BEC-TERO TV

လေ့ကျင့်ခန်းလုပ်စရာမလိုပဲ ၁၅ မိနစ်အတွင်း ခါးနာပျောက်နည်း

18 Sep 2019     16,813 Views


ယနေ့ခေတ်မှာတော့ ခါးနာတဲ့ဝေဒနာကို လူတိုင်းနီးပါးခံစားနေကြရပါတယ်၊ အကြောင်းအရင်းကတော့ အလုပ်ခွင်မှာ အချိန်ကြာကြာ ထိုင်၍သော်၎င်း မတ်တပ်ရပ်၍သော်၎င်း အလုပ်လုပ်နေကြရတာကြောင့် ခါးရဲ့အနေအထား ပုံမမှန်တဲ့အတွက် ခါးနာတာ ဖြစ်ပါတယ်။
 
ခါးနာတဲ့အခါ ပရုတ်ဆီတို့လို ပူလောင်တဲ့ဆေးတွေလိမ်းပေမယ့် ခဏတစ်ဖြုတ်ပဲ သက်သာပြီး မကြာခင်ပြန်နာလာတတ်ပါတယ်။ အချို့လူတွေကတော့ မှားယွင်းတဲ့ ခါးလေ့ကျင့်ခန်းတွေ၊ ခါးကိုလှည့်ပြီး ချိုးတာတွေ လုပ်တတ်ကြပါတယ်။ ဒီလိုမှားယွင်းတဲ့ လေ့ကျင့်ခန်းတွေဟာ ခါးနာတာမပျောက်တဲ့အပြင် ပိုဆိုးလာစေပါတယ်။
 
ယခုဖော်ပြပေးမယ့် နည်းလမ်း(၆) သွယ်ကတော့ ချွေးထွက်အောင် ပင်ပင်ပန်းပန်း လေ့ကျင့်ခန်းတွေ လုပ်စရာမလိုပဲ ညင်ညင်သာသာနဲ့ ၁၅ မိနစ်အတွင်မှာ ခါးနာတာကို ယူပစ်သလို ပျောက်ကင်းသွားစေပါလိမ့်မယ်။
 
ခါးနာစေတဲ့အဓိကအချက်ကတော့ ကျောရိုးမကြီးရဲ့ ဘေးမှာထိန်းပေးထားတဲ့ ကြွက်သားတွေ တောင့်တင်းလွန်းနေတဲ့အတွက် ဖြစ်ပါတယ်။ ခါးအလွန်နာနေတဲ့အချိန်မှာ မတ်မတ်အနေအထားနဲ့ ထိုင်ပြီး ကိုယ့်ရဲ့ကျောရိုးကို ပြန်စမ်းကြည့်တဲ့အခါ ကျောရိုးက မြောင်းတစ်ခုလို မြုတ်နေပြီး ကျောရိုးဘေးက ကြွက်သားမြှောင်းတွေက တင်းတောင့်နေတာကို ခံစားရပါလိမ့်မယ်။
 
အဲဒီကြွက်သားတွေကို ဖော်ပြပါနည်းလမ်းတွေနဲ့ ဖြေလျော့ပေးလိုက်ရင် ခါးနာတာ ချက်ခြင်း သက်သာပျောက်ကင်းသွားပါလိမ့်မယ်။
 

၁။ ခန္ဓာကိုယ်ကို ဘယ်/ညာ လှည့်ပေးခြင်း

 
- ညီညာတဲ့ကြမ်းပြင်ပေါ်မှာ အဝတ်(သို့)ယောဂဖျာခင်းပြီး ပက်လက်အနေအထား လဲလျောင်းလိုက်ပါ။
- လက်ကို ခန္ဓာကိုယ်နဲ့ တပြေးတည်း ကြမ်းပြင်မှာ ကားကားလေး ဆန့်ချထားပါ (ခါးလှည့်တဲ့အခါ လည်မသွားအောင် ထိန်းထားပေးဖို့ဖြစ်ပါတယ်)
- ဒူးနှစ်ဖက်ကို ပြိုင်တူကွေးပြီး ခြေဖျားနဲ့ ကြမ်းပြင် မထိအောင် အနည်းငယ် မြောက်လိုက်ပါ။
(ဒီအခါမှာ ကြမ်းပြင်နဲ့ ခါးတစ်သားထဲ ဖြစ်သွားတာကို ခံစားရပါလိမ့်မယ်၊ အမြင့်ကြီးမြောက်ရန်မလို)
 
