့်နေသလို ကျွန်တော်တို့ ရင်ဘတ်တူ ညီအကိုများရဲ့ ရင်ထဲမှာလည်း ကြည့်နူးတက်ကြွနေတဲ့စိတ်တွေ လျှံထွက်နေပါတော့တယ် ။
---------------------------
" အကို.... ရောက်ခါနီးပြီလား.... "
အကူအညီတောင်းထားသူဆီက ဖုန်းဝင်လာတာတွေ့တာနဲ့ ချက်ချင်းပဲ ပြန်ဖြေလိုက်ပါတယ် ။
" ဟုတ်ကဲ့အကို...ရောက်ခါနီးပါပြီ.....ဆေးရုံအဝက စောင့်ပေးပါခင်ဗျာ "
အလုံမြို့နယ် ဗဟိုအမျိုးသမီးဆေးရုံကိုရောက်တော့ ညဆယ်နာရီထိုးပါတော့မယ်...။ ဆေးရုံဝင်ပေါက်ကို ကားကွေ့ဝင်လိုက်တယ်ဆိုရင်ပဲ ဆေးရုံရဲ့ အပေါက်ဝအရှေ့မှာ လူလေးငါးခြောက်ယောက်လောက် စုပြုံစောင့်နေကြတာ တွေ့လိုက်ရပါတယ် ။ လူအုပ်စုထဲက အဝတ်အစား ခပ်နွမ်းနွမ်းနဲ့ အသက်သုံးဆယ်ဝန်းကျင်လောက်ရှိမယ့် အမျိုးသားတစ်ယောက်က လက်ပြနှူတ်ဆက်ပါတယ် ။
" ကျွန်တော့်နံမည် စံမောင်ပါအကို... ဆေးရုံက အကိုတို့ အသင်းရဲ့ ဖုန်းနံပါတ်ပေးလို့ အကို့ကိုအကူအညီလှမ်းတောင်းလိုက်ရတာပါ "
ကိုစံမောင်ရဲ့ အနောက်ကို လှမ်းကြည့်လိုက်တော့ အမျိုးသမီးတစ်ယောက်..အမျိုးသားလေးယောက်..ကိုစံမောင်အပါအဝင်ဆိုရင် ခြောက်ယောက်ဖြစ်နေပါတယ် ။
" ကိုစံမောင်....ခင်ဗျားတို့က နာရေးရှင်တွေလား... ကားနဲ့ ဘယ်နှစ်ယောက်လိုက်မှာလဲ "
" ဆုံးသွားတာ ကျွန်တော်တို့ အဒေါ်ပါ...ကျွန်တော်တို့က တူတွေ တူမတွေပါအကို... "
" ခင်ဗျားတို့က ဘယ်နှစ်ယောက်ပြန်လိုက်ကြမှာလဲဗျ... "
" ဖြစ်နိုင်ရင် အကုန်လုံးလိုက်ချင်ပါတယ်အကို... "
" ဗျာ.... ခြောက်ယောက်လုံး...ဟုတ်လား..... ကျွန်တော်တို့ကားက နယ်ဝေးဆိုရင် လူနာရှင် သုံးဦးထက် ပိုလိုက်ခွင့်မပေးဘူးဗျ "
" လုပ်ပါအကိုရယ်...ဒီအချိန် မော်ကျွန်းကိုကားငှားပြန်ဖို့ မဖြစ်နိုင်လို့ပါ...။ အငှားကားက တစ်သိန်းတောင်းတယ်အကို... အခြားနာရေးကားလဲ မေးကြည့်ပြီးပြီ... သုံးသိန်းခွဲတဲ့အကိုရာ...ကျွန်တော်တို့အဲဒီလောက်မတတ်နိုင်ဘူးအကို.... လုပ်ပါအကို...ဖြစ်သလိုလိုက်ပါ့မယ် "
ကျွန်တော်စဉ်းစားရအတော်ကျပ်မိပါတယ် ။ ထားခဲ့ရပြန်ရင်လဲ သူတို့အတွက် ကြုံရမယ့် အခက်အခဲကို ကိုယ်ချင်းစာမိသလို...ခေါ်သွားပြန်ရင်လည်း ကားထဲမှာ လူသေအလောင်းရယ်... ကျွန်တော်တို့တွေရယ်ဆို..ကျပ်ညပ်နေတော့မယ် ။ ဆုံးဖြတ်ချက်ကို အမြန်ဆုံးချနိုင်ဖို့အတွက် ကျွန်တော်အလျှင်အမြန်စဉ်းစားရပါတော့တယ် ။
" ခင်ဇော်....ညီလေး.... အသွားအပြန် မင်းတစ်ယောက်ထဲ မောင်းလို့ဖြစ်မလား... "
" ရတယ်အကို.... သွားကြမယ်...၊ အရမ်းနောက်ကျသွားရင် ရွာထဲကို သူတို့ ဝင်ဖို့ခက်သွားလိမ့်မယ်ထင်တယ်အကို "
" ကဲ...ဒါဆိုလဲ...အလောင်းသွားထုတ်တော့...၊ ကျန်တဲ့လူတွေက ပစ္စည်းတွေတင်တော့....ကြာတယ်ကွာ.....လက်အိတ်တွေစွပ်ပြီး အလောင်းကို အခေါင်းထဲထည့်ကြတော့... "
