BEC-TERO TV

မျက်ကပ်မှန် မချွတ်ပဲ ရေချိုးမိတဲ့အမျိုးသား မျက်စိကွယ်

12 Jul 2019     14,994 Views


အင်္ဂလန်နိုင်ငံမှ အသက် ၂၉ နှစ်အရွယ် အမျိုးသားတစ်ဦးဟာ မျက်ကပ်မှန်ကို မချွတ်ပဲ အကြိမ်ကြိမ် ရေချိုးမိခဲ့တာကြောင့် မျက်လုံးတစ်ဖက် ရောဂါပိုးဝင်ပြီး မျက်စိကွယ်သွားခဲ့ရပါတယ်။
 
‘နစ်ခ် ဟမ်ပရီးစ်’ ဟာ သူ့အသက် ၄ နှစ်အရွယ်ထဲက မျက်မှန်တပ်ခဲ့ရသူဖြစ်ပါတယ်။ ၂၀၁၃ ခုနှစ်မှာ မျက်မှန်ကနေ မျက်ကပ်မှန်ကို ပြောင်းတပ်ခဲ့ပါတယ်၊ တစ်လလျှင် တစ်ကြိမ်လဲလှယ်ရတဲ့ မျက်ကပ်မှန်ရဲ့တန်ဖိုးဟာ တစ်ခါလဲရင် စတာလင်ပေါင် ၂၅ (ကျပ် ၅ သောင်းနီးပါး) ကုန်ကျပါတယ်။ အဲဒီအချိန်ထဲက မျက်ကပ်မှန်ကို တစ်ပတ်မှာ ၅ ရက် တပ်ပြီး ကျန်တဲ့ရက်တွေမှာတော့ မျက်မှန်ပဲဝတ်ဆင်ခဲ့ပါတယ်။
 
ကိုယ်ကာယ အားကစားလိုက်စားပြီး ဘောလုံးဝါသနာရှင်လည်းဖြစ်တာကြောင့် မနက်နိုးလာတဲ့အခါ အားကစားရုံကိုသွား ကိုယ်ကာယလေ့ကျင့် ပြီးရင် ရေချိုးပြီးမှ ရုံးကို အလုပ်သွားပါတယ်။ ညနေ ရုံးကပြန်လာရင် ဘောလုံးကစား ဒီပုံစံနဲ့ နေ့စဉ်ကျင်လည်နေပါတယ်။
 
 
၂၀၁၈ ခုနှစ် ဇန်နဝါရီလ၊ တစ်ရက်မှာတော့ သူအိပ်ယာကနေနိုးလာတဲ့အခါ သူ့ရဲ့ ညာဘက်မျက်လုံး ကောင်းကောင်းမမြင်ရတော့ပါဘူး။ ဒါပေမယ့် သူက ပေါ့ပေါ့ပဲထားလိုက်ပြီး ထုံးစံအတိုင်း မျက်ကပ်မှန် တပ်၊ လုပ်စရာရှိတာတွေ ဆက်လုပ်နေလိုက်ပါတယ်။ ဒီလိုနဲ့ တစ်ပတ်လောက်အကြာမှာ သူ့မျက်လုံးရဲ့အခြေအနေက ပိုပြီးဆိုးလာပါတယ်။ 
ဒါနဲ့ မျက်မှန်စမ်းတဲ့ ဆရာဝန်နဲ့ သွားပြတဲ့အခါ ဆရာဝန်က သူ့ရဲ့မျက်လုံးထဲမှာ ပြည်တည်နာဖြစ်နေတယ်လို့ ပြောပြီး ဆေးရုံတက်ဖို့ ညွှန်ကြားလိုက်ပါတယ်။
 
 
ဆေးရုံမှာ ဆရာဝန်တွေက စမ်းသပ်ပြီးတဲ့အခါ သူ့ရဲ့မျက်လုံးက အနာဟာ ရေထဲမှာရှိနေတဲ့ အဏုကြည့်မှန်ပြောင်းနဲ့ကြည့်မှသာ မြင်နိုင်တဲ့ ရောဂါပိုး ကူးစက်ခံထားရတယ်လို့ဆိုပါတယ်။ ဒီလိုဖြစ်ရတာဟာ မျက်ကပ်မှန်မချွတ်ပဲ အကြိမ်ပေါင်းများစွာ ရေချိုးခဲ့တာကြောင့် ဖြစ်ပါတယ်။
 
 
‘နစ်ခ်’ ကတော့ မျက်ကပ်မှန်တပ်ထားပြီး ရေမချိုးသင့်တဲ့အကြောင်း သူ့ကို ဆရာဝန်တွေက သတိပေးခဲ့တာမျိုးမရှိသလို၊ မျက်ကပ်မှန်ရဲ့ ဗူးခွံက ညွှန်ကြားချက်တွေမှာလည်း ဒီအကြောင်းကို သတိပေးထားတာမရှိဘူးလို့ ဆိုပါတယ်။
 
ဆရာဝန်တွေက သူ့အတွက် သုံးပတ်စာ မျက်စဉ်းခပ်ဖို့ ဆေးပေးလိုက်ပါတယ်၊ ဒါပေမယ့် ၂၀၁၈ ခုနှစ် မတ်လ မှာတော့ သူ့ရဲ့ ညာဘက်မျက်လုံးဟာ လုံးဝကွယ်သွားခဲ့ပါတယ်။ မျက်စိကွယ်သွားပြီးတဲ့နောက်ပိုင်း အလုပ်လည်းမသွားနိုင်တော့ပဲ အပြင်သွားတာဆိုလို့ ဆေးရုံ မှန်မှန်သွားပြတာလောက်ပဲ ရှိပါတယ်။ ၂၀၁၈ ဇူလိူင်လ ထဲမှာတော့ မျက်လုံးမှာ ဖြစ်နေတဲ့အနာကို ပျောက်အောင် ကုသနိုင်ခဲ့ပါတယ် ဒါပေမယ့် မျက်စိကတော့ ကွယ်နေဆဲပါပဲ။
 
 
မျက်စိရောဂါပျောက်ကင်းသွားပြီဖြစ်လို့ သူ့ရဲ့နေစဉ်ပုံမှန်လုပ်နေကျ အလုပ်တွေကို မျက်လုံးတစ်ဖက်ထဲနဲ့ ပြန်လည်လုပ်ကိုင်နေပါတယ်။ လက်ရှိမှာတော့ သူ့ရဲ့မျက်လုံးကို ခွဲစိပ်မှုနှစ်ကြိမ် ပြုလုပ်ထားရပြီး မျက်ကြည်လွှာအစားထိုး ကုသနိုင်ဖို့ကို စောင့်ဆိုင်းလျှက်ရှိပါတယ်။
 
ဒါကြောင့်မို့ ပါဝါမျက်ကပ်မှန်၊ အလှမျက်ကပ်မှန်တပ်သူတွေအနေနဲ့ ရေချိုးတဲ့အခါ၊ ညအိပ်တဲ့အခါတွေမှာ မျက်ကပ်မှန်ကို ပြန်ချွတ်ပြီး စနစ်တကျ သိမ်းဆည်းဖို့ကို သတိထားစေချင်ပါတယ်။

12 Jul 2019     14,994 Views




RELATED

Most Popular of Special or Others

Most Popular of NEWS