BEC-TERO TV

၅၆ ယောက် တစ်ပြိုင်တည်းစားနိုင်တဲ့ ကမ္ဘာ့အကြီးဆုံး Hotpot အိုးကြီး(ရုပ်သံ)

13 Nov 2019     826 Views


မြန်မာပြည်က လူတွေ ဟော့ပေါ့အရမ်းကြိုက်ကြတယ်ဆိုတာ နေရာအနှံ့မှာ တိုးပြီးဖွင့်လာကြတဲ့ ဟော့ပေါ့ဆိုင်တွေက သက်သေပြနေပါတယ်။ ဟော့ပေါ့ဆိုင်တွေကလည်း အရသာ၊ အပြင်အဆင်တို့ကို တစ်ဆိုင်နဲ့တစ်ဆိုင် ထူးခြားအောင် အပြိုင်အဆိုင်တွေနဲ့ စားသုံးသူတွေကို စွဲဆောင်နေကြပါတယ်။ တရုတ်နိုင်ငံ ရှန်ဟိုင်းမြို့က ကမ္ဘာ့အကြီးဆုံး မှတ်တမ်းဝင်ထားတဲ့ ဟော့ပေါ့အိုးကြီးက ဟော့ပေါ့ကြိုက်သူတွေ သွားစားကြည့်ချင်လောက်အောင် ထူးခြားပါတယ်။

ဟော့ပေါ့အိုးကြီးရဲ့ အချင်းဟာ ၃၂ ပေကျယ်ဝန်းပြီး အမြင့်ကတော့ ၃ ပေ ၂ လက္မစွန်းစွန်းရှိပါတယ်။ အိုးရဲ့ အလေးချိန်က ၁၃ တန် လေးပါတယ်။ ဒီဟော့ပေါ့အိုးကြီးကို ချောင်ကွင်းမြို့ရဲ့ အကြီးဆုံး ဟော့ပေါ့ဆိုင်ကြီးဖြစ်တဲ့ Morals Village Hot Pot က ဖန်တီးထားတာဖြစ်ပြီး နိုဝင်ဘာလ ၆ ရက်နေ့က ရှန်ဟိုင်းမြို့မှာ ပြုလုပ်နေတဲ့ China International Import Expo မှာ လက်တွေ့ပြသ တည်ခင်းဧည့်ခံနေတာဖြစ်ပါတယ်။

အဆိုပါပြပွဲမှာ အလိုအလျောက်မောင်းနှင်တဲ့ကား၊ ကိုယ်ပိုင်အသိဉာဏ်တုနဲ့ ပျံသန်းတဲ့ လေယာဉ်ပျံ စတဲ့ခေတ်မီနည်းပညာတွေရဲ့ကြားမှာ ဟော့ပေါ့အိုးကြီးကိုလည်း တရုတ်ရိုးရာအမွေအနှစ် တစ်ခုအဖြစ် လာရောက်ပြသထားတာဖြစ်ပါတယ်။

ဟောပေါ့အိုးတို့ရဲ့ ထုံးစံအတိုင်း အကန့်နှစ်ကန့်ပါရှိပြီး တစ်ဖက်က အစပ်၊ တစ်ဖက်က အသီးရွက်ပြုတ်ဟင်းချိုတို့ကို အရသာနှစ်မျိုးထည့်ထားပါတယ်။ အိုးကြီးရဲ့ နှုတ်ခမ်းမှာ တစ်ယောက်စာ အိုးအသေးလေး ၅၆ လုံး ထည့်သွင်းထားပြီး လူ ၅၆ ယောက် တပြိုင်တည်း စားနိုင်ပါတယ်။ အိုး ၅၆ လုံး ကတော့ တရုတ်နိုင်ငံတွင်းမှာရှိတဲ့ လူမျိုးစု ၅၆ စုကို ကိုယ်စားပြုထားတာဖြစ်ပါတယ်။ အိုးကြီးထဲမှာ ဟော့ပေါ့အရည် ၂,၀၀၀ ကီလီုဂရမ် ထည့်ထားပြီး ငရုတ်ကောင်း ၂၀၀ ကီလိုဂရမ်၊ ငရုတ်သီး ၅၀၀ ကီလိုဂရမ်တို့ ရောစပ်ထားပါတယ်။ ဟော့အိုးကြီးကို အပူပေးဖို့အတွက်တော့ ၂၂၀ ကီလိုဝပ် လျှပ်စစ်မီးအား သုံးထားပါတယ်။

ဟော့ပေါ့အရည်တို့နဲ့အတူ နိုင်ငံခြားကနေ တင်သွင်းထားတဲ့ အစားအစာ ၁၀ မျိုး ပါဝင်ပါတယ်။ အဲဒီထဲမှာ နယူးဇီလန်နိုင်ငံက တင်သွင်းတဲ့ အမဲအူကြမ်း(ဝမ်းတွင်းသား)၊ အိန္ဒိယက ငရုတ်သီး၊ ကနေဒါက ပင်လယ်စာ၊ သြစတြေးလျ၊ ဘရာဇီးနဲ့ ဂျာမဏီနိုင်ငံတို့က တင်သွင်းတဲ့ အမဲသားတွေလည်း ပါဝင်ပါတယ်။ ရုပ်သံမှာ အားရပါးရ ဟော့ပေါ့စားနေကြတဲ့ ဧည့်သည်တွေကို ကြည့်ရင်း ဟော့ပေါ့စားချင်စိတ်က တားမနိုင်ဆီးမရ ဖြစ်ရပါတယ်။


13 Nov 2019     826 Views




RELATED

Most Popular of Special or Others

Most Popular of NEWS