ရေကြီးရေလျှံမှုတွေကို နိုင်ငံတကာစံနှုန်းတွေနဲ့ထိန်းချုပ်နိုင်ရေးဆွေးနွေးပွဲကျင်းပ
12 May 2017 1,231 Views
မြန်မာနိုင်ငံမှာ နှစ်စဉ်ဖြစ်ပေါ်နေတဲ့ ရေကြီးရေလျှံမှုတွေကို နိုင်ငံတကာစံနှုန်းတွေနဲ့အညီ ထိန်းချုပ်နိုင်ရေးအတွက် မူဝါဒတစ်ရပ်ချမှတ်နိုင်ရေး အလုပ်ရုံဆွေးနွေးပွဲကို ပို့ဆောင်ရေးနှင့် ဆက်သွယ်ရေးဝန်ကြီးဌာနက ဦးဆောင် ပြုလုပ်ခဲ့တယ်လို့ သိရပါတယ်။ယခုအလုပ်ရုံဆွေးနွေးပွဲကို နေပြည်တော်မှာရှိတဲ့ Grand Amara ဟိုတယ်မှာ မေလ(၉)ရက်က ကျင်းပပြုလုပ်ခဲ့တာဖြစ်ပြီး ပို့ဆောင်ရေးနှင့်ဆက်သွယ်ရေးဝန်ကြီးဌာနအပြင် ပြည်တွင်းက ရေကြီးရေလျှံမှုနဲ့ပတ်သက်တဲ့ ဌာနဆိုင်ရာတာဝန်ရှိသူတွေအပါအ၀င် ဂျပန်နိုင်ငံ တိုကျိုတက္ကသိုလ်က တာဝန်ရှိသူတွေနဲ့ ဆွေးနွေးခဲ့တာလို့သိရပါတယ်။
ရေကြီးရေလျှံမှုတွေနဲ့ပတ်သက်ပြီး မူဝါဒတစ်ရပ်ချမှတ်နိုင်ရေးအပြင် နိုင်ငံတော် အစိုးရအနေနဲ့ ကမ်းပါးပြိုခြင်းနဲ့ရေကြောင်းတိုးတက်ရေးတို့ကို ဆောင်ရွက်လျှက်ရှိပြီး ပြီးခဲ့တဲ့ ၂၀၁၆-၂၀၁၇ဘဏ္ဍာနှစ်မှာတော့ ကမ်းပါးပြိုရေတိုက်စားမှုဒဏ်ခံနိုင်ရေးအတွက် တစ်နိုင်ငံလုံးက နေရာ(၁၇၃)ခုကို ကာကွယ်တားဆီးနိုင်ခဲ့ပြီး ယခုဘဏ္ဍာနှစ်မှာတော့ ကမ်းပါးပျိုရေတိုက်စားမှု ဒဏ်ခံနိုင်ရေးအတွက် နေရာ(၁၇၉)ခုကိုလည်း ထိန်းသိမ်းသွားမယ်လို့ သိရပါတယ်။
ဒါ့အပြင် ရေကြောင်းဖွံ့ဖြိုးတိုးတက်ရေးအတွက် နေရာ ၁၄ ခုကိုလဲ ဆောင်ရွက်သွားမယ်လို့သိရပါတယ်။ ပြီးခဲ့တဲ့ ၂၀၁၅ခုနှစ်အတွင်း တိုင်းဒေသကြီးနဲ့ပြည်နယ်(၁၄)ခုအနက် ၁၂ခုမှာ ရေကြီးရေလျှံမှုတွေဖြစ်ပွားခဲ့ပြီး ၂၀၁၆ခုနှစ်မှာလဲ ဖြစ်ပွားခဲ့တဲ့အတွက် ယခုနှစ်မိုးရာသီမှာလဲ ရေကြီးရေလျှံမှုတွေကနေ ကာကွယ်ရေးဦးစားပေးလုပ်ဆောင်သွားမယ်လို့သိရပါတယ်။