လိုအပ်တာတွေ စီစဉ်နေတဲ့အချိန်မှာပဲ နာရေးရှင်တွေက ဘာမပြောညာမပြောနဲ့ ကားထဲဝင်ပြီးနေရာယူနေကြပါပြီ ။ ကျွန်တော့်စိတ်ထဲမှာ ထောင်းကနဲနေအောင် စိတ်တိုသွားမိပါတယ် ။
" ဟာ..... ဟေ့လူတွေ..... ခင်ဗျားတို့က ကိုယ့်မသာကိုအရင်မတင်ပဲ ခင်ဗျားတို့က နေရာအရင်ဝင်ယူနေတာ ခင်ဗျားတို့ကမသာတွေလား...အကုန်ပြန်ဆင်းကြဗျာ "
ကျွန်တော့်ရဲ့ ရင်ထဲကပေါက်ကွဲမှူတွေက စကားလုံးအဖြစ်နဲ့ ထွက်သွားခဲ့ပါပြီ ။ ကျွန်တော့်ရဲ့ ပေါက်ကွဲမှူသံစဉ်ကြောင့် သူတို့မှာလဲ ကြောင်တောင်တောင်နဲ့ပြန်ဆင်းလာကြတယ် ။ တဒင်္ဂစိတ်ကြောင့် ပြောလိုက်တဲ့စကားကို နောင်တရလိုမိသလို သူတို့ကိုကြည့်ပြီးတော့လည်း စိတ်မကောင်းဖြစ်မိပြန်ပါတယ် ။ ကျွန်တော်လဲ မျက်နှာကို ချက်ချင်းပြန်ပြင်ပြီးတော့ သူတို့ကို အကူအညီပေးဖို့ ပြောရပါတော့တယ် ။
" ကဲ...ကဲ...အမျိုးသားတွေ....ကျွန်တော်တို့ကိုကူညီပြီး အလောင်းကိုဝိုင်းသယ်ပေးကြပါဦး.... ပြီးမှ နေရာချပေးပါ့မယ်... "
ဆေးရုံဝန်ထမ်းတွေ တင်လာတဲ့ ကုတင်ပေါ်က ဒေါ်ကြည်ဌေး ( ၅၈ ) နှစ် ရုပ်အလောင်းကို မှန်ခေါင်းထဲထည့်ပြီး တာနဲ့ စတီးဗန်းပေါ်တင်...ကားထဲက စတီးဘောက်စ်ထဲကိုထည့်ပြီးတာနဲ့ ကားနောက်ဖုံးတံခါးကို အားနဲ့ ပိတ်ချလိုက်ပါတော့တယ် ။
" ဂျိမ်း... "
" ကဲ...အလောင်းတော့ တင်ပြီးပြီ...ကျွန်တော်နေရာချပေးမယ်...။ ဟိုပိန်ပိန်နဲ့ အကိုက သေသွားတဲ့ အဒေါ်ထက် အသက်ကြီးလား.... "
" ဟုတ်ကဲ့ဆရာ...သေသွားတဲ့ မကြည်ဌေးက ကျွန်တော့်ညီမပါ "
" ကောင်းလိုက်လေဗျာ.... ဆေးရုံစောင့်ရတော့ ခင်ဗျားလဲ ပင်ပန်းနေမှာပေါ့....၊ အားလုံးအဆင်ပြေသွားအောင် စတီးဘောက်စ်ကြီးပေါ်အိပ်ဗျာ... ဘောက်စ်ကြီးက ကုတင်လိုပါပဲ...၊ ကိုယ်ထင်ရင် ကုတင်ရွှေနန်းလို့တောင်ပြောကြသေးတာပဲဗျာ...။ အဲဒီအပေါ်မှာ ခေါင်းအုံးလေးတစ်လုံးနဲ့ အိပ်ပြီးသာလိုက်လာခဲ့တော့ဗျာ...ဖြစ်တယ်မဟုတ်လား... "
" ရပါတယ်ဆရာ...ကျွန်တော်လဲ အိပ်ချင်နေတာနဲ့ အတော်ပဲ... "
" ဒါဆိုလဲ တက်တော့ဗျာ... "
" စတီးဘောက်စ်ရဲ့ဘေးမှာ ဆိုဖာတစ်စုံရှိတယ်... နောက်နှစ်ယောက်က တက်ထိုင်လိုက်ဗျာ... ဆိုဖာခုံရှေ့က ပလပ်စတစ်နောက်မှီထိုင်ခုံလေးမှာ ဒီကညီမကဝင်ထိုင်လိုက်ဗျာ...၊ ယာဉ်မောင်းနောက်ဖက်မှာ ထိုင်ခုံတွေနဲ့ ကိုခိုင်စိုးရယ် နောက်နှစ်ယောက်ရယ်က ဝင်ထိုင်လိုက်ဗျာ.... "
နာရေးကူညီမှူ အတွက် တာဝန်ခံလုပ်တာနဲ့တင်မလုံလောက်တော့ စပါယ်ယာလုပ်ပြီး နေရာချခဲ့ရပါတယ်....။ အားလုံးအဆင်သင့်ဖြစ်ပြီဆိုတာနဲ့ ဆေးရုံက ဝန်ထမ်းတွေကို လက်အုပ်ချီပြီးနှူတ်ဆက်ပြီးတာနဲ့ ကားစထွက်လာခဲ့ပါတော့တယ် ။
" ဆရာတို့ ဆရာမတို့..ကျွန်တော်တို့သွားပြီဗျာ.... "
------------------------------
" အကိုရေ...ပြဿနာပဲဗျာ... "
ခပ်တိုးတိုးပြောလာတဲ့ ကိုခင်ဇော်ရဲ့ စကားကြောင့် ကျွန်တော် အံ့အားသင့်ပြီး သူ့ကိုပြန်မေးမိပါတယ် ။
