အီတလီတွင် ဆရာဝန် ၅ ဦး ထပ်မံသေဆုံး ကျန်းမာရေးဝန်ထမ်း ထောင်နဲ့ချီ ဗိုင်းရပ်စ်ကူးစက်

20 Mar 2020 2,287 Views

ကမ္ဘာပေါ်တွင် ကိုရိုနာဗိုင်းရပ်စ် Covid-19 ကူးစက်ပြန့်နှံ့မှုကို အီတလီနိုင်ငံ အကြီးအကျယ်ခံစားနေရပါတယ်။ မတ်လ ၁၉ ရက်နေ့ စစ်တမ်းအရ လူနာများကို ကုသပေးနေသော ဆရာဝန် ၅ ဦး ထပ်မံသေဆုံးပြီး ကျန်းမာရေးဝန်ထမ်းပေါင်း ၂,၆၂၉ ဦး ဗိုင်းရပ်စ် ကူးစက်ခံထားရကာ သေဆုံးသူ ကျန်းမာရေးဝန်ထမ်း ၁၃ ဦးထိ ရှိလာပြီဖြစ်သည်။

ကျန်းမာရေးဝန်ထမ်း ၂,၆၂၉ ဦး ဗိုင်းရပ်စ်ကူးစက်ခံရမှုမှာ တစ်နိုင်ငံလုံး အတိုင်းအတာဖြင့် ၈.၃% ရှိပြီဖြစ်သည်။ အီတလီနိုင်ငံတွင် သာမန်အရပ်သားများကို ကူးစက်မှုထက် ရှေ့တန်းမှာ ရောဂါသည်များကို ကုသနေရသည့် ကျန်းမာရေးဝန်ထမ်းများအား ကူးစက်မှုနှုန်းက လွန်စွာမြန်ဆန် မြင့်တက်နေခြင်းဖြစ်သည်။

သေဆုံးသွားခဲ့သည့် ဆရာဝန် ၅ ဦးတွင် ၃ ဦးမှာ အသက် ၆၀ ကျော် အရွယ်များဖြစ်ပြီး ကျန် ၂ ဦးမှာ အသက် ၇၀ ကျော်များဖြစ်သည်။ ထိုဆရာဝန်များမှာ အငြိမ်းစားဆရာဝန်ကြီးများဖြစ်ကြပြီး Covid-19 ကြောင့် ပြည်သူများ၏ အသက်ကို ကယ်တင်ရန် မိမိသဘောဆန္ဒအလျောက် လုပ်ငန်းခွင် ပြန်ဝင်ခဲ့ကြသူများဖြစ်သည်။

ကျန်းမာရေးဝန်ထမ်းများ ကူးစက်ခံရမှုနဲ့ သေဆုံးမှုနှုန်းများ တိုးတက်လာခြင်းက ဗိုင်းရပ်စ်ကာကွယ်ရန် လုံလောက်သည့် ကျန်းမာရေးအထောက်ကူပြုပစ္စည်းများ အလုံအလောက်မရှိတာကို ထောက်ပြလျှက်ရှိသည်။ တရားဝင် စားရင်းများအရ ၈ ရက်အတွင်းမှာ ဗိုင်းရပ်စ်ကူးစက်ခံရသူ ကျန်းမာရေးဝန်ထမ်းပေါင်း ၁,၅၀၀ ကျော် ရှိနေပြီဖြစ်သည်။

Euronews တွင် ရေးသားထားသောသတင်းအရ အဆုတ်ရောင်ရောဂါအခံရှိသူ ဆရာဝန်တစ်ဦးက ဆေးရုံတွင် လက်အိတ်ပြတ်လပ်နေသဖြင့် လက်အိတ်မပါပဲ ကိုရိုနာဗိုင်းရပ်စ် ရောဂါသည်ကို ပြုစုကုသခဲ့ရကြောင်း၊ မကြာမီ ဆရာဝန်ကိုပါ ကူးစက်ပြီး သေဆုံးသွားကြောင်း ဖော်ပြထားသည်။

CNN ၏ နောက်ဆုံးသတင်းအရ ကိုရိုနာဗိုင်းရပ်စ်ကြောင့် လူသေဆုံးမှုတွင် အီတလီက ၃,၄၀၅ ဖြစ်ပြီး တရုတ်နိုင်ငံက ၃,၂၄၉ ဖြစ်သဖြင့် ကျော်တက်သွားပြီဖြစ်ကြောင်း ဖော်ပြထားသည်။ ဒါ့အပြင် နိုင်ငံတွင်းမှာ ကူးစက်ပြန့်ပွားနှုန်းကလည်း စံချိန်တင်ခဲ့ပြီး ဒီနေ့တစ်ရက်ထဲမှာပင် ၅,၃၂၂ ဦး ထပ်မံကူးစက်ခံရကြောင်း သိရှိရပြီး တစ်နိုင်ငံလုံးအတိုင်းအတာဖြင့် ကူးစက်ခံထားရသူ ၄၁,၀၃၅ ရှိလာပြီဖြစ်သည်။