‘မိုဟာမက်ဖာကွမ်’ ဆိုသူလူငယ်ဟာ ဇွန်လ ၂၁ ရက်နေ့က ဖြစ်ပွားခဲ့တဲ့ မတော်တဆမှုတစ်ခုမှာ ဒဏ်ရာရခဲ့ပြီး လုံးဝသတိလစ်မေ့မြောကာ ပုဂ္ဂလိက ဆေးရုံတစ်ရုံမှာ တင်ထားခဲ့ရပါတယ်။ ငွေကြေးပြည့်စုံတဲ့ မိသားစုတွေ မဟုတ်ပေမယ့် သူ့အတွက် ဆေးကုသစရိတ် အိန္ဒိယရူပီး ၇ သိန်း (ကျပ်သိန်း ၁၅၀ ကျော်) ကုန်ကျခံပြီးတဲ့အခါမှာတော့ မိသားစုမှာ သူ့အတွက် ပေးစရာ စရိတ်မရှိတော့ပါဘူး။ ဒီအကြောင်းတွေကို ဆေးရုံက သိသွားခဲ့ပြီး ရက်အနည်းငယ်အကြာမှာပဲ လူနာဟာ သေဆုံးပြီဖြစ်တယ်လို့ ဆရာဝန်က အတည်ပြုကြေညာလိုက်ပါတယ်။

 

 

မိသားစုတွေဟာ လူငယ်ရဲ့အလောင်းကို အိမ်ပြန်သယ်ခဲ့ကြပြီး နားရေးအတွက် စီစဉ်နေတုန်းမှာ ‘ဖာကွမ်’ ရဲ့ ခြေချောင်းလက်ချောင်းလေးတွေ လှုပ်လာတာကို မထင်မှတ်ပဲ တွေ့လိုက်ရပါတယ်။ သူတို့ဟာ Ram Manohar Lohia ဆေးရုံကို အမြန်တင်ပို့ခဲ့ပြီး ဆရာဝန်တွေက စစ်ဆေးရာမှာ လူနာဟာ အသက်ရှင်လျှက်ရှိနေသေးပြီး သူ့အတွက် လေဝင်လေထွင်ကောင်းအောင် စီစဉ်ပေးဖို့ပဲလိုတယ်လို့ ဆိုကာ လိုအပ်တာတွေကို ချက်ခြင်းလုပ်ပေးခဲ့ပါတယ်။

 

“လူနာက စိုးရိမ်ရတဲ့အခြေအနေပါ ဒါပေမယ့် ဦးနှောက် မသေသေးပါဘူး၊ သွေးခုန်သွေးတိုးနေတာတွေလည်း အလုပ်လုပ်နေပါတယ်၊ သူ့အတွက် လေဝင်လေထွက်ကောင်းအောင် စီစဉ်ပေးဖို့လိုပါတယ်” လို့ ဆရာဝန်ကြီးက ဆိုပါတယ်။

 

လက်ရှိမှာတော့ သက်ဆိုင်ရာအဏာပိုင်တွေက ‘ဖာကွမ်’ ကို ဆေးကုသစရိတ် မတတ်နိုင်တော့လို့ သေဆုံးပြီလို့ ကြေညာခဲ့တဲ့ ပုဂ္ဂလိကဆေးရုံကို စုံစမ်းစစ်ဆေးမှုတွေ ပြုလုပ်သွားမယ်လို့ Hindustan Times သတင်းမှာ ဖော်ပြထားပါတယ်။