" ဘာဖြစ်လို့လဲညီလေး....ဆီကုန်ခါနီးပြီလား...ညနေကပဲ သုံးသောင်းဖိုးထည့်ထားတယ်လေကွာ... "
" မဟုတ်ဖူးအကို...သူတို့ကခြောက်ယောက်...ကျွန်တော်တို့က သုံးယောက်ဆိုတော့ ကိုးယောက်ဖြစ်နေတယ်လေဗျာ ..အမြန်လမ်းက အံစာတုံးကို သွားသတိရမိလို့ပါ "
ကိုခင်ဇော်ပြောမှပဲသတိထားမိပြီး ဟုတ်သလိုလိုထင်နေရာက တစ်ခုစဉ်းစားမိပြီး ပြုံးလိုက်မိပါတယ် ။
" ညီလေးကလဲကွာ...သူတို့ကခြောက်ယောက်..ကိုတို့က သုံးယောက်...မသာကတစ်ယောက်လေကွာ... ပေါင်းဆယ်ရောက်ပေါ့..မဟုတ်ဖူးလား... "
" ဟာ...အကိုကလဲ...အထဲက သေနေတာလေ... "
" အေးလေ...သူလဲ တစ်ယောက်ပေါ့ကွာ... "
ကျွန်တော်ပြောလိုက်တဲ့စကားကို ကိုခင်ဇော်နားလည်သွားတာကြောင့် ပြုံးပြီး ကားကိုဆက်မောင်းသွားပါတော့တယ် ။
လှိူင်သာယာဘက်ရောက်တော့ ည ဆယ့်တစ်နာရီ ကျော်ပါပြီ ။ လမ်းဘေး ဝဲယာ တစ်ဖက်တစ်ချက်မှာတော့ အလုပ်ပြန်တဲ့သူတွေ.... ကားစောင့်နေတဲ့သူတွေ.... လက်ထဲမှာ အထပ်လေးဆွဲပြီး သိုင်းကွက်နင်းနေတဲ့သူတွေ နဲ့ မြို့ပြရဲ့ အိပ်တန်းတက်ကြတော့မယ့်သူတွေကို ငေးမောနေမိရင်းက အနောက်က နာရေးရှင်တွေကို လှမ်းမေးလိုက်ပါတယ် ။
" အဆင်ပြေကြရဲ့လားဗျ.... ဘာရောဂါနဲ့ ဆုံးတာလဲ ...ရွာက ညအချိန်ပြန်သယ်လာတာလက်ခံရဲ့လား..... " ဆိုတဲ့ အလာပ သလာပ တွေမေးမြန်းရင်းနဲ့ပဲ.....မအူပင်တံတားကြီးကိုဖြတ်ပြီး မအူပင်မြို့ထဲကိုဝင်ရောက်လာခဲ့ပါပြီ ။ နာရီကြည့်လိုက်တော့ ညသန်းခေါင်ကျော်လွန်ပြီး နေ့သစ်ရဲ့အစ မနက်တစ်နာရီထိုးနေပါပြီ ။
" ကိုယ့်ဆရာတို့....မအူပင်ကျော်လို့ မှော်ကျွန်းကိုရောက်ရင် ဘယ်ချိုး ညာချိုးပြောပေးကြဦးနော်.... "
" ဗျာ...အခု ဘယ်နားရောက်နေပြီလဲ "
" မော်ကျွန်းရောက်တော့မယ်ဗျ... "
" လိုသေးတယ်ဆရာ...မော်ကျွန်းကနေ နောက်တစ်နာရီလောက် ထပ်မောင်းရဦးမယ်ခင်ဗျ... "
" ခင်ဗျားက အချိန်မှန်းတာ ကျွမ်းကျင်လှပါလား "
" ကျွန်တော်က ကျိုက်ပိကနေ မအူပင်ကို ကားလိုက်တယ်ခင်ဗျ "
" ဒါနဲ့.... ကျွန်တော်တို့က အလောင်းကို ရွာထဲမောင်းပို့ရမှာလား "
" မဟုတ်ဖူးဆရာ...ကျိုက်ပိနားရောက်ရင် သင်္ချိုင်းကုန်းကိုတွေ့လိမ့်မယ် ။ ညာဘက်မှာချောင်း...ဘယ်ဘက်မှာလယ်ကွင်း ရှိတယ် ။ ကျိုက်ပိတံတားနားရောက်ရင် ကျွန်တော်တို့ကို ပဲ့ထောင်နဲ့ လာကြိုကြမှာဆရာ....။ ကျွန်တော်တို့နေတဲ့ ကညင်ညောင်းရွာက ချောင်းရဲ့ တစ်ဖက်ကမ်းမှာပါဆရာ "
" ဟုတ်ပြီ...ဒါဆိုရင်လဲ လာကြိုမယ့်သူတွေကို ဖုန်းကြိုဆက်ထားလိုက်ဦး "
" အေး....ဟုတ်တယ်ကွ.... မောင်နီတို့ကို လှမ်းဆက်ထားလိုက်ဦးလေကွာ.... နောက်ပြီးတော့ လမ်းမှာ ငါပြောထားတာ ဆရာတို့ကိုလဲ ပြောပြလိုက်ဦး "
" နေပါဦးဟ...ဆင်းတော့မှ ပြောမှာပေါ့ကွ "
သူတို့ဘာပြောချင်မှန်းမသိပေမယ့် ကျွန်တော့်ရဲ့ စိတ်ထဲမှာ ငွေကြေးအခက်အခဲကိုပြောချင်နေပုံရတယ်လို့ထင်လိုက်မိတယ် ။
