နောက်ဆုံးပိတ်မှာ အိတ်နဲ့သယ်သွားခဲ့တဲ့ “အေးမြဖြူ”
15 Nov 2019 1,671 Views
Myanmar Idol ရဲ့ တတိယနေ့ တိုက်ရိုက်သီဆိုယှဉ်ပြိုင်မှုမှာ တက္ကသိုလ်နောက်ခံ တေးသီချင်းတွေနဲ့ ယှဉ်ပြိုင်ခဲ့ကြရပါတယ်။ ပြိုင်ပွဲဝင် ၁၀ ဦးထဲမှာ နောက်ဆုံးမှ သီဆိုယှဉ်ပြိုင်ခဲ့ရတဲ့ “အေးမြဖြူ” က အထူးခြားစွာ မြန်မာသံစဉ်ထဲက သီချင်းတစ်ပုဒ်ကို ရွေးပြီး ပိုင်ပိုင်နိုင်နိုင် သီဆိုပြခဲ့တာဟာ ဒိုင်လူကြီးတွေအားလုံးနဲ့ ပရိသတ်တွေကို တအံ့တသြဖြစ်စေခဲ့ရပါတယ်။
သူ့ရှေ့မှာ သီဆိုခဲ့ကြတဲ့ ပြိုင်ပွဲဝင် (၉)ဦးစလုံးက စတူဒီယိုသီချင်းတွေနဲ့ ယှဉ်ပြိုင်ခဲ့ကြပြီး “အေးမြဖြူ” ကတော့ အဆိုတော်ရုပ်ရှင်သရုပ်ဆောင် ချိုပြုံး ရဲ့ “တက္ကသိုလ်ကျောင်းကငွေလမင်း” သီချင်းနဲ့ ယှဉ်ပြိုင်ခဲ့ရာမှာ ပရိသတ်လူကြီး လူငယ် အားလုံးရဲ့ နားကြောထဲကို စိမ့်အေးပြီး စီးဆင်းသွားခဲ့ပါတယ်။
မြန်မာသံစဉ်တွေ သီဆိုရတာဟာ ခေပေါ်သီချင်းတွေထက် များစွာခက်ပြီး အရစ်အဝိုက် အကွေ့အကောက်တွေနဲ့ ပညာခန်းတွေများလှတဲ့ ဒီသီချင်းကို “အေးမြဖြူ” က ကျွမ်းကျင်ပိုင်နိုင်စွာ သီဆိုပြသခဲ့တာဖြစ်ပါတယ်။
“အေးမြဖြူ” သီဆိုနေစဉ် တလျှောက်လုံး တင်ဇာမော် က စည်းနဲ့ဝါး လိုက်ကာ သီချင်းကို သူကိုယ်တိုင် ခံစားချက်အပြည့်နဲ့ လိုက်ဆိုနေတာကို တွေ့ခဲ့ရပါတယ်။ ဖြူဖြူကျော်သိန်း ကတော့ အရမ်းကို ကျေနပ်အားကျတဲ့ အကြည့်တွေနဲ့ သူမကို ငေးမောကြည့်နေခဲ့ပါတယ်။
သီချင်းအဆုံးမှာ အောင်ကိုလတ် က သူ့ကို မြန်မာ့အသံဓါတ်ပြားရ အဆိုတော်ကြီး တစ်ယောက်လိုပဲလို့ လှိုက်လှိုက်လှဲလှဲ ချီးကျူးစကားပြောကြားခဲ့ပါတယ်။
အသက် ၁၆ နှစ်သာ ရှိသေးပေမယ့် သူမရဲ့ အဆိုပညာက ဒိုင်လူကြီးတွေအားလုံးကို လက်ဖျားခါစေခဲ့ပါတယ်။ “အေးမြဖြူ” ဟာ ငယ်ငယ်လေးကတည်းက ကလေးအဆိုပြိုင်ပွဲတွေမှာ ဝင်ရောက်ယှဉ်ပြိုင်ခဲ့ဖူးပြီး သူမကို ငယ်ငယ်လေးကတည်းက အားပေးနေတဲ့ ပရိသတ်တွေကလည်း အမာခံရှိနေပါတယ်။ မနေ့ညက သီဆိုယှဉ်ပြိုင်မှု အပြီးမှာတော့ “အေးမြဖြူ” ရဲ့ ပရိသတ်တွေ ထပ်ပြီးတိုးလာမှာ သေချာပါတယ်။
ဒီကနေ့ သောကြာနေ့ည Result Show မှာတော့ အစီစဉ်တင်ဆက်သူ ကျော်ထက်အောင်ရဲ့ “အေးမြဖြူ You Are Safe!” ဆိုတဲ့ အသံကို စောစောစီးစီးကြားရမှာ ရာနှုန်းပြည့်ပဲဖြစ်ပါတယ်။