- ဒူးကိုကွေးလျက် အနေအထားနဲ့ ခါးကနေ အောက်ပိုင်းကို ဘယ်ဘက်၊ ညာဘက် တစ်ဖက်စီကို တစ်လှည့်စီ ဖြည်းဖြည်းခြင်း လှည့်ပေးပါ။ (ခန္ဓာကိုယ်အပေါ်ပိုင်း လိုက်မလှည့်ရန် သတိထားပါ)
- တစ်ဖက်ကို လှည့်ရင် ၂ မိနစ်ကနေ ၃ မိနစ်လောက်ထိ ပုံပါအတိုင်း နေပါ၊ ပြီးမှ နောက်တစ်ဖက်ကိုလှည့်ပြီး ၂ မိနစ်ကနေ ၃ မိနစ်လောက်ထိ နေပါ။
 
ဖော်ပြပါနည်းအတိုင်း ၅ ကြိမ်လောက်စီ လုပ်ပြီးပါက ခါးနာသက်သာလာတာကို သိသိသာသာခံစားရလာပါလိမ့်မယ်။
 

၂။ အပေါ်ပိုင်းမြောက်ကာ ဖြေလျော့နည်း

 
- ညီညာတဲ့ကြမ်းပြင်ပေါ်မှာ အဝတ်(သို့)ယောဂဖျာခင်းပြီး မှောက်လျက်အနေအထား လဲလျောင်းလိုက်ပါ။
- ပုခုံးနဲ့ တစ်တန်းတည်းအနေအထားဖြင့် တံတောင်ဆစ်နှစ်ဖက် ထောက်ပြီး ခန္ဓာကိုယ်အပေါ်ပိုင်းကိုပဲ ဖြည်းဖြည်းခြင်း ကြွအောင်မပါ။
- ဒီနေရာမှာ ပခုံးကိုအားမကိုးပဲ ကျောရိုးဖြင့် အပေါ်ပိုင်းကြွအောင် လုပ်ဆောင်ပါ။ ခန္ဓာကိုယ်အောက်ပိုင်းက ကြမ်းပြင်မှာပဲ ကပ်နေပါစေ။
- အပေါ်ပိုင်းကြွထားတဲ့အနေအထားနဲ့ ၂ မိနစ်လောက် နေပေးပါ။
- ဒီနည်းအတိုင်း ၄ ကြိမ် ၅ ကြိမ်လောက် ပြုလုပ်ပါ။
အကြိမ်ရေများအောင် ဖျစ်ညှစ်မလုပ်ပဲ ကိုယ်လုပ်နိုင်သလောက်ပဲ လုပ်ရမှာဖြစ်ပါတယ်။
 

၃။ ဒူခေါင်း ဆွဲမြောက်နည်း

 
- ညီညာတဲ့ကြမ်းပြင်ပေါ်မှာ အဝတ်(သို့)ယောဂဖျာခင်းပြီး ပက်လက်အနေအထား လဲလျောင်းလိုက်ပါ။
- ခြေဖျားနှစ်ဖက်ကို ပုံတွင်ပြထားသည့်အတိုင်း ဆန့်ထုတ်ထားပါ။
- အပေါ်ပိုင်း မကြွပဲ ဒူးခေါင်းတစ်ဖက်ကို ရင်ဘက်ရောက်အောင် ကွေးမြောက်ပြီး လက်နှစ်ဖက်နဲ့ စက္ကန့် ၂၀ လောက် ဖမ်းဆွဲထားပါ။ အခြားခြေတစ်ဖက်က ကြမ်းပြင်မှာ ဆန့်တန်းနေပါစေ။
- ထိုနည်းအတိုင်း ၃ ကြိမ် ၄ ကြိမ်လောက် လုပ်ပါ။
- ပြီးရင် နောက်ထပ် တစ်ဖက်ကို ပြောင်းပြီး ဖော်ပြပါအတိုင်း လုပ်ဆောင်ပါ။
 

၄။ အင်္ဂလိပ်ဂဏန်း 4 ပုံသဏ္ဍန်နည်း

 
 