" ဟေ့လူတွေ...ကားဆီဖိုးက အသွားအပြန် ခြောက်သောင်းလောက်ပဲကျမှာဗျ...အဆင်မပြေဘူးဆိုလဲပြောနော်...အားမနာနဲ့..ကျွန်တော်တို့လှူသင့်ရင် လှူမှာပါ "
" ပိုက်ဆံက ပါ ပါတယ်ဆရာ..ကျွန်တော်တို့ရောက်တော့မှပဲပြောပြပါ့မယ် ...ကျေးဇူးလဲတင်ပါတယ်.. "
" တစ်လမ်းလုံးကျေးဇူးတင်လာလိုက်တာ...ခင်ဗျားတို့ဆီကကျေးဇူးကို မအူပင်ရောက်မှပဲ ထမင်းနဲ့ ကြော်စားပစ်လိုက်တော့မယ်...ဟား..ဟား... "
ရယ်ရယ်မောမောဖြင့် ပြောလိုက်သော ကျွန်တော့်စကားကြောင့် အားလုံးလန်းဆန်းသွားကာ နိုးကြားလာကြလေပြီ ။ ကျွန်တော့်ဖုန်းက ဂျီပီအက်စ်ကိုဖွင့်လိုက်တော့ ကျိုက်ပိကိုရောက်တော့မယ်ဆိုတာ သိလိုက်ရပါတယ် ။ အချိန်ကတော့ မနက်နှစ်နာရီကျော်နေပါပြီ ။ ဘယ်ဖက်မှာတော့ သင်္ချိုင်းကုန်းကိုမြင်နေရပြီး ချောင်းရေပြင်နှင့် လယ်ကွင်းပြင်ကြီးကို တရိပ်ရိပ်ဖြတ်ကျော်နေပါတယ် ။ လမ်းရဲ့ ဘယ်ဖက်အခြမ်းမှာ အကာမရှိတဲ့ လယ်စောင့်တဲတစ်လုံးကလွဲလို့ ခြုံငယ်ပင်ပုတွေတောင် မရှိဘူးဆိုတာ သတိထားလိုက်မိပါတယ် ။ စိတ်ထဲတော့ မသိုးမသန့်ဖြစ်သလိုခံစားနေရပါတယ် ။ ဘာရယ်လို့တော့ အတိအကျပြောလို့မရတဲ့ ခံစားချက်ပေါ့ ။
ကားကို ရုတ်တရက် ဘယ်ဖက်ကွေ့လိုက်တဲ့ အချိန်မှာတော့ ရှေ့ခပ်လှမ်းလှမ်းမှာ ဓာတ်မီးရောင်ကိုလှမ်းတွေ့လိုက်ရပါတယ် ။
" ဟေ့လူတွေ... ရှေ့မှာ ဓာတ်မီးရောင်တွေ့ပြီ...ကုန်းပေါ်မှာ ခင်ဗျားတို့လူတွေလား... "
" ဟုတ်မယ်ဆရာ...အဲဒါကုန်းမဟုတ်ဖူး....တံတားပါ...။ ဘယ်ဖက်မှာ ပဲ့ထောင်ရပ်ထားလိမ့်မယ်ထင်တယ်ဆရာ...
တွေ့ပါပြီ.... ရှေ့မှာ လူလေးငါးယောက် ဓာတ်မီးနဲ့ ထိုးပြီး ကားကို ဘယ်ဖက် ကပ်ရပ်ဖို့ အချက်ပြနေပါတယ် ။ အဲဒီနေရာရောက်တာနဲ့ ကိုခင်ဇော်ကလည်း ကားကို တံတားပေါ်အထိတက်ပြီး နောက်ပြန်လှည့်ကာ အပြန်လမ်းကိုဦးတည်ပြီး ရပ်လိုက်ပါတယ် ။ ကားရပ်လိုက်တာနဲ့ တစ်ပြိုင်နက်ထဲဆိုသလို ကားပေါ်ပါလာတဲ့ လူတွေက ကားမီးတွေပိတ်ပေးဖို့ တိုးတိုးတိတ်တိတ် ပြောပါတယ် ။ လိုရာခရီးရောက်နေပြီဖြစ်တဲ့အတွက် ဘာကြောင့်လဲ....ဘာဖြစ်လို့လဲဆိုတဲ့မေးခွန်းတွေ မေးမနေတော့ပါဘူး ။ ကျွန်တော်တို့ အဖွဲ့ ကားအောက်ကိုဆင်းပြီး လုပ်စရာရှိတာဆက်လုပ်ကြပါတယ် ။ ကားနောက်ဖုံးကိုဖွင့်ပြီး မှန်ခေါင်းကိုဆွဲထုတ်လိုက်ကာ အခေါင်းဖုံးကိုဖွင့်ပေးလိုက်ပါတယ် ။
" ကဲ....လာကြဗျာ..... အားကောင်းတဲ့သူတွေက အရှေ့ အလယ်....သေသေချာချာမထုတ်ကြပေတော့ဗျာ "
" ရပါတယ်...သိပ်မလေးပါဘူး.... "
" ဟေ့ကောင်...သိပ်မလေးဘူးသာပြောတာ... လေးတယ်ကွ... "
" ဟာ...ဟေ့ကောင်...ဖြေးဖြေးလုပ်ကွ... "
တစ်ယောက်နဲ့ တစ်ယောက် ကြားရုံလောက် အသံမတိုးမကျယ်ပြောရင်း တဖြေးဖြေးနဲ့ တံတားအောက်ဖက် ဆင်ခြေလျှောလမ်းအတိုင်း လှေရှိရာကို သယ်သွားကြပါပြီ ။ ကားပေါ်မှာတော့ နာရေးရှင်နှစ်ယောက်နဲ့ .. ကိုခင်ဇော် ကိုခိုင်စိုးတို့နှစ်ယောက် အသင်းအတွက် အလှူငွေ...ဆီဖိုးကို မှတ်တမ်းရေးပြီး လက်ခံနေကြပါတယ် ။ ကျွန်တော်ကတော့ ကားနားမှာ ကျန်နေခဲ့တဲ့ ရွာသားအချို့နဲ့ မှန်အခေါင်းကို စတီးဘောက်စ်ထဲ ပြန်ထည့်ပြီး နောက်တံခါးကိုပြန်ပိတ်ရင်း အလုပ်ကို လက်စသတ်လိုက်ပါတော့တယ် ။
" အကိုကြီးတို့ကို ကျေးဇူးအရမ်းတင်ပါတယ်..ရှိခိုးပြီးကန်တော့ပါတယ်ဗျာ... "
နာရေးရှင် ကိုစံမောင်က လက်အုပ်လေးချီပြီး ကျေးဇူးတင်စကားပြောနေတာကိုကြည့်ပြီး ပီတိဖြစ်လိုက်မိပါတယ် ။
" ရပါတယ်ဗျာ... ကျွန်တော်တို့ အသင်းရဲ့ ဝတ္တရားက လူမျိုးဘာသာ...ဆင်းရဲချမ်းသာမရွေးပဲ... လူမှူရေးလုပ်နေတဲ့ အသင်းပါ ....ကဲ...ကဲ...ကျွန်တော်တို့လဲ ရန်ကုန်ပြန်ရဦးမှာ...ဗိုက်လဲဆာနေပြီ... မအူပင်ရောက်မှပဲ ထမင်းဝင်စားတော့မယ်... သွားပြီဗျို့ "
" အကို...အကို.....ခဏလေး... "
" ဘာလဲဗျ..ကိုစံမောင်... "
" ဟိုလေ... ဒီရောက်မှပြောမယ်ဆိုတဲ့ ကိစ္စလေ...အဲဒါပြောမလို့ "
" အေး....ဟုတ်သားပဲ...ဘာပြောမလို့လဲ ကိုစံမောင်... "
" အကိုတို့ပြန်ရင် မော်ကျွန်းမြို့အစပ်နားမရောက်ခင် လမ်းမှာကားကြုံတားရင် မရပ်ပေးနဲ့နော်...ပုံမှန်လေးသာမောင်းသွားပါ "
" ဟာ...ဘာတုန်းဗျ.... ခင်ဗျားဟာကလဲ ... ကျွန်တော်တို့ နေရာအနှံ့လျှောက်သွားနေတာ ဘာမှမဖြစ်ပါဘူးဗျာ....လုယက်ရင်တောင်မှ အလှူငွေနဲ့ အခေါင်းပဲပေးလို့ရမှာ... လိုချင်ရင်လဲ ပေးလိုက်ရုံပေါ့ဗျာ... ကဲ..ကဲ..သွားပြီဗျို့... ညီလေးခင်ဇော်ရေ...မောင်းတော့ "
အမှောင်ထဲမှာ လက်ကာပြရင်းကျန်ခဲ့သော ကိုစံမောင်တို့က တဖြေးဖြေးဖြင့်ကျန်ရစ်ခဲ့ကြလေပြီ ။
" အကို.... ဒီလူပြောတာ ဘာအဓိပ္ပါယ်လဲမသိဘူးနော် "
" ခင်ဇော်....မင်းကလဲ ဘာကိုကြောက်နေတာလဲ... ဒလမှာ ကုလားမကြီးကို ညနေစောင်းကြီး ရင်ဘတ်ချုပ်ရိုးတွေဖြည်ပြီး ကလီစာတွေထုတ်...ဆေးထည့်ပြီးပြန်ချုပ်ပေးခဲ့တာတောင်ဘာမှမဖြစ်ခဲ့တာ....ဘာကြောက်နေတာလဲ...ရှေ့ကိုသာ ဂရုစိုက်ပြီး ကြည့်မောင်းကွာ... "
ကားထွက်လာပြီး သိပ်မကြာခင်လောက်မှာပဲ ကားလမ်းရဲ့ ဘယ်ဖက်ခြမ်းမှာ အနီရောင်ဝတ်နဲ့ လူလို့ထင်ရတဲ့ အရာကို ကားမီးရောင်အောက်မှာ လှမ်းမြင်လိုက်ရပါတယ် ။ ခရီးဆုံးရင် လုပ်လေ့လုပ်ထရှိတဲ့အတိုင်း ဂျီပီအက်စ်ကိုဖွင့်ပြီး ကိုယ်ရောက်တဲ့နေရာကို စခရင်ရှော့ ရိုက်လိုက်ပါတယ် ။ တစ်လက်စထဲ မြင်နေရတဲ့ အရာကို ဖုန်းကင်မရာနဲ့ အနီးဆွဲပြီး ဓါတ်ပုံလှမ်းရိုက်လိုက်မိတယ် ။ ကားရှေ့မီးရောင်က မှန်ကနေအလင်းပြန်တော့ ပုံကသိပ်မသဲကွဲဘူးဖြစ်နေပါတယ် ။ ဒါနဲ့ပဲ ကားဘေးမှန်ကိုဖွင့်... ခေါင်းကိုထွက်ပြီး မြင်နေရတဲ့ အရာကို ဓါတ်ပုံလှမ်းရိုက်လိုက်ပါတယ် ။