- ညီညာတဲ့ကြမ်းပြင်ပေါ်မှာ အဝတ်(သို့)ယောဂဖျာခင်းပြီး ပက်လက်အနေအထား လဲလျောင်းလိုက်ပါ။
- ညာဘက် ခြေထောက်ကို ဘယ်ဘက် ဒူးအထက်နား ဖြတ်တင်ပြီး ဘယ်ခြေကို ဒူးကွေးပြီးကြွပါ။
- ဘယ်ဘက်ခြေထောက်ရဲ့ တကောက်ကွေးကို လက်နှစ်ဖက်နဲ့ ဆွဲထားပါ။ ညာခြေပါ ချိပ်လျှက်ပါလာပါမည်။
- ခါးကြောလေးများ တင်းလာတာကို ခံစားရပါမယ်၊ ကြမ်းပြင်နဲ့ခါး ထိလျက်အနေထားထိ ဆွဲနိုင်သလောက် မိနစ်အနည်းငယ် ဆွဲထားပါ။
- လိုအပ်ရင် ၂ ကြိမ် ၃ ကြိမ်လောက်လုပ်ပြီး နောက်ထပ်တစ်ဖက် ပြောင်းပါ။
 

၅။ ဦးခေါင်းကို ဒူးနဲ့ထိအောင်ကွေးနည်း

 
 
ဒီနည်းလမ်းကို လုပ်ဖို့အတွက် ဦးစွာအကြောလျော့ လေ့ကျင့်ခန်းလုပ်ထားပြီးမှသာ ထိထိရောက်ရောက် လုပ်နိုင်ပါလိမ့်မယ်။ 
(ဗိုက်ခေါက်ထူသူတွေအတွက်လည်း အခက်အခဲရှိနိုင်ပါတယ်)
 
- ကြမ်းပြင်မှာ တန်းတန်းမတ်မတ် သက်တောင့်သက်သာ ခြေဆင်းထိုင်ပါ
- ခြေထောက်အဖျားလေးတွေကို ကော့ထားပါ။
- ခါးညွတ်လျှက် ဦးခေါင်းကို ဒူခေါင်းထိရောက်အောင် ကွေးထားပါ။
- စက္ကန့်အနည်းငယ်ကြာ ဒူးနဲ့ ဦးခေါင်းထိထားပြီး ဖြည်းဖြည်းချင်း ကိုယ်ကို ပြန်မတ်ပါ။
- ၅ ကြိမ်ကနေ ၁၀ ကြိမ်လောက်ထိ လုပ်နိုင်ပါတယ်။
 
 
ဗိုက်ခေါက်ရှိသူ အကြောလျော့ လေ့ကျင့်ခန်း မလုပ်ထားသူတွေအတွက်တော့ အထက်ဖော်ပြပါပုံအတိုင်း ခြေထောက်ပေါ်မှာ ခေါင်းအုံးခံထားပြီး ခြေထောက်အောက်မှာ စောင်ခုထားပြီးလည်း လုပ်ဆောင်နိုင်ပါလိမ့်မယ်။
 

၆။ ရှိခိုးကန်တော့ဟန်နည်းလမ်း

- ဘုရားရှိခိုး ကန်တော့တဲ့အခါ ထိုင်တဲ့ပုံစံအတိုင်း လုပ်ဆောင်ရမှာပါ။
- ညာခြေဖျားက ဘယ်ခြေသလုံးပေါ် ချိပ်တင်ပြီး ထိုင်ပါ။
- ကန်တော့လိုက်တဲ့ ပုံစံအတိုင်း လက်နှစ်ဖက်ကို ရှေ့ကြမ်းပြင်ပေါ် ဆန့်တန်းပြီး နဖူးနဲ့ ကြမ်းပြင်ထိနေပါစေ၊ ပုံပါအတိုင်း ဖင်မကြွပါစေနဲ့။ 
- ခြေဖျားကို နောက်တစ်ဖက်ပြောင်းတင်ပြီး လိုအပ်သလောက် အကြိမ်ကြိမ်ပြုလုပ်ပါ။
 
ဖော်ပြပါ နည်းလမ်း ၆ သွယ်ကတော့ ပင်ပင်ပန်းပန်း ချွေးထွက်စရာမလိုပဲ ၁၅ မိနစ်အတွင်းမှာ ခါးနာတာ ပျောက်ကင်းသွားစေမယ့် နည်းလမ်းများဖြစ်ပါတယ်။ သတိပြုရမှာကတော့ ကြမ်းပြင်ဟာ ညီညာတောင့်တင်းပြန့်ပြူးနေရမှာဖြစ်ပြီး အောက်ခံပျော့တဲ့ မွေ့ယာလိုနေရာမျိုးတွေမှာ မပြုလုပ်ရပါဘူး။
 
ဒီနည်းအတိုင်း ၃ ရက် တစ်ခါလောက် ပုံမှန်လုပ်ပေးခြင်းဖြင့် ခါးနားရောဂါ လုံးဝပျောက်ကင်းသွားပါလိမ့်မယ်။

 


18 Sep 2019     16,813 Views




RELATED

Most Popular of Health Fix

Most Popular of NEWS