" ခင်ဇော်ရေ.... ရှေ့မှာ အမျိုးသမီးတစ်ယောကက်ကွ...ငါတို့တွေ့နေကျ ဂေါက်သီးတွေလားမသိဘူး...ဟွန်းတီးလိုက်ပါဦးကွာ...အရှိန်လဲနည်းနည်းလျှော့ထားကွ...၊ သူဂေါက်တာကအရေးမကြီးဘူး... တို့တွေထောင်ထဲရောက်ကုန်မယ်... "
" ပွမ်...ပွမ်... "
ကားဟွန်းသံပေးလိုက်တဲ့ အချိန်မှာပဲ ရုတ်တရက်ဆိုသလို ကားမီးရောင်အောက်ကနေ ပျောက်သွားပါတယ် ။ အဲဒီအချိန်မှာ ကားက ညာဖက်နည်းနည်းချိုးကွေ့လိုက်ရတဲ့အတွက် ကားမီးရောင်က ညာဖက်မှာပဲရှိပါတယ် ။
" ခင်ဇော်...ရပ်ရပ်...ညီလေး...ဒီအရူးမ ကားဟွန်းသံကိုကြောက်လန့်ပြီး ရေထဲခုန်ချသွားရင်တော့ ဒုက္ခပဲကွ... "
ကားရပ်တာနဲ့ တပြိုင်နက်ထဲ ကားတံခါးကိုဖွင့်ပြီး ကားလမ်းဘေးကနေ ငါးပေအကွာလောက်ချောင်းကိုဆင်းကြည့်လိုက်ပါတယ် ။
" ခင်ဇော်ရေ... ကားကိုညာဖက် နည်းနည်းချိုးပြီး မီးထိုးပေးစမ်းကွာ.. "
ကိုခင်ဇော်က ကားကို ညာဖက်ချိုးပြီး ကားမီးကြီးနဲ့ ထိုးပေးလိုက်ပါတယ် ။
ကားမီးရောင်ကြောင့် ပါတ်ဝန်းကျင်တစ်ခုလုံးကို ထင်ထင်ရှားရှားမြင်နေရပါပြီ ။ ရေပြင်တစ်ခုလုံး ငြိမ်သက်နေတဲ့အပြင် ဘာလှူပ်ရှားမှူကိုမှလဲမတွေ့ရတဲ့အတွက် ခေါင်းနပန်းတစ်ခုလုံကြီးပြီး ဆံပင်မွေးတွေထောင်ထလာပါတော့တယ် ။ လူနေအိမ်ခြေဆိုလို့ တစ်ခုတစ်လေတောင်မရှိတဲ့နေရာ...။ အရူးမ ဖြစ်စေဦးတော့ ဒီလိုနေရာကို လမ်းလျှောက်လာဖို့ဆိုတာ လုံးဝကိုမဖြစ်နိုင်တာ ကျွန်တော်သတိထားလိုက်မိပါတယ် ။
" ဟင်...ဘုရားရေ... ဘာမှလဲမတွေ့ပါလား... "
ကျွန်တော့်နှာခေါင်းထဲကို ပုပ်အဲ့အဲ့အနံ့ကထောင်းကနဲဝင်လာပါတယ် ။ နာရေးတွေလုပ်ကိုင်နေရတဲ့သူ...သင်္ချိုင်းနဲ့ ထိတွေ့နေရတဲ့သူဆိုတော့ ဒီအနံ့ဟာ လူသေကောင်ပုပ်နံ့ဆိုတာ သိလိုက်ပါတယ် ။ လူသေအလောင်းတွေကို ထိတွေ့ကိုင်တွယ်နေရတာမကြောက်ခဲ့ပါဘူး ။ သရဲဆိုတာလဲ ကိုယ်တွေတစ်ခါမှမမြင်ဖူးခဲ့တာကြောင့် ဘယ်လိုဆိုတာကို သိလဲမသိပါဘူး... ။ အခုဏကမြင်လိုက်ရတဲ့ အရာဟာ လူစင်စစ်မဟုတ်ကြောင်းသက်သေပြနေပါပြီ ။
" ဟာ........ "
မြင်လိုက်ရတဲ့မြင်ကွင်းက ကြက်သီးမွေးညင်းတွေထပြီး ဆံပင်မွေးတွေထောင်ထရလောက်အောင်ပါပဲ...။ ခပ်လှမ်းလှမ်းကနေ ရုတ်တရက်ပေါ်လာတဲ့ အနီရောင်နဲ့ အမျိုးသမီး... ခေါင်းပြတ်ကြီးနဲ့...။
" အကို...ပြန်တက်ခဲ့တော့...သိပ်မဟုတ်တော့ဘူး... "
ကိုခင်ဇော်ပြောတာ နောက်ကျနေပါပြီ... ကိုခင်ဇော်လှမ်းပြောတဲ့အချိန်မှာတင် ကျွန်တော် ကားပေါ်ရောက်ပြီး တံခါးကိုပိတ်ပြီးနေပါပြီ ။
" မောင်း...မောင်း..ညီလေး....ဘယ်ညာကိုသိပ်မကြည့်နဲ့ကွာ...ရှေ့ကိုပဲ အာရုံစိုက်ပြီးသတိထားမောင်း "
ကိုခင်ဇော်လဲ အခြေအနေကိုရိပ်မိလိုက်ပုံရပါတယ်...။ ကားကိုချက်ချင်းမောင်းထွက်လိုက်ပြီး ညာဖက်ကို ချိုးကွေ့ကာ လမ်းအတိုင်းဂရုတစိုက်မောင်းလာခဲ့ပါတယ်...။ ကိုခိုင်စိုးကတော့ ကားနောက်ဖက်မှာ အိပ်ငိုက်နေတော့ ကျွန်တော်တို့ဖြစ်ပျက်နေတာတွေ မသိလိုက်ပါဘူး ။ သိပ်မကြာတဲ့ အချိန်မှာပဲ......
" ဟာ..... ညီလေး...ရပ်...ရပ်.... "
လမ်းလယ်မှာ ကန့်လန့်ခံပြီး ချထားတဲ့ မသာတင် လေးတိုင်စင် ကုတင်တစ်လုံးကို ဘွားကနဲ တွေ့လိုက်ရလို့ ကိုခင်ဇော်ကိုချက်ချင်းရပ်ဖို့ အော်ပြောလိုက်ပါတယ် ။ ကျွန်တော့်ရဲ့ အော်သံနဲ့အတူ ကားကလဲ တုန့်ကနဲ ထိုးရပ်သွားပါတော့တယ်..။
" ကျွီ..... "
" ဟ....ဟ... အကိုဘာဖြစ်တာလဲ... "
အနောက်ခန်းမှာ အိပ်ငိုက်ပြီးလိုက်လာတဲ့ ကိုခိုင်စိုးက အလန့်တကြားထပြီး မေးလိုက်ပါတယ် ။
" အရှေ့မှာမြင်တဲ့ အတိုင်းပဲ... ကဲ..ခင်ဇော်... မင်းနဲ့ ကိုခိုင်စိုးက အဲဒီမသာစင်ကြီးကို ဆင်းဖယ်ကွာ... ငါဖုန်းနဲ့ မှတ်တမ်းတင်ထားမယ်...၊ မြန်မြန်လုပ်ကြကွာ... "
ပြောသာပြောနေရတာ... ကိုယ်တွေ့ကြုံလာခဲ့ရသူဆိုတော့ ကျွန်တော့်ခြေထောက်အောက်ပိုင်းတွေက လေးပြီး လမ်းမလျှောက်နိုင်တော့ပါဘူး ။ ကြက်သီးတွေထပြီး နားထင်နားရင်းတွေလဲ ထူပူနေပါတယ် ။ အဲဒီအချိန်မှာပဲ... ကိုခိုင်စိုးနဲ့ ခင်ဇော်တို့နှစ်ယောက် သွက်သွက်လက်လက်နဲ့ လေးတိုင်စင်ကို မ ရွှေ့လိုက်ကြပါတယ် ။ သူတို့လဲ ကျွန်တော့်လိုပဲ ထိတ်လန့်နေမယ်ထင်ပါတယ် ။
သွက်သွက်လက်လက်နဲ့ ရွှေ့နေကြတဲ့ သူတွေကိုလှမ်းကြည့်နေရတာကနေ စိတ်ထဲမသင်္ကာတာနဲ့ ကျွန်တော်နဲ့ မလှမ်းမကမ်းကို လှမ်းကြည့်လိုက်မိတယ် ။ အောင်မလေးဗျာ.... ခေါင်းမပါတဲ့သူရဲမက ကျွန်တော်တို့ဆီလျှောက်လာနေတယ်...။
" ဂျိမ်း... "
" အောင်မလေးဗျာ... "
နားထဲမှာ မိုးကြိုးပစ်ချလိုက်သလိုကြားလိုက်ရပြီး တစ်ကိုယ်လုံးမြောက်တက်သွားမတတ်ပါပဲ...။ ကိုခိုင်စိုးနဲ့ ခင်ဇော်တို့နှစ်ယောက် ကားတံခါးအမြန်ဆွဲပိတ်လိုက်သံက လိပ်ပြာလွင့်မတတ်ဖြစ်သွားရပါတယ် ။
" ညီလေး...မြန်မြန်မောင်း...မြန်မြန်မောင်း.... ဘယ်မှမကြည့်နဲ့...ရှေ့ကိုပဲကြည့်... ဘယ်သူတားတားလုံးဝမရပ်နဲ့... အရှိန်လဲမလျှော့နဲ့... လမ်းလယ်မှာဆိုရင် တိုက်သာပစ်ကွာ... ဒီနားမှာ လူနေအိမ်မရှိဘူးကွ... "
" ဘယ်လိုတွေ ဖြစ်ကုန်မှန်းမသိတော့ပါဘူးဗျာ... "
ကိုခင်ဇော်က ညည်းတွားရင်း ကားကို အရှိန်မြှင့်ပြီး မောင်းပါတော့တယ် ။ ကားနောက်ခန်းက အခေါင်းထည့်တဲ့ စတီးဘောက်စ်ကြီးကလဲ တဂျမ်းဂျမ်းနဲ့...ခေါင်းတွေလဲ ပူထူပြီးတော့ သုံးယောက်သား အရှေ့ကိုပဲ အာရုံစိုက်ပြီးမောင်းလာလိုက်တာ... မျက်နှာချင်းဆိုင်လာတဲ့ ဆိုင်ကယ်မီး...ကားမီးတွေကိုလဲ ဂရုမစိုက်နိုင်တော့ပဲ ကားထဲမှာ ကမ္ဘာပျက်သလိုဖြစ်နေပါပြီ ။
ကျိုက်လတ်...မော်ကျွန်း...မအူပင် မြို့မှ ကြိုဆိုပါ၏ ဆိုတဲ့ ဆိုင်းဘုတ်တွေ့တော့မှပဲသက်ပြင်းချနိုင်ပါတော့တယ် ။ မအူပင်ကားလမ်းဆုံရောက်တဲ့ အခါမှာတော့ ညကားတွေရပ်တဲ့ ထမင်းဆိုင်ရှေ့မှာ ကားရပ်လိုက်တော့မှပဲ စိတ်သက်သာရာရပါတော့တယ် ။ စိတ်ကိုအေးချမ်းသွားတာပါပဲဗျာ...။ မအူပင်ရောက်တော့ မနက်လေးနာရီထိုးပါပြီ ။ အဲဒီအကြောင်းကို တွေးကိုမတွေးရဲတော့ပဲ ဘုရားကိုသာ အာရုံပြုနေလိုက်ပါတော့တယ် ။ တစ်လမ်းလုံး တစ်ယောက်နဲ့ တစ်ယောက် စကားမပြောဖြစ်ကြတော့ပဲ အတွေးကိုယ်စီနဲ့ အပြန်လမ်းမှာ.. ရင်ခုန်စရာအတွေ့အကြုံတွေ တစ်ပွေ့တစ်ပိုက်သယ်ဆောင်ရင်း မနက်အာရုံတက်အလင်းရောင်ကိုကြိုနေမိပါတော့တယ်....။
-------------------
သုဘရာဇာမင်းဒင်လဲ နှလုံးသားနဲ့လူ.... အသွေးအသားနဲ့တည်ဆောက်ထားတဲ့လူပဲဗျာ... ခေတ်စကားနဲ့ ပြောရရင် အဲဒီနေရာမှာသာ ခင်ဗျားတို့ဆိုရင် ရူးတောင်သွားဦးမယ်.....။ မပြောပဲ ချန်ထားခဲ့တာတွေရှိနေပါသေးတယ်....။ ဘယ်လောက်ပဲကြုံခဲ့ကြုံခဲ့...မင်းဒင်တို့က ဒီအလုပ်ကိုဆက်လုပ်နေဦးမှာပါ ။ ဘယ်လောက်ပဲခြောက်လှန့်ခြောက်လှန့်...မင်းဒင်တို့က ဆက်လုပ်နေဦးမှာပါ...။ အကူအညီလိုရင်ပြောပါဆိုတိုင်း
ကြောက်မနေကြပါနဲ့.... တစ်ချိန်ချိန်မှာ အကူအညီလိုလာကြဦးမှာပါ....။ အဲဒီအခါကျရင် သုဘရာဇာမင်းဒင်ကြီးကိုသတိရလိုက်ပါ.....။ မင်းဒင်လဲ ဒီလမ်းကိုသွားရဦးမှာပါဗျာ....။ သာရေးအတွက်ပဲလိုလို...နာရေးအတွက်ပဲလိုလို...သွေးပဲလိုလို... အရေးပေါ်ပဲလိုလို... ဆီဖိုးနဲ့ သဒ္ဓါလို့လှူတဲ့ ငွေကလွဲပြီး ပိုမယူပါဘူး... ။ တစ်ခါတစ်ရံမှာ ဆီဖိုးအိတ်စိုက်ရတဲ့အပြင်... သင်္ဂြိုလ်စားရိတ်ပါပြန်လှူခဲ့ရတာတွေရှိပါတယ် ။
ဆက်သွယ်လိုက်ပါ.... ကူညီပါရစေ...
ကျွန်တော့နံမည် မင်းဒင်...သုဘရာဇာမင်းဒင်ပါ
မေတ္တာသင်္ဂဟ သာရေးနာရေးအသင်း
သခင်စံရွှေလမ်း... အမှတ် ( ၁၁ ) ၊ ဒဂုံမြို့သစ် ( အရှေ့ပိုင်း )
ဖုန်း.... ၀၉ ၂၅၀၀၁၀၁၉၉
-------------------------------
ချစ်ခင်လေးစားရပါသော စာဖတ်ပရိတ်သတ်အပေါင်းတို့ခင်ဗျား... ယ္ခုစာဖြစ်မြောက်ဖို့အတွက် ကိုမင်းဒင်ကိုယ်တိုင် လက်ရေးမူဖြင့်ရေးသားပေးပို့လာသည်ကို...စာရေးသူမှ ပြန်လည်ပြင်ဆင်မွန်းမံခြင်း... ဖတ်ကောင်းအောင် ပြင်ဆင်ရေးသားဖြည့်စွက်ခြင်းများပြုလုပ်ပြီး တင်ဆက်လိုက်ရပါသည် ။ နေရာအမည် လူအမည်များ အမှန်အတိုင်းရေးထားပါသည် ။
ချစ်ခင်လေးစားစွာဖြင့်
လွင်ဦးဟန်
Source link credit -https://www.facebook.com/hlaylaysein1967/posts/449963082018132
